Simbulo ng pagtatagumpay laban sa diktaturya ang monumento ni Ka Pepe Diokno ma itinayo sa harapan ng opisina ng Commission on Human Rights.
Pumasok sa isang kasunduan ang National Historical Commission of the Philippines at National Commission for Culture and the Arts upang igawa ng monumento si Ka Pepe Diokno.
Si Ka Pepe ang isa sa mga nanguna noon sa Presidential Committee on Human Rights noong 1986. Siya rin ang nagtayo ng Free Legal Assistance Group o FLAG upang tulungan ang mga biktima ng martial law noon.
Panauhing pandangal si Chief Justice Maria Lourdes Sereno, tinalakay nito sa kanyang speech na dapat mangibabaw pa rin ang batas.
Sa panahon aniya ngayon ay tila nawawala na ang diwa ng konstitusyon na siyang proteksyon ng mga tao sa mga paglabag sa karapatang pantao.
Ipinunto rin ni Sereno na kung mayroon man kailangang tugisin ang mga alagad ng batas, dapat siguraduhin na ito ay naaayon sa batas.
Tiniyak ni Sereno sa kanyang talumpati na ang Korte Suprema ang magsisilbing gabay ng mga Pilipino upang makamit ang tunay na pagbabago.
Dumalo rin sa pagtitipon si VP Leni Robredo, dating Pangulong Benigno Aquino, Senator Franklin Drilon, Senator Bam Aquino at mga dating Cabinet Secretaries.
( Mon Jocson / UNTV Correspondent )
Tags: CHR, Jose "Ka Pepe" Diokno, martial law.
METRO MANILA – Nagbabala ang Commission on Human Rights matapos na maglabas ng direktiba ang Department of the Interior and Local Government (DILG) sa mga barangay na magsumite ng listahan ng mga hindi pa bakunadong residente kontra COVID-19.
Nagpaalaala ang komisyon sa gobyerno na dapat ang paggalang sa karapatang pantao ang pangunahing konsiderasyon sa pagbuo ng mga polisiya upang tugunan ang pandemiya.
Sa isang pahayag, iginiit ni Commission on Human Rights Spokesperson Atty. Jacqueline Ann de Guia na hindi dapat magresulta sa paglabag sa karapatan sa privacy ng mga indibidwal ang hinihinging listahan ng unvaccinated residents.
Dapat ding hindi ito makapagil sa pag-access ng pangunahing pangangailangan at serbisyo ng mga hindi pa bakunado.
Ayon pa sa tagapagsalita ng komisyon, hindi dapat maging dahilan ang pandemiya upang maisantabi ang mga batas at human rights standards na nagbibigay-proteksyon sa karapatang-pantao at dignidad sa lahat ng sitwasyon.
Nanindigan naman ang DILG na walang paglabag sa privacy dahil ang pagkuha ng datos ng unvaccinated ay para sa legitimate purpose at kinakailangan ang datos upang maipatupad ng maayos ang quarantine protocols.
Mismong si Pangulong Rodrigo Duterte ang nagbigay ng direktiba na dapat limitahan ang paggalaw ng mga di pa bakunado sa gitna ng pagsipa ng COVID-19 cases sa bansa.
Kasunod nito ay nagkasundo ang Metro Manila Council na rendahan ang galaw ng mga unvaccinated at halos lahat ng lokal na pamahalaan, naglabas ng ordinansa kaugnay nito.
Gayunman, pinapayagan namang lumabas ang mga di pa bakunado kung bibili ng essential goods.
(Rosalie Coz | UNTV News)
Tags: CHR, DILG, Unvaccinated
METRO MANILA – Nagdesisyon ang Department of Justice (DOJ) na ilabas ang mga impormasyon ng 52 na kasong may kinalaman sa anti-drug operation ng pamahalaan.
Agad naman itong sinang-ayunan ng Commission on Human Rights (CHR) at sinabing umaasa sila na ang mga naturang impormasyon ay makakatulong sa pamilya ng mga naging biktima, na malaman ang naging imbestigasyon sa pagkamatay ng kanilang mga kaanak.
Matatandaan nitong Pebrero humarap sa United Nation Human Rights si DOJ Sec. Menardo Guevara at sinabi na sa kalahati ng kabuuang bilang na 5,655 na kaso laban sa kampanya kontra droga ng Administrasyonng Duterte ay nakita nilang may pagkukulang ang mga otoridad sa pagsunod ng standard protocols at sa pag-iimbestiga sa mga armas na narekober nila mula sa mga biktima.
Ayon sa CHR, sa kabila ng nakikita nilang pag-usad ng mga kaso, hinihikayat pa din nila ang gobyerno na tingnan ang iba pang kaso na may kinalaman sa EJK.
Pinaalalahanan din nila ang pamahalaan na obligasyon ng estado na pangalagaan ang buhay ng tao at magbigay ng hustisya para sa mga lalabag ng karapatang pantao nito.
Giit pa ng Human Rights na, ang mabilis at masusing imbestigasyon ang susi upang mapanagot ang mga may sala. Nakahanda umano silang umalalay sa pamahalaan upang mapabilis ang imbestigasyon at mananatili silang tapat sa kanilang mandato.
(Jasha Gamao | La Verdad Correspondent)
METRO MANILA – Ngayong araw(Dec. 31) na ang huling araw ng ipinatutupad na Batas Militar sa Mindanao matapos itong i-extend ng 3 beses mula nang ideklara ni Pangulong Duterte taong 2017 dahil sa paglusob ng mga teroristang Maute-ISIS sa lungsod ng Marawi.
Ayon kay Presidential Spokesperson and Chief Legal Counsel Salvador Panelo, pinal na ang desisyon ng Pangulo na huwag palawigin ang Batas Militar.
“President Rodrigo Duterte is not extending martial law. It will expire on December 31, 2019″ani Presidential Spokesperson and Chief Presidential Legal Counsel .
Maging si Defense Secretary Delfin Lorenzana ay inirekomenda rin niya sa Pangulo ang Martial Law termination .
“The whole of Mindanao no selective martial law because i was assured by our armed forces and the PNP that we have already accomplished what we aim to do with martial law” ani DND Sec. Delfin Lorenzana.
Samantalang ang AFP at PNP naman ang naging basehan na dapat nang alisin ang Batas Militar ay ang stable nang seguridad sa Mindanao at ang paghina ng terorismo at rebelyon.
“Mayron na pong pronouncement ang Malacanang na hindi na iextend ang martial law beyond December 31” ani AFP Spokesperson, BGEN. Edgard Arevalo.
Pero, sa kabila nito, tutol naman ang ilang residente sa rehiyon. anila maganda ang naging epekto ng martial law sa ipinatutupad na seguridad sa kanilang rehiyon.
Nadisiplina rin ang mga mamamayan lalo na ang mga kabataan na huwag nang maglakad tuwing dis-oras ng gabi.
Binigyang diin ng mga ito, kung wala nang Martial Law ay babalik na naman ang mga masasamang loob at mga abusado.
(Dante Amento | UNTV News)
Tags: martial law.
