Magsasagawa ng isang forum ang Department of National Defense at Department of Foreign Affairs na dadaluhan ng ilang eksperto at non-government representatives ng Pilipinas, Japan, The United States of America at Australia kung saan tatalakayin ang epekto o impact ng Enhanced Defense Cooperation Agreement o EDCA sa seguridad ng Asia Pacific Region.
Idaraos ito sa Camp Aguinaldo ngayong araw upang makapagbigay ng updates ang DND at DFA sa isinusulong na EDCA.
Matatandaang nagkaroon na ng mga bilateral security dialogue sa pagitan ng Pilipinas at Amerika sa Washington, DC kaugnay ng EDCA.
Limang base militar din sa bansa ang unang napagkasunduang paghimpilan pansamantala ng mga tropa ng amerikanong sundalo at mga kagamitan sa ilalim ng EDCA.
(UNTV RADIO)
Tags: EDCA
Pinal na ang desisyon ng Supreme Court sa kaso ng Enhanced Defense Cooperation Agreement sa pagitan ng Pilipinas at Estados Unidos.
Sa botong 9-4, pinagtibay ng Korte Suprema ang kanilang naunang desisyon na nagdedeklarang hindi labag sa saligang-batas ang EDCA.
Ayon pa sa korte, walang iprenesentang bagong argumento ang mga petitioner upang baguhin nila ang desisyon.
Sinagot din ng korte ang argumento ng mga petitioner na hindi makabubuti ang EDCA sa interes ng Pilipinas.
Kabilang sa mga nagpetisyon laban sa EDCA sina dating Senador Rene Saguisag at Wigberto Tanada na bumuto upang mapaalis sa bansa ang mga base-militar ng Amerikano noong 1991.
Ayon naman sa Malakanyang, makatutulong ang desisyon ng korte sa modernisasyon ng sandatahang lakas at sa kakayahan nitong sumaklolo sa panahon ng kalamidad.
Sa kanilang desisyon nitong Enero, sinabi ng korte na isang executive agreement lamang ang edca upang ipatupad ang mga naunang kasunduang militar ng Pilipinas at Estados Unidos.
Hindi anila ito isang treaty na kailangang ratipikahan muna ng senado bago maipatupad gaya ng itinatakda ng section 25, article 18 ng 1987 constitution.
Ayon pa sa Korte Suprema, may kapangyarihan naman ang pangulo ng bansa na pumasok sa ganitong kasunduan.
Dati na rin pinapayagan ang pagpasok ng mga sundalong Amerikano sa bansa sa ilalim ng visiting forces agreement.
(Roderic Mendoza/UNTV Radio)
Tags: EDCA
Ipinahayag ni Defense Secretary Voltaire Gazmin na muling magsasagawa ng bilateral security dialogue sa Washington ang Pilipinas at Amerika tungkol sa proseso ng pagpapatupad ng Enhanced Defense Cooperation Agreement ng dalawang bansa.
Kakatawanin nina Defense Secretary Gazmin at bagong Talagang Foreign Affairs Secretary Rene Almendras ang Pilipinas sa EDCA dialogue.
Ang kanilang counterpart naman ay sina US Defense Secretary Ashton Carter at US Secretary Of State John Kerry.
Ayon kay Gazmin, magandang pagkakataon ang pag-uusap na ito ng dalawang bansa.
Sa ngayon, wala pa ring pinal na napagkakasunduan kung saan-saang Philippine Military bases hihimpil ang mga tropa ng Amerikanong sundalo gayundin ang kanilang mga pasilidad bilang bahagi ng EDCA.
Samantala, sinabi rin ng DND na kasalukuyan pang pinag-uusapan ang pag-arkila ng Pilipinas sa Japan ng TC-90 training aircrafts.
Myerkules, binanggit ito ni Pangulong Benigno Aquino the third sa Philippine Airforce Change of Command Ceremony.
Sinabi ng Pangulo na tutulong ang TC-90 training aircrafts sa Philippine Navy sa pagpapatrolya sa teritoryo ng bansa partikular na sa West Philippine Sea.
Ayon kay Sec. Gazmin, kabilang ang mga aircraft na ito sa inalok ng Japan sa ilalim ng nilagdaang Philippines-Japan Agreement on the Transfer of Equipment and Technology.
Bahagi pa rin ito ng modernization ng Armed Forces of the Philippines na gagamitin sa pag-papatrolya sa West Philippine Sea.
(Rosalie Coz/UNTV NEWS)
Tags: Bilateral security dialogues, Defense Secretary Voltaire Gazmin, EDCA
Nagsagawa ng kilos protesta sa harap ng Supreme Court ang ilang grupo para kundenahin ang desisyon nito na pumapabor sa Enhanced Defense Cooperation Agreement o EDCA.
Ayon sa Kilusan Para sa Pambansang Demokrasya, isang paraan ang EDCA para magkaroon ng mas maraming US troops sa bansa at pag-prepreposition ng mga armas, at iba pang gamit pang giyera na layong pigilan ang China.
Paliwanag ng grupo, hindi totoong layon ng EDCA na maprotektahan ang seguridad at soberenya ng bansa. Sa halip anya, layon lang nito palakasin ang hangarin ng US kaugnay ng asia pacific pivot strategy.
Layon naman anya ng stratehiya na ito na kalabanin ang China, na isa umanong economic rival ng Amerika.
Ikinakabahala rin ng grupo ang umanoy posibilidad na sa pagdami ng US troops sa bansa ay dadami rin ang mga Pilipinong maaring maabuso at ang paglaganap din anya ang prostitusyon.
Isa pa anyang posibilidad ay ang pagiging dependent ng Pilpinas sa US at maari rin anyang malagay sa estado ang Pilipinas kung saan magiging kaaway na rin ito ng mga bansang kalaban ng Estados Unidos.
Nanawagan din ang grupo sa mga mambabatas na kontrahin ang desisyon ng Korte Suprema.
(Joms Malulan / UNTV Radio Reprter)
Tags: China, EDCA, Enhanced Defense Cooperation Agreement, Korte Suprema, Supreme Court, US troops
