METRO MANILA – Kasama sa binaha ang tahanan ng single parent na si nanay Delia Verzo ng Marikina City nang manalasa ang bagyong Ulysses . Upang maipaayos ang kanilang sahig at magkaroon ng kaunting puhunan humingi ng tulong si nanay Delia sa programang Serbisyong Bayanihan.
Bagama’t 10 ang anak ng byudang si nanay Delia, ang ilan sa mga ito ay mayroon nang kanya kanyang pamilya. Mayroon din siyang anak na inaaalagaan dahil ito’y PWD at dialysis patient.
Natugunan ang hiling ni Nanay Delia sa pamamagitan ng programa at ng tulong mula sa MCGI – New Zealand Chapter.
Tinawagan naman ni Kuya Daniel Razon ang single mother na si nanay Merly Salvador ng Baliuag Bulacan. Natuwa si Kuya Daniel dahil humiling si nanay Merly ng kaunting puhunan hindi para sa kanyang sarili kundi para sa kaniyang kapitbahay na hirap sa buhay.
“Napakagandang marinig na ang kanyang kapitbahay ay nagmamalasakit sa kanyang kapitbahay,” ani Kuya Daniel Razon.
Mula naman sa live commenter ng programa, tinawagan ang single mom na si nanay Alma Ambrog ng Tumana Marikina City. Maagang naulila ang 2 anak ni nanay Alma dahil namatay na ang kaniyang asawa.
Humiling siya ng kaunting puhunan upang makapagtinda ng fishballs at kikiam at ng tablet para sa pag aaral ng kanyang 2 anak.
(Beth Pilares | La Verdad Correspondent)
METRO MANILA – Malayo man o malapit, hindi nagpapigil ang Serbisyong Bayanihan (SB) sa layunin nitong makatulong sa kapwa, lalo na sa pagdiriwang ng ika-6 na anibersayo nito simula Lunes hanggang Biyernes, July 18-22.
Isa ang Brgy. San Juan, Taytay, Rizal sa mga lugar na dinalaw ng SB sa unang araw nito noong Lunes (July 18) katuwang ang Members Church of God International (MCGI) at ilang kawani ng pamahalaan upang maghatid ng iba’t ibang serbisyo gaya ng free store, feeding program, libreng gupit, checkup, bunot ng ngipin, legal consultation at marami pang iba.
Nagpasalamat naman ang kapitana ng Brgy. San Juan na si Roseller Valera sa mga serbisyong ibinigay ng SB na nagdulot ng kasiyahan at malaking tuwa sa kababayan at katutubo sa lugar.
Samantala, magkakahawig na serbisyo naman ang ipinagkaloob ng SB sa parehong araw sa iba’t ibang lugar ng bansa tulad sa Brgy. Palnab, Virac, Catanduanes, Brgy. Samburon, Lanao Del Norte, Batad, Iloilo, Brgy. Payatas, Quezon City at Sapang Kawayan, Masantol, Pampanga kung saan aabot sa 8,337 ang kabuuang natulungan sa unang araw.
(Marc Aubrey | La Verdad Correspondent)
Tags: Serbisyong Bayanihan
KAWIT, CAVITE – Matagumpay na naisakatuparan ng Serbisyong Bayanihan sa Cavite ang pagbibigay ng serbisyo publiko katuwang ang Members Church of God International (MCGI) at Department of Social Welfare and Development (DSWD).
Ipinagkaloob ng programa ang libreng adult at pedia check-up, mayroon ding dental at optical check-up, haircut, reflex massage, legal services at chiropractic sessions.
Nagsagawa din ng registration para sa Pantawid Pamilyang Pilipino Program (4Ps) ang DSWD habang libreng pagpapakain at libreng groceries naman ang hatid ng MCGI para sa ating mga kababayan sa Cavite.
Sa kabuuan, umabot sa 5,500 ang napaglingkuran ng programa sa awa at tulong Dios.
(Eliza Fernandez | La Verdad Correspondent)
Pinuntahan ng Serbisyong Bayanihan (SB) team ang Manduae City, Cebu nitong Biyernes (February 18) upang bisitahin at kumustahin si teacher Clairesean Paul Facultad at ang kaniyang tindahang bigay ng MCGI Cares at programang SB.
Answered prayer para kay teacher Clairesean ang pagkakaroon ng munting tindahan, pagkakakitaan ang isa sa pangunahing daing niya sa Panginoon.
Ayon kay Clairesean bago pa magka pandemya ay tumigil ito sa pagtuturo at lumuwas pa Cebu para maghanap ng trabaho, ngunit hanggang ngayon ay hindi pa siya natatawagan.
Bagamat binata, dahil ulila na sa magulang ang pamilya ni Clairesean, bilang kuya siya na ang tumatayong magulang sa kaniyang pamilyadong kapatid na kapos din sa buhay.
Kaya sa kabila ng kakulangan sa pinansyal at maitutulong sa pamilya ay nagbakasakali ang dating guro na mag-comment sa Facebook page ng programa at laking tuwa nito ng siya’y matugunan na.
“Salamat po unang-una sa Panginoon sa ibinigay niya saakin, yung prayers ko na-granted na talaga at ginawa niyang instrumento ang MCGI na bukas ang loob na tumutulong sa kapuwa tao na katulad ko na ngayon ay wala pang mapagkakakitaan po.” ani Teacher Clairesean Paul Facultad.
Samantala, pinaplano ni teacher Clairesean na palakihin ang naipagkaloob sa kaniyang tindahan para mas makatulong at mabigyan ng kapital ang pamilyang naiwan niya sa Negros.
(Marc Aubrey Gaad | La Verdad Correspondent)
Tags: Serbisyong Bayanihan
