Binisita ni Vice Presidente Leni Robredo noong ang bayan ng Lambunao, Iloilo upang ilunsad ang ilang proyektong nakapaloob sa kanyang “Angat Buhay” program.
Kabilang na dito ang champion farmer program kung saan sasailalim sa anim na buwang training sa mentoring at skills application program ang mga magsasaka upang mahasa ang kanilang mga kakayahan.
Hanggang 200 magsasaka ang target na mapasailalim sa program ngayong taon.
Samantala, kasama ring inilunsad sa lambunao ang isang feeding program para sa stunted children o mga batang kulang sa laki at nutrisyon gayundin at ang pagpapagawa ng play gardens sa bawat barangay.
Katuwang ang Negrense Volunteers for Change Foundation, layunin ng feeding program na mabigyan ng sapat na nutrisyon ang mahigit sa 700 na malnourished na sanggol at mga bata sa loob ng dalawang buwan.
Ang play garden naman ay kombinasyon ng playground at garden na magsisilbing recreational at learning area para mga bata at komunidad.
Ang bayan ng Lambunao ay isa lamang sa 50 pilot municipalities sa bansa na napili para sa Anti-Poverty Program ng OVP.
Inihayag naman ng OVP na madaragdagan pa ang mag benepisyaryo ng programa dahil may second batch pa ito sa Oktubre.
(Vincent Arboleda / UNTV Correspondent)
Tags: Iloilo, inilunsad sa Lambunao, Mga programa ng OVP kontra kahirapan
Isa sa mga sinalanta ng Bagyong Yolanda noong 2013 ang hilagang bahagi ng Iloilo. Kabilang dito ang isla ng Maliog-liog sa bayan ng Concepcion kung saan nasira ang mga bahay at paaralan.
Kaya naman nang magkaroon ng pabahay ang National Housing Authority (NHA) sa main land, agad na nagsilikas doon ang apektadong pamilya. Ngunit dahil dito ay bumaba ang bilang ng mga estudyante.
Kung problema sa ibang paaralan ang siksikan ng mga mag-aaral sa classroom, sa Maliog-liog Elementary School naman ay maluwag ang mga silid-aralan.
Nasa tatlumpu’t siyam na lamang ang mga estudyante mula grade one hanggang grade six kaya bakante ang ibang classroom.
Ayon sa Department of Education (DepEd), posibleng ipasara na ang naturang paaralan kapag tuluyan bababa o wala nang enrolees. Ililipat din sa ibang lugar ang mga guro.
Sa ngayon nagpapatupad ng multigrade classes ang DepEd sa walong paaralan sa bayan na kaunti ang mga estudyante. Sa isang kuwarto dalawa o tatlong grade level ang tinuturuan ng isang guro.
Si Danthea Marie Gabayeron ay isa sa teacher na pinagsasabay ang klase sa iisang classroom.
Bagaman dumaan siya sa multigracde classes training, mahirap pa rin aniya i-handle ang lahat ng mga bata lalo’t critical age learner ang kanyang mga tinuturuan. Gabi palang ay inihahanda na niya ang tatlong lesson plan na gagamitin kinabukasan.
Ayon pa kay Danthea upang maturuan niya ang lahat ng mga bata binibigyan muna niya ng set work ang dalawang grade level upang makapaglecture sa isa.
Challenge din kung paano matututo ang mga bata dahil kulang sa mga visual aids at school materials.
Bagaman mahirap ang kaniyang kalagayan, natutunan nitong mahalin ang trabaho upang makapagturo sa mga bata.
( Lalaine Moreno / UNTV Correspondent )
Tags: DepEd, elementary school, Iloilo
Nangako si Special Assistant to the President Christopher Bong Go na gagawin ang lahat upang mabigyan ng hustisya ang pagkamatay ni Angelo Claveria.
Si Claveria ang overseas Filipino workers (OFW) na nakita sa isang septic tank sa South Korea.
Sa kanyang pagbisita sa labi ni Claveria sa Cabatuan, Iloilo kahapon, sinabi nito na nakatakdang bumyahe sa South Korea si Pangulong Duterte sa June 3 at isa sa pag-uusapan dito ang kaso ng OFW.
Nagkaloob din si Go ng 220,000 piso sa pamilya Claveria mula sa Overseas Workers Welfare Administration (OWWA) at 20,000 piso naman mula sa kanyang opisina.
Nagpapasalamat naman ang pamiya Claveria sa mabilis na pagpapauwi ng bangkay ni Angelo.
Tags: Iloilo, OFW, SAP Bong Go
Tinanghal na ASOP April monthly finals winner kagabi ang awiting “Salamat Panginoon” na likha nina Elmar Jan Bolano at Rex Torremoro mula sa Iloilo.
Ang 22-year old amateur composers ang pinakabata sa anim na grand finalists na nakapasok na ngayong taon.
Dahil sa pagkapanalo sa unang pagsali pa lang sa kumpetisyon, mas na-inspire anila silang magkaibigan na ipagpatuloy pa ang pagsulat ng papuring awit sa Panginoon.
( Leslie Longboen / UNTV Correspondent )
Tags: ASOP Year 7, Iloilo, Monthly Finals
