METRO MANILA – Ikinalugod ng Malacañang ang bahagyang pagbaba sa inflation o pagtaas ng presyo ng pangkaraniwang serbisyo’t produkto.
Naitala ang 2.4% na inflation sa buwan ng Agosto mula 2.7% noong buwan ng July.
Ayon kay Presidential Spokesperson Harry Roque, dahilan ito sa unti-unti pagbubukas ng ekonomiya ng bansa.
Dagdag pa nito, nananatiling prayoridad ng administrasyong Duterte ang pagpapanatili ng presyo ng mga pangunahing bilihin upang matiyak na walang Pilipinong magugutom lalo na sa panahon ng pandemiya.
Patuloy aniyang nakatutok ang gobyerno sa pagmomonitor ng presyo ng mga produkto sa merkado at titiyaking hindi mapipigilan ang paggalaw at delivery ng mga mahahalagang commodities sa kabila ng mga ipinatutupad na hakbang ng mga lokal na pamahalaan.
Pananatilihin din aniya ng pamalaan ang mga polisiya at programa para sa mga magsasaka at mangingisda para sa pangmatagalang agricultural production sa bansa.
(Rosalie Coz | UNTV News)
Tags: pangunahing bilihin, Stable Price
METRO MANILA, Philippines – Naniniwala ang Laban Konsyumer Group na dapat ay mas mababa pa ang presyo ng mga pangunahing bilihin ngayon sa mga pamilihan. Ito ay dahil bumaba na umano ang farm gate price dahil na rin sa pagbaba ng presyo ng produktong petrolyo.
“Hindi lamang dapat stable ang presyo ng pangunahing bilihin dapat ito mababa pa dahil ang farm gate price ng gulay at manok at baboy ay mababa. ‘Yung mababang presyo ng farm gate prices hindi agad mag reflect sa retail kaya dapat tutukan talaga ng monitoring at enforcement,” pahayag ni Vic Dimagiba, presidente ng Laban Konsyumer Group.
Ayon naman kay Wilson Lee Flores, isang ekonomista, magiging stable ang presyo ng mga bilihin sa mga unang buwan ng taong 2019. Ngunit kailangan aniya bantayan ang epekto sa ekonomiya dahil sa trade war sa pagitan ng Amerika at Tsina.
Ani Flores, “May kaunting epekto sa paghina ng ekonomiya ng buong mundo pero ang magandang balita (dahil) ang Pilipinas at Asya, malakas pa rin ang ekonomiya natin.“
Dagdag pa ng ekonomista, hindi na masyado mabibigla ang mga tao sa panibagong dagdag-buwis na ipapataw ngayong taon dahil naumpisahan na ito noong 2018.
(Mon Jocson | UNTV News)
Tags: Laban Konsyumer, pangunahing bilihin, petroleum, petroleum products, price increase, price rollback, primary commodity, produktong petrolyo, TRAIN Law
