Hindi inaasaan ng ilang senador ang nilalaman ng isinumiteng affidavit ni John Paul Solano na pangunahing suspek sa pagkamatay ng hazing victim na si Horacio “Atio” Castillo III. Dito nakasaad na mayroon umanong pre-existing heart condition si Atio at posible umanong sakit sa puso ang ikinamatay nito.
Una nang nagpahayag ng pagkadismaya ni Senator Juan Miguel Zubiri na nagsabing malinaw na panloloko ang ginagawa ni Solano at pilit inililigtas ang sarili sa kaso. Malinaw aniya na nagdadahilan lamang si Solano at ang abogado nito. Ganito rin ang pananaw ni Senator Francis Escudero. Para sa senador, dahil sa mga naging pahayag ni Solano ay hindi dapat ito maging state witness.
Sa kasalukuyan ay nakadetine pa rin sa senado ang na-contempt na itinuturong lider ng Aegis Juris Fraternity na si Arvin Balag dahil sa pagtanggi nito na sumagot sa mga pagtatanong sa nakaraang imbestigasyon ng senado.
( Nel Maribojoc / UNTV Correspondent )
Tags: Atio Castillo, John Paul Solano, senador
House of Representatives, Philippines – Inihain na sa mababang kapulungan ng Kongreso ang panukalang amyendahan ang saligang batas ng bansa o ang Charter Change.
Sa House Concurrent Resolution No. 1 na inihain ni Cagayan De Oro Representative Rufus Rodriguez pinapalawig nito ang termino ng mga kongresista habang babawasan naman sa mga senador.
Magiging 4 na taon kada termino na ang mga kongresista mula sa kasalukuyang 3 taon.
Habang ang mga sendor naman mula sa 6 na taon kada termino ay gagawin nalang iyong 4 na taon.
Kaya kung iyon ay maisasabatas magkakapareho na ang termino ng kongresista at senador kung saan maaari silang maluklok sa 3 magkakasunod na halalan at manatili sa pwesto ng 12 taon.
Nakapaloob rin sa panukalang batas na mula sa kasalukuyan na 24 na senador ay gagawin itong 27.
Kung saan kailangang magkaroon ng tig-3 senador mula sa National Capital Region, Northern Luzon, Southern Luzon, Bicol Region, Eastern Visayas, Northern Mindanao, Southern Mindanao at Bangsamoro Autonomous Region.
Samantala una nang sinabi ni House Speaker Alan Peter Cayetano na prayoridad nya sa kanyang pamumuno ang pagpapalawig sa termino ng mga kongresista.
(Grace Casin | Untv News)
Tags: Charter Change, Kamara, mga kongresista, senador
METRO MANILA, Philippines – Taong 1916 pa lamang ay may aktibo ng lehislatura ang Pilipinas, binubuo ito ng Senado bilang mataas na kapulungan at ng House of Representatives bilang mababang kapulungan. At sa nagdaang mga panahon, ilang giyera at pangyayari na ang pinagdaanan ng institusyon.
Iba’t ibang mga pulitiko na rin ang nailuklok sa pwesto sa pamamagitan ng isang halalan.
Kung kasaysayan ang pagbabatayan, ano nga ba ang pagkakaiba ng komposisyon ng Senado simula ng maitatag ito hanggang sa panahon natin ngayon?
Noon, mga abogado at kilalang pulitiko o lider ng lipunan ang nauupo sa pwesto sa senado. At ilan dito ay mga naging Pangulo na ng Pilpinas, gaya nina Manuel L. Quezon, Jose P. Laurel, Sergio Osmeña, Manuel Roxas, Elpidio Quirino, Carlos P. Garcia, Ferdinand Marcos, Joseph Estrada, Gloria Arroyo At Benigno Aquino III.
Hindi rin nagpahuli ang mga kababaihan ng maihalal na kaunaunahang babaeng senador ng bansa si Geronima Tomelden-Pecson noong 1947. Pero sa paglipas ng panahon, hindi lamang mga abogado, opisyal ng militar at mga lider ng lipunan ang naluklok sa pwesto.
