Tiniyak ng Malacañang na hindi maaapektuhan ang trabaho ni Pangulong Benigno Aquino III sa panahon ng pangangampanya sa kaniyang mga kandidato.

Ayon kay Presidential Communications Secretary Herminio Coloma Jr., patuloy pa rin aniyang isusulong ng pangulo ang mahahalagang programang pang reporma at pang kaunlaran.

Hindi rin aniya natitinag ang determinasyon ng pangulo para mapaglingkuran ang sambayanan.

Nauna nang sinabi ng Pangulo na pangungunahan nito ang pangangampanya ng Liberal Party (LP) kasama ang kaniyang pambato na si dating DILG Secretary Mar Roxas kapag nagsimula na ang campaign period.

Nakatakda ang campaign kick off ng LP sa February 9 sa Roxas City, Capiz at Iloilo sa pangunguna ng Pangulo.

(Jerico Albano / UNTV Radio Reporter)

Tags: Kandidato, Malacañang, Pangulong Aquino