Hindi katanggap-tanggap para sa ilang grupo ng mga manggagawa ang alok na kompromiso ni Pangulong Rodrigo Duterte upang maresolba ang isyu ng kontraktwalisasyon sa bansa.
Matatandaang noong Lunes, sa inagurasyon ng isang shooting range sa Davao City, sinabi ng pangulo na hindi niya maaring pilitin ang mga negosyante na tapusin ang kontraktwalisasyon.
Bagkus aniya ay dapat na magkaroon na lamang ng kompromiso sa pagitan ng magkabilang panig.
Para sa Bukluran ng Manggagawang Pilipino o BMP, maliwanag na pagtalikod ito ng pangulo sa pangako nito noong campaign period na wawakasan ang kontraktwalisasyon.
Malamang anila na ang lalagdaan ng pangulo na executive order sa ika-15 ng Marso ay katulad lamang ng Department Order 174 na inilabas ng Department of Labor and Employment noong nakaraang taon.
Dahil dito, malawakang kilos-protesta anila sa iba’t-ibang lugar sa bansa ang kanilang isasagawa bilang pagpapakita ng pagtutol sa hiling na kompromiso ni Pangulong Duterte.
Araw-araw umano nila itong isasagawa hanggang mawakasan ang kontraktwalisasyon. Hindi naman tinukoy ng grupo kung kailan magsisimula ang kanilang mass protest action.
Wala pa namang sagot ang Malacañang sa isyu.
( Rajel Adora / UNTV Correspondent )
Tags: excutive order, kilos-protesta, Labor groups
Manila, Philippines – Nakatakdang magsagawa ng kilos protesta ang Bagong Alyansang Makabayan o Bayan sa Biyernes, Mayo 17 upang kwestyunin ang resulta ng 2019 midterm elections.
Tinuligsa ni Renato Reyes, secretary-general ng Grupong Bayan ang naging pahayag kahapon ni Presidential Spokesperson Salvador Panelo na dahil sa “Duterte magic” kaya karamihan ng mga ininderso ni Pangulong Rodrigo Duterte sa pagka-senador ay tumungtong sa top 12 ng partial, unofficial results ng halalan. Dahil dito, hindi aniya maituturing na katiwa-tiwala ang election result.
Ayon kay Reyes, kabilang sa tinawag na “Duterte magic” ang umano’y paggamit ng government resources upang paboran ang administration bets, pagtarget at panghaharass umano ng armed forces of the Philippines at Philippine National Police sa mga oposisyon at progresibong grupo, pag-kontrol umano’y sa comelec at dayaan sa automated polls, martial law sa Mindanao at government-sponsored disinformation.
Suportado ni Reyes ang naging pahayag ni Neri Colmenares, na isa sa mga senatorial aspirant at dating bayan muna representative na di niya tatanggapin ang pagkatalo sa eleksyon dahil sa umano’y bulok na sistema ng halalan at tuloy aniya ang kaniyang laban.
Inaasahan naman na ng malacañang ang ganitong reaksyon ng left-leaning party-list groups. Ayon kay Presidential Spokesperson Salvador Panelo, ang pagkatalo nila sa eleksyon ay patunay na di naniniwala ang taumbayan sa kanilang mga adbokasiya.
Wala rin aniyang patunay ang mga alegasyon ni Reyes na kontrolado ng administrasyon ang comelec gayong marami sa mga commissioner nito ay appointees ng administrasyong Aquino.
Umaasa naman ang palasyo na matatanggap ng mga tulad ni Reyes ang kanilang pagkatalo. Bukod dito, nanawagan din ito sa oposisyon, mga kritiko at naninira sa administrasyon na igalang ang desisyon ng mayorya at makipagtulungan na lamang sa ikaaangat ng pamumuhay ng mga Pilipino.
