Hindi inayunan ng Supreme Court na tumatayong Presidential Electoral Tribunal ang hiling ni Vice President Leni Robredo na huwag muna siyang pagbayarin ng deposito para sa kanyang counter-protest.
Sa kanilang resolusyon ngayong araw, binigyan ng PET ng limang araw si Robredo upang bayaran ang 8-million pesos na paunang deposito sa kabuuang 15-million pesos na bayad upang madala sa tribunal ang mga kinokontestang balota.
Hindi naman pinagbigyan ng tribunal ang hiling ni dating senador Bongbong Marcos na i-dismiss na ang counter-protest ni Robredo dahil sa kabiguan nitong magbayad ng cash deposit.
Ayon sa PET, magpapasaya sila dito kapag nakatupad na si robredo sa kanilang utos na magbayad ng deposito.
Tags: P8 million, PET, VP Leni Robredo
Ipinahayag ni Presidential Spokesperson at Chief Presidential Legal Counsel Salvador Panelo na gusto lang ni Vice President Leni Robredo ng spotlight nang magsagawa ito ng press briefing kahapon para sana ianunsyo ang kaniyang sinasabing rebelasyon at rekomendasyon sa anti-drug war ng gobyerno.
Gayunman, ipinagpaliban muna ito ng Bise Presidente dahil sa nangyaring malakas na lindol sa iba’t ibang bahagi ng Mindanao.
Kahapon, kinwestyon ni Secretary Panelo ang pagkabinbin sa sinasabing rebelasyon at bumwelta naman ang kampo ng Pangalawang Pangulo at sinabing walang malasakit ang palace official sa taumbayan dahil pinipili pa aniyang malaman nito ang ulat at rekomendasyon ng Bise Presidente pagkatapos ng nangyaring lindol noong Linggo ng hapon.
Ayon naman kay Secretary Panelo, sa ginawang muling pagpapaliban ni VP Robredo, gusto lang nito ng spotlight at umaasa umanong makukuha ang atensyon ng taumbayan.
Binigyang-diin din ng opisyal, na kahit magsalita ang pangalawang Pangulo laban sa anti-drug war, hindi titigil ang pamahalaan sa pagtulong nito sa mga naapektuhan ng lindol.
(Rosalie Coz)
Tags: drug war, Panelo, Presidential Spokesperson Salvador Panelo, VP Leni Robredo
METRO MANILA – Nakahanda na sana ang 40 pahinang report ni Vice President Leni Robredo upang ilahad sa publiko ang kaniyang obserbasyon at rekomendasyon hinggil sa anti-illegal drug campaign ng pamahalaan.
Ngunit dahil sa malakas na lindol sa Mindanao, ipinagpaliban na muna ito ng Pangalawang Pangulo.
“Parang napaka-mali sa timing na asikasuhin natin iyong report sa Inter-Agency Committee against Illegal Drugs (ICAD), na mayroon pa namang panahon para pag-usapan ito. Tingin namin mas mabuti na ang pagtuunan ng pansin ngayon ng lahat, kung paano tayo makakatulong doon sa mga victims saka sa mga kababayan natin.” ani Vice President Leni Robredo.
Ayon kay VP Robredo, pupwede naman aniyang mailahad ang naturang ulat kahit anong panahon ngunit mas maigi mabigyan muna ng prayoridad na matulungan ang mga nasalanta ng lindol sa Davao.
Posible aniyang bago mag December 25 o sa susunod na taon na maisasapubliko ang kaniyang ulat.
Nananawagan din ito sa publiko na may kakayahan tumulong upang mapunan ang mga pangangailangan ng mga naapektuhan ng lindol.
“Ang pinaka-kailangan daw nila as of this time, tents dahil sunud-sunod na iyong aftershocks at iyong mga tao traumatized na grabe. Iyong mga tents saka drinking water. Iyong sabi niya kanina, nawalan na ng kuryente, nawalan na ng tubig.”ani Vice President Leni Robredo.
Kailangan din aniya ng generator sa mga lugar na nawalan na ng kuryente bunsod ng lindol.
Binatikos naman ng Malacañang ang muling pagkabinbin ng sinasabing rebelasyon ni VP Robredo tungkol sa mga natuklasan nito matapos maupo bilang co-chair ng ICAD.
Ayon kay Presidential Spokesperson And Chief Presidential Legal Counsel Salvador Panelo, dapat ibinunyag na ito ni Robredo sa mismong oras na nadiskubre niya ang sinasabing iregularidad.
“What’s taking her so long? As the president said, ‘bring it on, whatever you want to come out with.’ mahirap kasi pag wala ka naman talagang ilalabas at nag-iisip ka pa kung ano ang ilalabas mo, eh talagang matagal”ani Vice President Leni Robredo.
(Vincent Arboleda | UNTV News)
Tags: VP Leni Robredo
MALACAÑANG, Philippines – Duda ang Malacañang sa umano’y mga nadiskubre at isisiwalat ni Vice President Leni Robredo hinggil sa anti-drug campaign ng pamahalaan.
Ayon kay Presidential Spokesperson at Chief Presidential Legal Counsel Salvador Panelo, bakit hindi agarang isiniwalat ito ng Bise Presidente nang siya ay nasa pwesto pa ng pagiging drug czar.
Una nang sinabi ni VP Robredo na isisiwalat niya sa publiko ang mga nadiskubre niya at mga rekomendasyon sa anti-drug war ng pamahalaan matapos itong alisin sa pwesto ni Pangulong Duterte bilang drug czar.
“Oh ‘di ba, kung meron kang natuklasang hindi maganda ‘di ba dapat inilalabas mo na eh. Kung gagawa ka pa lang ng ‘di umanong natuklasan mo, it will really take time to craft. Ang tagal-tagal naman masyado,” ani Sec. Salvador Panelo, Presidential Spokesperson and Chief Presidential Legal Counsel.
(Rosalie Coz | UNTV News)
Tags: anti-drug, Robredo, Salavador Panelo, VP Leni Robredo
