Masuwerteng gasgas lang ang tinamo ng mga magkakabarkada matapos maaksidente ang sinasakyan nilang motorsiklo sa Ayala Highway, Barangay Balintawak sa Lipa, Batangas kagabi.
Ayon sa mga biktima, galing silang Batangas City at patungo sana ng Malvar nang biglang lumabas sa isang kanto ng Ayala Highway ang isa pang motorsiklo na tinamaan nila sa likurang bahagi dahilan upang mawalan sila ng kontrol sa manibela.
Agad namang nilapatan ng UNTV News and Rescue Team ang mga gasgas sa tuhod at binti ng mga biktima na sina Romel de Asis, Juan Carlo Maldorado at Tristan Samonte na tumanggi nang magpadala sa ospital.
Samantala, nagkasundo naman ang dalawang panig na magkaayos na lang at hindi na magreklamo sa pulisya.
Inilikas na ng lokal na pamahalaan ng Tanza, Cavite ang 262 pamilya na nakatira sa tabing dagat.
Ito’y bunsod ng paalala ng pagasa na huling hahagupit si bagyong rolly sa lugar ng Batangas at Cavite habang papalabas ito ng bansa.
Kasalukuyang nasa evacuation centers ang mga pamilyang inilikas ayon kay Mayor Yuri Pacumio.
Nagsagawa naman ng paunang paglikas ang Philippine Red Cross (PRC) Batangas Chapter Emergency Response Unit at Batangas City Disaster Risk Reduction and Management Office bilang paghahanda sa paghagupit ni bagyong Rolly ngayong gabi (Nov. 1).
Samantala, handang handa naman ang Bacoor Disaster Risk Reduction and Management team para sa mga posibleng search and rescue operations sa kanilang lungsod.
(Beth Pilares | La Verdad Correspondent)
Tags: Bagyong Rolly, Batangas
Inilikas ng City Veterinary Office ang 23 baka, 3 kabayo at ilang mga alagang aso katuwang ang Carabao Center of the Philippines mula sa Barangay Balele, Gonzales at Wawa kahapon (Jan. 21, 2020).
Ang mga hayop ay dinala at pansamantala inilagak sa auction market slaughter house sa Barangay 4, Tanauan City.
Dito maaring bisitahin at pakainin ng mga may-ari ang kanilang mga alagang hayop habang patuloy ang pag aalburoto ng Bulkang Taal.
Bukod sa paglikas sa mga hayop, pinapakain at binibigyan ng bitamina ng grupo ang mga hayop na kanilang nakikita sa kalsada gaya ng mga aso.
“Ang kautusan ng atin Mayora i-evacuate lahat ng animal but tingin ko hindi lahat ng farmer ay willing mag-evacuate since logistics na lamang at pahirapan,” ani Dr. Bryan Pamplona, Chief Animal Division, Tanauan.
Pero aminado ang lokal na pamahalaan ng Tanauan na hindi nila kayang i-relocate ang lahat ng hayop sa lugar dahil sa dami nito.
“Pahirapang itransport ‘yun, nakakaranas kami tatranport kami ng baka inaabot kami ng kalahating araw para sa 20 heads na baka,” ayon kay Dr. Aries Garcia, City Veterinary.
Apat na araw ng iniikot ng City Veterinary office ang bayan ng Tanauan at itutuloy ito para mailikas ang mga alagang hayop ng mga residente.
Samantala ibinebenta na ng 25 pesos per kilo ang mga baboy sa Tanauan dahil hindi na alam ng mga hog raiser kung paano pa nila maalagaan ang mga ito.
Nasa dalawangpung mga alagang baboy ang ibinenta ng isang kooperatiba sa munisipyo ng Tanauan para iluto nalang at ipakain nalang sa mga evacuee.
Tiniyak nanaman ng City Veterinaty Office na ligtas itong kainin.
Ayon sa ilang hog raiser, mabuti umanong mapakinabangan ito ng mga residente kaysa mamatay nalang sa gutom ang mga ito kapag naiwan sa mga lugar na isinailalim sa total lockdown ng pamahalaan.
(Mirasol Abogadil)
Tags: Batangas, hayop, Taal, Taal eruption 2020, Tanuan Batangas
Long-term o pangmatagalan ang magiging epekto ng pagsabog ng Bulkang Taal. Pangunahin na ang idinudulot na pinsala ng ashfall sa mga pananim at hayop o biodiversity.
Ayon sa Bureau of Plant Industry (BPI), dahil sa pagkamatay ng mga insekto wala nang pollinators ang mga halaman. Ang mga insekto ay nasisilbing pollinators na kailangan upang makapag-reproduce ang isang halaman.
Halimbawa aniya rito ang malalawak na plantasyon ng kape o pinya sa mga lugar na apektado ng volcanic ash.
“Basta walang pollinator na nagpo-pollinate walang mabubuong bunga so kung walang bees walang kape, walang prutas or others wala,” ani Wilma Cuaterno, Chief, Crop Management Division, Bureau of Plant Industry.
Dahil din sa pagkamatay ng mga insekto mababawasan din ang mga decomposers na tumutulong upang matunaw ang mga nalagalag nadahon ng halaman o mga hayop na namatay.
Kapag nawala ang ilang species ng insekto, napuputol ang tinatawag na food chain at magkaroon ng enviromental imbalance.
Binigyang diin ng Bureau of Plant Industry, malaking papel ang ginagampanan ng mga insekto sa buhay ng tao lalo na ang mga tinatawag na friendly insects.
Dagdag pa ng ahensya, kapag tuloy-tuloy na naisturbo ang mga insekto sa paligid aalis na ang mga ito.
“Maghahanap sila ng pagkain para sa kanila magma-migrate talaga sila kasi kung wala nang kakaining halaman, maghahanap sila ng mga halaman para kainin para mabuhay sila,” ayon naman kay Nestor Rivera, Entomologist, Assistant Chief, Crop Management Division, Bureau of Plant Industry.
Maari naman aniyang maglagay sila ng mga insekto sa mga apektadong lugar sa pamamagitan ng kanilang mga inaalagang species ng insekto, pero, depende pa ito sa rekomendasyon o mga pag-aaral sa pangunguna ng Department of Agriculture.
(Dante Amento)
Tags: Agriculture Secretary Manny Piñol, Batangas, Biodiversity, Taal