Taong 1957 pa lamang, naihalal na Senador si Rogelio Dela Rosa, siya ang kauna-unahang artista sa Pilipinas na naging senador ng bansa, isang matinee idol at multi-awarded actor. ‘Di kalaunan nasundan ito ng iba pa gaya ng mag-aamang Joseph, Jinggoy at JV Ejercito, ang mag-amang Ramon at Bong Revilla, Freddie Webb, Tito Sotto at Lito Lapid.
Hindi rin nagpahuli ang alagad ng media gaya ng mga broadcaster na sina Soc Rodrigo, youngest war correspondent at pulitiko na si Benigno “Ninoy” Aquino, Jr., news anchor na sina Loren Legarda at Noli De Castro.
Maging ang mga propesyonal sa ibat ibang larangan ay nasabak na rin sa Senado gaya ng doktor na si Juan Flavier, ang basketbolista na si Robert Jaworski at ang businessman at mag-asawang Manny At Cynthia Villar.
Ngayong 2019 midterm elections, samu’t sari na ang tumatakbo sa pagkasenador at ibang pwesto sa pamahalaan, mula sa larangan ng showbiz, sports mga negosyante at iba pa.
Kamakailan, naging laman ng mga balita ang pahayag ng senatorial candidate na si General Ronald “Bato” Dela Rosa na nais nitong magpaturo sa sistema at proseso ng paggawa ng batas.
Umani ng batikos mula sa publiko ang pahayag na ito ni Dela Rosa subalit marami din naman ang ipinagtanggol ang kandidato.
Inihalimbawa pa ng ilan si dating Pangulong Corazon Aquino na anila’y naluklok sa pinakamataas na pwesto sa bansa mula sa pagiging walang karanasan sa pulitika.
Gumanti naman si Dela Rosa at hinamon ng isang IQ test ang mga tumutuligsa sa kanya.
Sa linggong ito ay posibleng maiproklama na ng Commission on Elections ang labindalawang bagong miyembro ng senado.
At sa lalabas na resulta, ito ang katibayan na mula noon hanggang ngayon, ang mga taong naluklok sa pwesto ay patunay na hindi na maikakahon sa isa lamang propesyon, pagsasanay o pinagmulan ang pagiging isang senador ng Republika ng Pilipinas.
Basta’t makakuha ka ng maraming boto ay tiyak na magkakaroon ka ng pwesto.
(Mon Jocson | UNTV News)
Tags: Senado, senador, Senate of the Philippines
Maaga pa lamang ay marami na rin ang naghain ng kanilang kandidatura bilang senador sa unang araw ng filing ng certificate of candidacy (COC) kahapon.
Unang dumating si PDP Laban President Senator Aquilino Koko Pimentel na kasama ang kaniyang partner na si Kathryna Yu.
Maaaga aniya siyang nag-file dahil sa susunod na linggo ay busy na siya sa kaniyang kasal.
Pangalawang naghain ng kandidatura ang 65 anyos na musician na si Freddie Aguilar na tatakbo siya sa ilalim ng ruling party na PDP Laban.
Naghain rin ng COC ang dating mambabatas na si Neri Colmenares at Marawi Bakwit leader na si Samira Gutoc.
May iba namang political aspirant na dati nang naideklarang nuisance canidate na gusto muling sumubok na makapasok sa senatoriables.
Mayroon sa kanila, nangako na ipaglalaban ang karapatan sa teritoryo ng bansa.
Si Daniel Martira na ilang beses na ring sumubok na makapasa bilang senatoriable candidate at ipaglalaban umano niya ang Pinoy rock at may mensahe sa kaniyang iniibig.
Tinatapatan naman ito ni Agi Tuana na ipaglalaban ang karapatan ng mga nagtitinda ng saging.
May mga kandidato naman na muling pinababalik ng Comelec dahil lumang form ang kanilang nafill-up.
Ayon kay Comelec Commissioner Rowena Guanzon, noong nakaraang eleksyon, sa 140 na nagfile ng COC, 50 lamang ang nakapasa sa kwalipikasyon. Maliit rin aniya ang porsiyento ng mga kababaihan na nananalo sa national post.
Sa kabuoan, sa unang araw ng filing, 27 ang nagfile ng COC kahapon na tatakbo sa pagkasenador.
( Nel Maribojoc / UNTV Correspondent )
