Pinag-iisipan na ng VACC na ipa-inhibit si Chief Justice Maria Lourdes Sereno sa kanilang petisyon kaugnay ng kinakaharap na kaso ni dating Pangulong Benigno Aquino III.
Hawak ngayon ng 1st Division ng SC ang apela ng VACC sa desisyon ng Ombudsman na kasuhan lamang ng graft at usurpation of authority ang dating Pangulo kaugnay ng madugong engkwentro sa Mamasapano, kung saan nasawi ang 44 na tauhan ng PNP – Special Action Force.
Nangangamba ang grupo na hindi magiging patas si Sereno sa kanilang petisyon lalo’t isa sila sa naghain ng impeachment complaint laban dito.
Posible umanong maghain ng mosyon ang grupo ngayong linggo upang pormal na hilingin ang inhibition ni Sereno.
Sa kanilang petisyon sa SC, hinihiling ng VACC na itaas sa kasong reckless imprudence resulting in homicide ang kaso laban sa dating Pangulo.
Nais din nila na maglabas ng TRO ang Korte Suprema upang pigilin ang arraignment ni Aquino sa ikalabinlima ng Pebrero.
( Roderic Mendoza / UNTV Correspondent )
Kinasuhan na ng Ombudsman si dating Pangulong Benigno Aquino III kaugnay ng kontrobersyal na Disbursement Acceleration Program (DAP) na ipinatupad ng nakaraang administrasyon.
Nakitaan ng probable cause o sapat na basehan ni Ombudsman Conchita Carpio Morales na kasuhan ang dating pangulo ng usurpation of legislative powers sa ilalim ng Article 239 ng Revised Penal Code.
Nag-ugat ang kaso sa implementasyon ng DAP ng nakaraang administrasyon kung saan 72 bilyong piso na pondo ang inilipat mula sa iba’t-ibang ahensiya nang walang kaukulang appropriation o alokasyon mula sa Kongreso.
Batay sa resolusyon ng Ombudsman, may ebidensiya umanong nagpapatunay na nagsabwatan sina Aquino at dating Budget Secretary Florencio “Butch” Abad upang saklawan ang kapangyarihan ng Kongreso na maglaan ng pondo sa mga proyekto ng pamahalaan.
Ayon sa Ombudsman, hindi maipapatupad ang DAP kung hindi nilagdaan ng dating pangulo ang memorandum para dito.
Hindi naman kinatigan ng Ombudsman ang apela ni Abad na baliktarin ang naunang desisyon nito na sampahan din siya ng kaparehong kaso.
Kumalat sa social media ang mga panawagan kay dating Chief Justice Ma. Lourdes Sereno na tumakbong senador sa 2019 midterm elections.
Si Ifugao Rep. Teddy Baguilat, may ginawa pang survey sa kanyang twitter account.
Sa twitter post ni Baguilat, nanawagan ito sa partido liberal na ikunsidera si Sereno sa kanilang senate slate, dahil kailangan ni sereno ng platform para ipagpatuloy ang kanyang laban para protektahan ang hudikatura.
Suportado rin ito nina Caloocal Rep. Egay Erice at dating Presidential Spokesperson Edwin Lacierda, anila kailangan umano ng oposisyon ang kakahayan ni Sereno lalo na sa Senado. Maging ang ilang mga netizen tinutulak din si Sereno sa Senado.
Wala pa namang tugon sa mga panawagang ito ang kampo si CJ Sereno.
Pero ayon kay Liberal Party President Kiko Pangilinan, handa silang tanggapin si Sereno oras na magpasya itong tumakbo sa pagkasenador sa ilalim ng kanilang partido.
( Grace Casin / UNTV Correspondent )
Inihalintulad ni Volunteers Against Crime and Corruption (VACC) President Cory Quirino ang krimen sa paggamot sa isang sakit.
Aniya, hindi maiiwasan na magkaroon ng collateral damage kung nais mapagaling ang isang tao.
Kanina sa programang Get it Straight with Daniel Razon, sinabi ni Quirino na hindi solusyon ang pagpatay sa lahat ng mga kriminal kundi kailangan ng isang panibagong approach o diskarte upang masolusyunan ito.
Ani Quirino, naniniwala pa rin siya sa justice system ng bansa kung kayat mas mabuti na arestuhin ang mga kriminal at huwag patayin.
Sinabi ni Quirino na nais niyang iendorso kay Pangulong Rodrigo Duterte ang isang paraan upang kahit papaano ay mawakasan ang krimen sa bansa.
Naniniwala si Quirino na isang paraan ng pagsugpo sa krimen kung maumpisahan na maialis ang lahat ng mga street children sa lansangan.
Magtatayo ang VACC ng shelter para sa mga street children upang malingap at mabigyan ng edukasyon ang mga ito.
Samantala, naniniwala naman si Quirino na kailangan buhayin ang parusang kamatayan sa Pilipinas.
Subalit kailangan munang maayos ang justice system dahil marami pa itong butas at hindi perpekto.
Ang magagawa muna sa ngayon ng grupo ay matulungan ang mga biktima ng krimen an lumalapit sa kanilang tanggapan.
Mayroon silang victims assistance desk, legal assistance at court watch para sa mga lumalapit sa kanila na humihingi ng tulong.
Nanawagan rin ang VACC para sa lahat ng gustong maging volunteer sa kanilang grupo.
Para sa mga interesado na sumali sa VACC, tumawag lamang sa kanilang hotline number 352-0174.
( Mon Jocson / UNTV Correspondent )
Tags: krimen, Pangulong Duterte, VACC
