Mga bulaklak at tatlong gun salute ang inialay sa bantayog ng Galant 44 sa Philippine National Police Academy o PNPA sa Silang Cavite sa unang taon ng kanilang pagkasawi sa Mamasapano, Maguindanao.
Kabilang sa mga dumalo sa unang anibersaryo ng pagkasawi ng SAF 44 sina dating SAF Director Getullo Napenas at retired Police Chief Superentendent Tomas Rentoy ang chairman ng PNPA Alumni Association Incorporated.
Ayon kay Rentoy mailap pa rin ang hustisya sa SAF 44, isang taon na ang nakalilipas.
Ngunit naniniwala sila na makakamtan ang hustisya ng pagkamatay ng apatnaput apat na bayani sa susunod na administrasyon.
Umaasa naman ang dating SAF Director na sa pamamagitan ng mga bagong ebidensiya na ipi-presinta ni Senator Enrile ay matutuldukan na ang kaso ng Mamasapano encounter.
(Sherwin Culubong / UNTV Correspondent)
Tags: PNPA, SAF 44, unang taon
Pabor si PNP Chief PDG Oscar Albayalde sa desisyon ng Board of Inquiry na tanggalin na sa akademya ang tatlong kadete na nasangkot sa kaso ng sexual abuse noong Oktubre.
Ayon kay Albayalde, hindi na dapat makabalik sa akademya ang mga ito upang hindi na rin pamarisan ng ibang kadete.
Ayon naman kay PNPA Director PCSupt. Chiquito Malayo, guilty sa kasong grave delinquency at conduct unbecoming of an officer ang isang 2nd class cadet at dalawang 3rd class cadet.
Sinabi pa ni Malayo na mayroong 48 oras ang tatlong kadete para magsumite ng kanilang motion for reconsideration.
Apat na miyembro ng Philippine Public Safety College ang bubuo sa fact-finding committee na mag-iimbestiga sa nangyaring sexual harrassment sa dalawang plebo ng Philippine National Police Academy noong ika-6 ng Oktubre. Pamumunuan ito ni National Police Training Institute Director PCSupt. Ramon Rafael.
Bahagi ng mandato ng grupo ang magrekomenda ng mga polisiya kung paano maiiwasang maulit ang insidente. Inaasahan na maisusumite ng fact-finding committee ng inisyal na resulta ng imbestigasyon bago matapos ang buwang kasalukuyang.
Ayon kay PPSC President Ricardo De Leon, hindi sila nagkulang sa mga ipinatutupad na disiplina sa akademya subalit may ilan na hindi sumusunod dito. Tiniyak din nito na magiging patas ang imbestigasyon kahit na heneral ng PNP ang tatay ng suspek.
Nilinaw ng pinuno ng PPSC na mayroong pinirmahang covenant ang lahat ng kadete noon pang Hulyo kung saan nagbabawal sa hazing at katulad na mga parusa kayat tiyak aniyang mananagot ang mga lumabag dito.
Samantala, pabor naman si De Leon na si PCSupt. Chiquito Malayo ang maging bagong director ng PNPA dahil sa pagiging istrikto nito.
( Lea Ylagan / UNTV Correspondent )
Tags: fact-finding committee, PNPA, PPSC
Sinimulan na ng Philippine National Police Academy (PNPA) ang sarili nitong imbestigasyon sa kaso ng pang-aabuso sa dalawang plebo ng tatlong upper class cadet noong ika-6 ng Oktubre.
Ayon kay PNPA Director Police Chief Superintendent Joseph Adnol, nakuhanan na nila ng pahayag ang magkabilang panig. Tumanggi ang PNPA na pangalanan ang mga sangkot sa pang-aabuso maging ang mga biktima habang isinagawa ang imbestigasyon.
Pero ayon kay Adnol, hindi tama ang ibinigay na parusa sa mga plebo. Una nang sinabi ng opisyal na inutusan ng isang 2nd class cadet o 3rd year student ang dalawang 4th class cadet o 1st year students na mag-oral sex sila sa harap niya bilang parusa sa umanoy paglabag na nagawa ng mga ito. Dalawang 3rd class cadet o 2nd year students naman ang nanood sa insidente.
Ayon sa heneral, posibleng maharap sa kasong grave misconduct ang mga suspek. Tinitignan din ng PNPA kung papatawan ng parusa ang mga biktima dahil hindi agad ipinagbigay alam sa mga otoridad ang insidente.
Bukod sa PNPA, magsasagawa rin ng imbestigasyon ang police Regional Office 4A. Una na ring inatasan ni PNP Chief Oscar Albayalde ang Directorate for Investigation ang Detective Management (DIDM) na imbestigahan ang insidente.
( Benedict Samson / UNTV Correspondent )
Tags: grave misconduct, PNPA, sexual harrassment
