Nakabinbin pa rin sa pagtalakay ng Senate Committee on Ways and Means ang panukalang babaan ang value added tax na ipinapataw sa mga produkto o serbisyo maging sa mga inaangkat sa ibang bansa.
Batay sa panukala ni Senator Risa Hontiveros, dapat ibaba ang tax rate sa 10 percent mula sa 12 percent at posible pa itong maibaba pa hanggang sa 8 percent.
Naniniwala ang senador na napapanahon ang pagpapasa nito upang magsilbing pambalanse sa tumataas na inflation rate.
Noong Mayo, pumalo na sa 4.6 percent ang inflation rate ng bansa.
Itinuturo ng mga kritiko ng administrasyon ang implementasyon ng Tax Reform law na dahilan kaya nagtataasan ang presyo ng mga pangunahing bilihin.
Una na ring sinabi ng Department of Finance na bukas ito sa pagbawas sa VAT rate ngunit kinakailangan munang tanggalin ang mga VAT exemptions.
Para naman kay Senator Juan Miguel Zubiri, sa halip na pakialaman pa ang sistema ng pagbubuwis, dapat makaisip rin ng ibang paraan ang pamahalaan para sa nga apektadong sektor sa pagtaas ng inflation rate.
( Nel Maribojoc / UNTV Correspondent )
METRO MANILA – Inanunsyo ng Bureau of Internal Revenue (BIR) ang 20 karagdagang mga gamot na exempted sa Value Added Tax (VAT).
Partikular na rito ang mga gamot na para sa cancer, hypertension at mental illness.
Ayon kay BIR Commissioner Romeo D. Lumagui Jr., ang mga nabanggit na gamot ay kasama sa VAT-exempt drugs and medicines batay sa section 109 (AA) ng National Internal Revenue Code of 1997, na binago ng Train law at Create act.
Inihayag ng BIR na asahan ang patuloy na pagtulong ng ahensya para maibsan ang gastos ng mga Pilipino, lalo na ang mga mahihirap, para sa kanilang mga kinakailangang gamot.
METRO MANILA – Kinumpirma ng Bureau of Internal Revenue na nadagdagan pa ang mga gamot na hindi na papatawan ng Value Added Tax (VAT) exemption.
Kabilang sa mga naturang gamot ay ang para sa cancer, hypertension, kidney disease at diabetes.
Nasa 59 na iba’t-ibang klase ng gamot ang nadagdag sa listahan ng hindi bubuwisan.
Ang naturang hakbang ay alinsunod sa ipinasang “updated” list ng Food and Drug Administration (FDA).
METRO MANILA, Philippines – Malinaw umano na panibagong panggigipit sa oposisyon ang ginawang pagbaliktad ni Peter Joemel Advincula alyas “Bikoy.” Kung saan isinasangkot na ang ilang Senador at Liberal Party na siya umanong nasa likod ng paggawa ng Anti-Duterte videos na pinamagatang “Ang Totoong Narcolist.”
Pinabulaanan ni Senator Antonio Trillanes IV ang mga naging alegasyon na ito ni Bikoy. Maaari aniya na panibagong pakana lamang ito ng administrasyon upang gipitin ang oposisyon.
Ayon pa sa Senador, kumukunsulta na siya sa kaniyang mga abogado kung ano ang maaaring isampang reklamo laban kay Advincula.
Para naman kay Senator Risa Hontiveros, panibagong tangka ito ng administrasyon upang guluhin ang publiko. Produkto aniya ito ng malikot na imahinasyon ng Malakanyang.
Ayon naman kay Liberal Party President Senator Francis Pangilinan, walang ugnayan ang partido kay Bikoy at pawang kasinungalingan lamang ang lahat ng mga paratang na nito.
Maging si Senate Minority Leader Franklin Drilon ay nagsabing walang sabwatan ang LP at si alyas Bikoy upang pabagsakin ang gobyerno kasabay ng panawagan nito sa PNP para sa malalimang imbestigasyon sa isyu.
Ipapaubaya naman ni Senator Panfilo Lacson sa mga otoridad ng imbestigasyon sa panibagong alegasyon ni Advincula. Ayon sa senador, bilang dating Law Enforcement Officer na may karanasan na sa pagkalap ng Intelligence, kailangang magpakita si alyas Bikoy ng mga totoong ebidensya na higit sa kaniyang ikinukuwento.
Si Alyas Bikoy aniya ay may seryosong problema sa kredibilidad na kailangan aniya niyang malutas.
Ayon sa dating PNP Chief, kinakailangan niyang maglabas ng matibay na ebidensya tungkol sa umanoy nangyaring pagpupulong at regular na komunikasyon sa mga taong ngayon ay inaakusahan niya.
Matatandaan na hindi na tinuloy ng komite ni Senator Lacson ang imbestigasyon sa mga unang naging akusasyon ni Alyas Bikoy.
Matapos ibulgar ni Senate President Vicente Sotto III noong ika-8 ng Mayo na dati nang lumapit sa kaniyang opisina si Advincula noong 2016 na isinasangkot sa iligal na droga sina dating Pangulong Benigno Aquino III at ilang miyembro ng gabinete nito. Kung saan naging kaduda duda na sa senador ang nagiging kilos ni Advincula.
“On my part I did due diligence kaya noong 2016, hindi ko pinatulan ito, medyo iniba lang niya kaunti ang script , iniba ang personalidad, ito naman ngayon, so perhaps the best thing again to learn from this lesson, perhaps a good lesson to ibp and religious sector na huwag basta basta ika nga e patol ng patol sa sa mga ito,” pahayag ni Senate President Sotto.
(Nel Maribojoc | UNTV News)
Tags: Bikoy, Sen. Antonio Trillanes IV, Senator Risa Hontiveros
