Patuloy na nakararanas ng epekto ng climate change ang Pilipinas, katunayan nito ang nararamdaman nating mainit na temperatura.
Ang mga bagyong nararanasan natin ay tumataas na rin ang intensity sa 170 kilometers per hour.
Ayon sa PAGASA, sa nakalipas na sampung taon may kaunting pagtaas sa bilang ng malalakas na mga bagyo na dumadaan sa bansa.
Ayon kay Rozalinda de Guzman ang Chief ng Climate Change data ng PAGASA, maaaring magdulot ito ng mga pagkalubog sa baha ng mga low lying areas lalo na kapag tag-ulan.
Pangunahing maapektuhan nito ang mga kababayan nating nakatira malapit sa mga dalampasigan.
Apektado rin ng pagtaas ng temperatura ang ani ng mga magsasaka.
“’Pag tumaas ang temperature ng one degree centigrade ay mababawasan ‘yung yield natin ng 10% ito po ang very critical sa Pilipinas kasi po tayo ay rice eating country,” pahayag ni Rozalinda de Guzman, Chief, Climate Data Section, PAGASA.
May mga programa naman ang PAGASA at Department of Agriculture para maibsan ang epekto nito. Kasama na riyan ang paglalagay mga early warning systems sa agricultural areas. Pagtatayo ng mga PAGASA weather radar at regional flood forecasting centers sa mga probinsiya.
Batay sa projection ng PAGASA, kapag hindi naresolba ang epekto ng climate change sa bansa, pagdating ng 2050 o sa katapusan ng 21st century, tataas ng 4 degrees centrigrade ang temperatura sa bansa, patuloy na tataaas ang sea level at magiging mas madalas ang pagdating ng malalakas na bagyo.
Tags: Climate Change
Nagsagawa ng nationwide protest ang iba’t-ibang environment advocates sa France matapos lumabas ang nakababahalang ulat ng United Nations na nananawagan sa mabilisang pag-aksyon upang makaiwas sa sakunang maaring idulot ng climate change sa buong mundo .
Walumpung siyudad ang nakilahok sa kilos-protesta noong Sabado, ika-13 ng Oktubre, mula sa Lille sa hilaga at Marseille sa kanluran. Tinatayang nasa 14,500 ang nag-martsa sa Place de l’Opera, ang sentro ng Paris. Panawagan ng mga ito na itigil na ang paggamit ng fossil energy na nagpapalala sa climate change.
Sa pamamagitan anila ng pagkilos na ito ay maipararating nila sa buong mundo na may panahon pa at mababago pa ang sistema. Dagdag pa ang maraming babala na dapat huwag ipagsawalang bahala ng mga namamahala sa bawat bansa.
Nakiisa rin ang isang Filipino French. Panawagan niya sa ating mga kababayan na lawakan ang awareness sa climate change dahil na rin sa malalakas na bagyo na nanalasa sa Pilipinas.
Ayon sa mga eksperto, nakakabahala na rin ang global warning. nagdudulot ng heatwaves, heavy rainfall, matinding snowfall, mababang crop production, sea level rise ng 40 to 50 centimeters, coral bleaching at catastrophic effect sa kalikasan ang pagtaas ng temperatura ng 1.5 to 2 degree celcius.
( Jhun Garin / UNTV Correspondent )
Tags: Climate Change, France, Paris
Itutuloy ngayong araw ng Commission on Human Rights (CHR) ang imbestigasyon nito kaugnay sa hiling ng ilang environmental group na papanagutin ang apatnapu’t pitong multinational fossil fuel companies na umano’y biggest polluters sa mundo; kabilang dito ang Chevron, ExxonMobil at Shell.
Tetestigo sa pagdinig ngayong araw ang ilang international climate experts.
Ayon kay Richard Heede, ang co-founder at director ng Climate Accountability Institute sa United States at pangunahing imbestigador ng carbon majors projects, halos two-thirds ng carbon dioxide emission mula noong 1750’s ay galing sa 90 kumpanya.
Aniya, sa labas man ng Pilipinas nag-ooperate ang mga ito ay hindi nangangahulugan na hindi nakakarating sa bansa ang epekto ng kanilang operasyon.
Wala anilang ginagawa ang mga kumpanya para mas mabawasan ang panganib na bunga ng kanilang operasyon at mas pinahahalagahan ng mga ito ang perang kikitain kaysa sa kapakanan ng mga tao sa mundo.
Ayon sa mga eksperto, dapat magsilbing paalala sa iba pang fossil fuel producers ang hakbang na ito ng CHR para ayusin ng mga ito ang kanilang operasyon.
Nakatakda ring humarap sa pagdinig ang ilang community witnesses at petitioners.
Ihahain ng mga eksperto ang resulta ng kani-kanilang pananaliksik kung paano nakaambag ang mga industriya sa paglubha ng climate change.
( Cathy Maglalang / UNTV Correspondent )
Tags: CHR, Climate Change, climate experts
Panahon na upang seryosohin ng pamahalaan ang epekto ng climate change, ito ang binigyang-diin ng Philippine Movement for Climate Justice (PMCJ) sa pagsisimula ng tatlong araw na National Congress ng iba’t-ibang environmental groups sa Unibersidad ng Pilipinas sa Diliman.
Ayon kay Ian Rivera, ang national coordinator ng PMCJ, hindi na bago ang isyu ng climate change at paulit-ulit lamang ang problema sa loob ng tatlong dekada.
Sa kabila aniya ng mga babala ay hindi naghanda ang pamahalaan para dito at hindi rin sineryoso ng publiko ang mga epekto ng pabago-bagong klima.
Ipinaliwanag nito na taon-taon ay inaasahan na tatamaan ng bagyo ang bansa na magdadala ng matingding mga pag-ulan. Isa din sa mga kailangang paghandaan ng pamahalaan ay ang tagtuyot.
Hinimok din nito ang gobyerno na maglaan ng malaking pondo para sa isang pangmatagalang solusyon sa naturang mga problema.
Binatikos din nito ang proyekto ng pamahalaan na para lamang umano sa negosyo o commercial interest ng bansa.
Ayon kay Rivera, dapat pamarisan ng Pilipinas ang ibang mga bansa tulad ng Malaysia, Thailand at Japan sa paghahanda sa kalamidad dahil ang mga bansang ito ay may flood mitigation plan na mapakikinabangan sa loob ng isandaang taon.
( Cathy Maglalang / UNTV Correspondent )
Tags: Climate Change, environmental groups, PMCJ
