Ilang araw na ang nakalipas mula nang idineklara ng Department of Agriculture (DA) na African Swine Fever (ASF) ang dahilan ng pagkamatay ng mga baboy sa ilang lugar sa Rizal at Bulacan. Pero paglilinaw ng Kagawaran, hindi pa ito maituturing na epidemya.
Pero paano nga ba maaaring kumalat ang virus na ito?
Bagaman eksklusibo lamang sa mga baboy ang sakit na ito, maaari pa ring maging carrier ng virus ang mga tao at mga kagamitan na na-expose sa kontaminadong lugar, maging ang mga sasakyan na nagdala sa mga apektadong baboy.
Sa report na isinumite ng Bureau of Animal industry sa World Organization of Animal Health (OIE) noong September 9, hindi pa rin aniya matukoy ang pinakapinagmulan ng naturang virus sa mga apektadong lugar sa bansa. Pero ang mga tinuturong dahilan ay swill feeding o pagpapakain ng kaning-baboy, iligal na paglilipat sa mga may sakit na baboy upang maibenta sa mas mababang halaga, at maging ang mga tao at sasakyan na pinaglagyan sa mga apektadong baboy.
Sa huling tala ng OIE, umabot na sa sampung libo ang mga namatay at pinatay na baboy sa buong mundo dahil sa ASF — at halos walong libo rito ay mula sa Pilipinas.
Ayon kay DA Spokesperson Noel Reyes, patuloy ang kanilang pagpapatupad ng 1-7-10 quarantine procedure sa lahat ng mga lugar na apektado ng ASF virus. Aniya, ang lahat ng kagamitan sa ground zero at ang mga lugar na apektado ng ASF virus ay dinidis-infect ng kanilang mga inspector.
Nakasuot din ng disposable protective gear din ang kanilang mga tauhan na ibinabaon umano sa lupa pagkatapos gamitin upang hindi maisama palabas ng lugar ang naturang virus.
Magtatatag na rin ng National Task Force upang mas mapaigting ang pagbabantay sa naturang virus.
Aprubado na ni Pangulong Rodrigo Duterte ang paggamit ng 78 million pesos na emergency fund ng DA para sa monitoring at quarantine operations ng ahensya upang mapigilan ang pagkalat ng naturang virus.
Pagtitiyak naman ng DA sa publiko, ligtas pa ring kainin ang mga produktong baboy na ibinibenta sa merkado.
(Harlene Delgado | UNTV News)
METRO MANILA – Nanawagan ang isang grupo ng mga hog raiser na lagyan o magkaroon ng Suggested Retail Price (SRP) sa karne ng baboy sa bansa.
Ayon sa Pork Producers Federation of the Philippines o Pro-Pork, mahal ang retail price ng karne ng baboy sa kasalukuyan.
Base sa price monitoring ng Department of Agriculture (DA), umaabot sa P340 ang kasim, habang nasa P400 ang pinakamataas na presyo ng liempo.
Ayon sa grupo, dapat ay hindi lalagpas sa P350 ang presyo ng karne ng baboy sa mga palengke.
Sa ngayon anila ay nasa P150 hanggang P180 lamang ang farmgate price o presyo ng buhay na baboy.
Pangamba ng grupo na baka maapektuhan ang lokal na produksyon dahil mawawalan na ng gana ang mga hog raiser lalo na’t apektado pa rin sila ng African Swine Fever (ASF).
Gaya ng pro-pork, may hinagpis din ang Samahang Industriya ng Agrikultura (SINAG) sa pagpapalawig ng mababang taripa sa karne ng baboy, bigas at mais.
Katwiran ng mga ito, hindi nararamdaman ng mga consumer at lugi pa ang gobyerno ng P20-B kada taon dahil sa mga inalis na buwis sa importasyon.
Ayon naman sa National Economic and Development Authority (NEDA), hindi biro ang pagbabantay kung maglalagay ng SRP sa karne ng baboy.
