P56.2M, inilaang pondo ng pamahalaan para sa biktima ng bagyong Nona
Naglaan ang pamahalaan ng P56.2M na assistance para sa naapektuhan ng Bagyong Nona.
Ayon kay Presidential Communications Secretary Herminio Coloma Jr., ang naturang pondo ay naipamahagi na sa Region 2 o Cagayan Valley, Region 4-A o CALABARZON, Region 4B o Mimaropa, Region 5 o Bicol region at Region 7 o Central Visayas.
Naghanda na rin aniya ang Dept. Of Social Welfare and Devt. o DSWD ng tinatayang P674M bilang standby funds.
Gayundin ang P111.5M na halaga ng pagkain at non-food items at mahigit sa 204,000 food packs na nasa regional offices ng DSWD sa Northern Mindanao, Davao, SOCCSKSARGEN at CARAGA bukod pa sa national operations center nito sa Maynila.
Samantala, ani Coloma, hindi naman nakaapekto sa paghahatid ng relief goods sa Samar ang nangyaring pag ambush ng NPA sa convoy ng mga militar at tauhan ng DSWD sa naturang lugar noong nakaraang Biyernes ng umaga.
(Jerico Albano / UNTV Radio Reporter)
Tags: Bagyong Nona, biktima, P56.2M, Pamahalaan, pondo
METRO MANILA – Umabot sa P22.9-B ang kinailangang pondo ng gobyerno upang bigyang-ayuda ang 22.9 Million low income individuals sa Greater Manila Area nang magpatupad muli ng istriktong community quarantine noong Abril dahil sa COVID-19 surge.
Kung muling magpapatupad ng hard lockdown ang pamahalaan sa Metro Manila, aminado ang palasyo, hindi pa tiyak kung saan kukunin ang bilyon-bilyong pisong halaga ng pondo para sa panibagong social amelioration.
“Pag tayo nag-lockdown sa Metro Manila, napakadaming magugutom at siyempre po 60% po ng ating GDP, ay galing sa Metro Manila at yung plus 8 areas so complete closure of the economy, mawawalan ng trabaho and ang katotohanan po, hindi ko po alam kung mayroon tayong pang-ayuda para sa another malawakang lockdown.” ani Presidential Spokesperson Sec. Harry Roque.
Pinapanukala ng mga alkalde sa National Capital Region na isailalim ang rehiyon sa 2 Linggong hard lockdown basta’t may cash assistance na ipagkakaloob sa mga maapektuhan.
Hindi natalakay ang isyung ito nang makipagpulong ang Inter-Agency Task Force kay Pangulong Rodrigo Duterte noong Miyerkules (July 28) ng gabi kung kailan inaprubahan ang panibagong round ng community quarantine sa bansa.
Subalit giit ng palasyo, liban sa regular criteria, ikinukunsidera ng pamahalaan ang iba pang dapat isaalang-alang sa pagpapatupad ng quarantine restrictions.
“Ang desisyon na nakakaapekto sa COVID, hindi lang po sa larangan ng pagkakasakit, kinakailangan tingnan din po natin ang ibang aspeto ng buhay ng ating mga mamamayan, kung ikagugutom po ba nila yan? Kung kaya ba natin silang bigyan ng ayuda para hindi sila magutom” ani Presidential Spokesperson Sec. Harry Roque.
Ayon sa mga ekspertong kinukunsulta ng gobyerno, bagaman may bahagyang pagtaas ng COVID-19 cases sa NCR, nasa low-risk level pa rin ang health care at intensive care utilization rates.
Pagtitiyak pa rin ng Malacanang, nakabantay sa sitwasyon ng COVID-19 ang Duterte administration at kung talagang kinakailangang magpatupad ng istriktong quarantine classification sa NCR, hahanap ng paraan ang gobyerno upang may maipagkaloob ng ayuda sa mga mawawalan ng hanapbuhay.
(Rosalie Coz | UNTV News)
Tags: ayuda, hard lockdown, Palasyo, pondo
METRO MANILA – Tiniyak ng Malacañang na mabibigyan ng ayuda ng pamahalaan ang mga naapektuhan ng Bagyong Ursula.
Lubhang naapektuhan ng bagyo ang Eastern Visayas at Southern Luzon kung saan may mga nasawi.
Wala namang detalye ang palasyo kung makakadalaw si Pangulong Rodrigo Duterte sa mga lugar na naapektuhan ng bagyo.
“During this time of calamities, all the agencies involved in the rehabilitation, in helping, assisting are all in placed” ani Presidential Spokesperson & Chief Presidential Legal Counsel Sec. Salvador Panelo.
(Rosalie Coz | UNTV News)
Tags: Malacañang, Pamahalaan
METRO MANILA – Nakalabas na ng ospital ang 29 na biktima ng food poisoning sa Makilala, Cotabato. Ayon sa National Disaster Risk Reduction and Management Council (NDRRMC), nakaramdam ng sakit ng tiyan at pagsusuka ang mga biktima mula sa evacuation center sa Barangay Malabuan matapos makakain ng pastel na kasama umano sa ipinadalang donasyon sa lugar.
Upang maiwasan na maulit ang insidente, patuloy ang pagbabantay sa mga checkpoint upang masiguro ang kalidad ng mga pagkain na ipapamahagi sa mga evacuation center.
Nananawagan din ang ahensya sa mga donor na siguraduhing nasa ma-ayos na food packaging at hindi madaling mapanis ang kanilang mga ipapadalang pagkain.
Samantala, nakatakdang magbigay ng karagdagang pondo ang pamahalaan para sa rehabilitasyon ng mga lugar na lubhang napinsala ng lindol sa Mindanao.
Nagpunta kahapon sa Kidapawan City Provincial Capitol sina Defense Secretary Delfin Lorenzana, Department of the Interior and Local Government (DILG) Secretary Eduardo Año at Health Secretary Francisco Duque III upang tingnan ang sitwasyon sa lugar.
Ayon kay Lorenzana, may ilang alkalde ang humihingi na ng tulong dahil paubos na ang kanilang calamity fund. Ayon naman kay Secretary Año, maglalabas din ng pondo ang pamahalaan para sa pagbili ng mga lupa na magiging relocation site para sa mga nawalan ng tirahan.
Patuloy naman ang pagdating ng mga suplay ng mga pagkain at tubig sa North Cotabato. Samantala, nagbigay naman ng P2M halaga ng relief goods ang Philippine National Police (PNP) sa Makilala, North Cotabato.
(Harlene Delgado | UNTV News)
Tags: lindol, Malacañang, pondo
