Inamin ni Pangulong Rodrigo Duterte na masama ang kaniyang loob sa sinabi ni dating Pangulong Benigno Aquino III laban sa kaniyang anti-drug campaign.
Ito ang ipinahayag ni Pangulong Duterte nang dumalaw siya sa mga sundalo at pulis na nakikipagbakbakan sa Marawi City noong Biyernes ng hapon.
Muli niyang tinuligsa ang naging pahayag ni dating Pangulong Benigno Aquino III na tila walang nangyari sa kaniyang anti-drug war.
Aniya, hindi makatwirang sabihin ito ng dating pangulo dahil maraming pulis at sundalo aniya ang nagbuwis ng buhay upang tugisin ang mga nasa likod ng operasyon ng iligal na droga sa bansa.
Una nang ikinumpara ng punong ehekutibo ang mga accomplishment ng kaniyang anti-drug war sa anim na taong nagawa sa ilalim ng administrasyon ni dating Pangulong Aquino.
Tinuligsa rin nito ang mga kumukwestyon sa uri ng kaniyang pananalita at di pinalampas ang pagkakataong ipaliwanag ang dahilan nito.
(Mirasol Abogadil / UNTV Correspondent)
Tags: anti-drug campaign, Aquino, duterte