METRO MANILA – Umabot na sa P220 ang presyo ng kada kilo ng buhay na baboy ngayon mula sa dating P180 ayon sa Pork Producers Federation of the Philippine (PROPORK).
Pero dahil sa patuloy na pagkabawas ng populasyon ng baboy dahil sa African Swine Fever (ASF) ay kalahati na anila ang nababawas sa mga inahin mula noong 2019 na nagkaroon ng outbreak ng sakit.
Ayon sa Propork, posible umanong nangalahati na lamang ang bilang ng mga inahing baboy ngayon o nasa 600,000.
Base sa datos ng Bureau of Animal Industry (BAI), nitong March 9 ay kumalat na sa 16 na rehiyon ang SF at 9 pa dito ang may aktibong.
Sa mga palenge sa metro manila, lagpas na sa 400 ang presyo ng kada kilo ng karne ng baboy.
Base sa datos na mula sa National Livestock Program (NLP), simula sa Abril ay kukulangin na ng 11 araw ang supply ng pork sa bansa.
Pero pagdating ng Hunyo ay aabot na sa 39 na araw ang kakulangan.
Paglilinaw naman ni Agriculture Deputy Spokesperson Asec Rex Estoperez, pagtataya lamang ang datos na inilabas ng NLP. Isasapinal pa nila aniya ito sa katapusan ng Marso.
Kailangan din aniyang makipagtulungan ang publiko at mga lokal na pamahalaan para masugpo ang ASF.
(Rey Pelayo | UNTV News)
Umabot sa 100 libong metriko tonelada ng sibuyas ang nasayang noong 2022 base sa datos ng Department of Agriculture. Katumbas na ito ng 35% ng kabuoang ani sa buong taon.
Ayon sa D.A., ito’y dahil sa hindi maayos na paghawak sa produkto at kakulangan din ng cold storages o imbakan.
“Doon po sa farm mismo, doon palang po pag ‘di maganda ang panahon meron na pong loss doon. Kung hindi po maganda ang pagka handle halimbawa binabalagbag po ‘yung mga sibuyas meron din po yung loss,” ani Diego Roxas, Spokesperson, BPI.
Ilulunsad naman ng D.A. ang Optimization and Resiliency in the Onion Industry Network (ORION) program.
Kabilang sa mga stratehiya na nakapaloob sa programa ay pagbibigay ng easy access credit loans sa mga magsasaka at iba pang onion stakeholders.
Plano rin ng kagawaran na isulong ang pagbuo ng national information database upang masiguro ang updated at iba pang importanteng datos sa produksyon at pagbebenta ng sibuyas.
Ayon sa BPI, ngayong 2023 ay naglaan ang pamahalaan ng 240 million pesos para sa pagtatayo ng cold storage sa mga lugar na itinatanim ito.
Isa sa pinakamaraming nagtatanim ng sibuyas ay sa Occidental Mindoro. Nangangailangan din sila ng dagdag na cold storages para maiimbak ang kanilang mga aanihing sibuyas.
Ayon sa acting provincial agriculturist na si Alrizza Zubiri, ang kanilang lalawigan na kayang mag supply ng halos kalahati ng pangangailangan ng buong Pilipinas sa isang taon.
Umaabot sa mahigit sa 90 thousand metric tons ang kanilang produksyon ng sibuyas.
“As per computation po, around 40% ay kaya nang i-supply ng Occidental Mindoro. That is for more than 7,000 hectares area of production,” pahayag ni Alrizza Zubiri, Acting Provincial Agriculturist, Occidental Mindoro.
Kung maiiimbak aniya ng maayos ang mga sibuyas ay nasa P200 lamang kada kilo ang pinakamataas na maaaring maging presyo nito sa panahong walang tanim.
“Sana i-prioritize muna itong nasa cold storages outside our province ay ma-prioritize muna ‘yung mga local producers na makapaglagay ng mga sibuyas sa kanilang cold storages,” dagdag ni Alrizza Zubiri, Acting Provincial Agriculturist, Occidental Mindoro.
Rey Pelayo | UNTV News