(Rosalie Coz | Untv News)
Tags: 2019 midterm elections, Bagong Alyansang Makabayan, kilos-protesta
Hindi na mapipigilan ang protest caravan na isasagawa ng mga operator at tsuper ng jeep sa mga tanggapan ng Land Transportation Office Franchising and Regulatory Board (LTFRB) sa iba’t-ibang lugar sa bansa ngayong araw.
Pangungunahan ang kilos-protesta ng grupong Pinagkaisahang Samahan ng mga Tsuper at Operator Nationwide (PISTON) at ng “No to Jeepney Phase Out Coalition”.
Layon ng grupo na patuloy na tutulan ang jeepney phase out na isinusulong ng pamahalaan. Hiling din ng mga jeepney operators sa LTFRB ang pagsasauli ng siningil na taripa ng ahensya.
Mula sa harapan ng opisina ng National Housing Authority (NHA) sa Eliptical Road ay tutulak ang protest caravan sa haparan ng main office ng LTFRB sa East Avenue.
Kasabay nito ay magsasagawa rin ng kilos-protesta sa harapan ng tanggapan ng Department of Transportation (DOTr) sa Baguio City, maging sa ibang regional offices ng LTFRB sa San Fernando Pampanga, Lipa City, Legaspi City, Cebu City at Davao City.
Nakatakdang magtipon-tipon ang ilang mga operator at tsuper ng jeep sa Eliptical Road sa Quezon City simula alas otso ngayong umaga.
Bagaman walang abisong road closure sa mga nabanggit na lugar ay asahan ang mabigat na trapiko.
Pinapayuhan ang mga motorista na dumaan sa alternatibong daan upang makaiwas sa aberya dulot ng trapiko bunsod ng mga naturang kilos-protesta.
( Asher Cadapan Jr. / UNTV Correspondent )
Tags: jeepney phase out, kilos-protesta, LTFRB
Ilang programa ang nakatakda ngayong araw sa iba’t-ibang lugar sa bansa bilang paggunita sa kaarawan ng isa sa ating mga bayani na si Andres Bonifacio.
Kabilang dito ang isinasagawang taunang programa sa Bonifacio Cartilla na nasa Taft Avenue sa Manila City Hall ngayong umaga.
Magkakaroon din ng wreath laying sa Bonifacio Monument Circle sa Caloocan City simula bandang alas dose ng tanghali kaugnay pa rin sa 155th Birth Anniversary ni Andres Bonifacio.
Ngunit kasabay naman nito ay ilang grupo ang magsasagawa ng kilos-protesta. Maagang gumising ang ilang mga militanteng nagkampo sa harapan ng Mendiola Peace Arch sa kanto ng Recto Avenue at Kalye Legarda sa Sampaloc, Maynila para sa mga aktibidad na isasagawa ng grupo.
Martes ng umaga ay nagsimula nang magkampo ang mga militanteng grupo na nagmula pa sa Southern Mindanao Region, partikular sa Compostella Valley.
Hinain ng mga ito sa pangunguna ng grupong Kilusang Mayo Uno (KMU) ang mga isyu kaugnay sa regularisasyon ng mga manggagawa at ang epekto ng martial law sa mga komunidad.
Ito ay dahil napagbibintangan daw ang ilan sa mga manggagawa na frontliner ng Communist Party of the Philippines-New People’s Army (CPP-NPA) at maging ng grupo ng KMU.
Nakatakdang magsagawa ng programa ang mga militante dito sa Mendiola bandang alas syete ng umaga. Pagkatapos ay magmamartsa ang mga ito papunta sa U.S. Embassy bandang alas onse ng umaga upang magsagawa ng programa.
Inaasahan ang daan-daang militanteng susuporta at sasama sa martsa at mga programa ngayong araw.
Asahan ang mabigat na trapiko sa mga nasabing lugar at pinapayuhan ang mga motorista na dumaan sa mga alternatibong ruta.
( Asher Cadapan Jr. / UNTV Correspondent )
