Malabo pa ring makamit ang hustisya para sa 44 na SAF troopers na napatay sa operasyon sa Mamasapano, eksaktong tatlong na ang nakalipas.
Bagamat napatay sa operasyon ang teroristang si Zulkifli Bin Hir alyas Marwan, nagbuwis naman ng buhay ang mga tauhan ng SAF.
March 2016, 88 ang kinasuhan ng direct assault with murder dahil sa pagkamatay ng tatlumpu’t limang tauhan ng SAF sa maisan ng brgy. Tukanalipao. Kabilang dito ang limang kumander ng Moro Islamic Liberation Front o MILF.
Enero nitong nakaraang taon, iniutos ng Regional Trial Court ng Shariff Aguak, Maguindanao ang pag-aresto sa mga akusado. Pero hanggang ngayon, wala pa ring nahuhuli isa man sa mga ito.
Batay sa ulat na inilabas ng Department of Justice, hindi pa rin nasisimulan ang paglilitis dahil sa mosyon ng mga akusado na i-dismiss ang mga kaso at bawiin ang arrest order laban sa kanila.
Sa kabila nito, tiniyak ni Justice Sec. Vitaliano Aguirre na patuloy ang pagsisikap ng DOJ na mabigyan ng hustisya ang mga biktima. Hiniling na rin ng DOJ na ilipat na lamang sa maynila ang paglilitis sa mga kaso.
Enero nitong nakaraang taon sumulat sila kay Chief Justice Maria Lourdes Sereno, pero wala pang desisyon ang Korte Suprema hanggang ngayon.
( Roderic Mendoza / UNTV Correspondent )
Tags: Mamasapano, Marwan, SAF
Nagpadala na ang Philippine National Police (PNP) ng tig isang company ng Special Action Force (SAF) sa apat na probinsiya na tinutukoy ng Memorandum Order 32 ng Malakanyang.
Ayon kay PNP Chief Oscar Albayalde, magagamit ang mga SAF troopers para wakasan ang lawless violence Bicol Region, Samar, Negros Occidental at Negros Oriental.
Nakasaad sa Memorandum Order No. 32 na dapat magdagdag ng tauhan ang PNP at AFP sa mga nabanggit na lugar kung saan aktibo ang New People’s Army (NPA).
Bukod sa SAF troopers, inatasan din ni Chief PNP ang mga hepe ng Police Regional Offices 5, 6, 7 at 8 na bumuo ng implementation plan para sa Memorandum Order No. 32.
Sa nasabing mga rehiyon nangyari ang ilang insidente ng pag-atake ng npa kabilang ang serye ng ambush sa mga tauhan ng PNP at AFP sa Bicol, Sagay massacre sa Negros Occidental, at ang paglusob sa Lapinig Police Station sa Samar.
Pinabulaanan naman ng PNP ang paratang ng mga makakaliwang organisasyon na ang hakbang na ito ay para sa napipintong martial law declaration sa buong bansa.
Sinabi naman ni AFP Spokesperson BGen. Edgard Arevalo na susuportahan nila ang layunin ng M.O. 32 dahil mandato ng AFP ang pagtiyak sa kaligtasan ng mamamayan at protektahan ang estado.
Nakatakdang namang nagpulong ang Joint Peace and Security Coordinating Council ng AFP at PNP ngayong linggo.
( Lea Ylagan / UNTV Correspondent )
Tags: PNP, PNP Chief Oscar Albayalde, SAF
Sinampahan ng reklamong pandarambong o plunder sa Office of the Ombudsman ang kasalukuyang direktor ng PNP Directorate for Integrated Police Operations Southern Luzon na si Police Director Benjamin Lusad.
Ang kaso ay kaugnay sa hindi naibigy na daily subsistence allowance sa mga tauhan ng SAF noong 2016 at 2017. Si Lusad ay dating pinuno ng Special Action Force.
Kaya naman kahapon, tinanggal na sa pwesto ang opisyal
Ayon kay PNP Spokesman Chief Supt. John Bulalacao, layon nitong bigyang-daan ang ginagawang imbestigasyon ng Ombudsman.
Una nang sinabi ni outgoing PNP Chief PDG Ronald Bato Dela Rosa na hindi siya kumbinsido sa paliwanag ni Lusad sa isyu.
Sa ngayon aniya ay nagsasagawa na rin ng imbestigasyon at audit ang comptroller ng PNP kung bakit hindi naibigay ang subsistence allowance ng SAF.
30 pesos ang subsistence allowance ng SAF sa isang araw o P900 sa isang buwan.
Kung susumahin, umabot na sa 59.8 million pesos ang hindi naibigay na allowance sa mga tauhan ng SAF sa loob ng dalawang taon.
( Lea Ylagan / UNTV Correspondent )
Matapos ang pagkakaaresto ni Juromee Dongon, asawa ng Malaysian terrorist na si Zulkifli Bin Hir o alyas Marwan, at ng mga kamag-anak nito, nakabantay naman ang National Capital Region Police Office (NCRPO) sa posibleng paghihiganti ng mga sympathizers ni Marwan.
Ayon kay Department of the Interior and Local Government (DILG) Officer-in-Charge Undersecretary Eduardo Año, malaki ang posibilidad na gumanti ang pwersa ng ISIS terrorist dahil sa pagkakaaresto sa asawa ni Marwan.
Ayon kay NCRPO chief PDir. Oscar Albayalde, bagama’t wala pang banta ng terorismo sa Metro Manila, mananatiling naka-full alert status dahil may mga namomonitor silang mga indibidwal at grupo na konektado umano sa ISIS terrorist group.
Matatandaang naaresto ng Philippine National Police (PNP) si Juromee Dongon kasama ang mga kapatid, bayaw at tatay nito sa Lanao del Norte sa salang illegal possesion of firearms and explosives matapos mahulihan ang mga ito ng mga bomba at baril.
Itinuturo rin umano ang mga ito na may koneksyon sa mga pinaghihinalaang terror activities sa lugar.
( Rajel Adora / UNTV Correspondent )
Tags: Juromee Dongon, Marwan, NCRPO, PNP
