METRO MANILA – Batay sa kalkulasyon ng isang labor group na Partido Manggagawa, nasa P76 na ang natapyas sa sahod ng mga minimum wage earner dahil sa naitalang pagtaas ng inflation rate nitong Oktubre na umabot sa 7.7%
Ayon kay Renato Magtubo, Chairman ng grupo, ang mahigit sa P500 na minimum na sahod ng mga mangagawa sa National Capital Region at mahigit P400 sweldo sa probinsya.
Kulang na kulang na umano para tugunan ang pangangailangan ng isang mangagawa lalo na kung mayroong sariling pamilya.
Dahil dito nananawagan ang grupo na madagdagan ng P100 ang arawang sweldo ng mga mangagawa upang makasabay naman sa tumaatas na presyo ng mga bilihin.
Ayon pa kay Magtubo, ang P100 na dagdag sa sahod ay para lang sa wage recovery upang sumapat pa rin ang arawang sahod ng mangagawa lalo’t ayon umano sa mga ekonomista ay aabot pa ang pagtaas ng inflation hanggang sa susunod na taon
Giit ng labor group, kung hindi pa rin mabibigyan ng umento sa sahod ang mga mangagawa sa gitna ng patuloy na pagtaas ng inflation rate, maaari aniya itong makaapekto sa ekonomiya ng bansa.
Bukod sa dagdag sahod, panawagan din ng grupo na magkaroon ng ayuda ang mga Pilipinong walang trabaho na lalong hirap sa buhay dahil sa kawalan ng pagkakakitaan
Sinusubukan pa ng UNTV na makuha ang pahayag ng Department of Labor and Employement (DOLE) ukol sa panawagang dagdag sahod sa mga manggagawa.
(JP Nunez | UNTV News)
METRO MANILA – Ginugunita ng bansa ngayong araw (May 1), ang 121 selebrasyon ng Labor Day.
Wala man sa Pilipinas ngayong araw, kahapon (April 30) ay pinangunahan ni Pangulong Ferdinand Bongbong Marcos Junior ang programa ng Department of Labor and Employment (DOLE) para sa Labor Day Celebration.
Sa kaniyang mensahe, tiniyak ng pangulo na prayoridad ng kaniyang administrasyon ang kapakanan ng mga manggagawa na tinawag niyang sandigan ng ating ekonomiya.
“Sa araw na ito, ating kinikilala ang kadakilaan at kabayanihan ng manggagawang Pilipino — ang sandigan ng ating ekonomiya. Bilang pangulo, ipinapangako ko na ang proteksyon para sa mga manggagawang Pilipino ay mananatiling pangunahing prayoridad ng aking administrasyon.” ani Pangulong Ferdinand Bongbong Marcos Jr.
Inilatag din ng pangulo ang ginagawang hakbang ng pamahalaan para solusyonan ang mga problema ng bansa partikular na sa sektor ng paggawa.
“Maingat at unti-unti nating binubuksan at pinapasigla ang ating ekonomiya upang magbalikan at dumami ang mga negosyo at namumuhunan lalo na sa imprastraktura. Pinapalakas din natin ang agrikultura at ang ating pakikipag-ugnayan sa ibang bansa para naman matulungan natin ang ating mga OFW.” ani Pangulong Ferdinand Bongbong Marcos Jr.
Kaakibat ng selebrasyon ng Labor Day, ay ang pagbubukas ng ‘Kadiwa ng pangulo para sa mga mangagawa’ outlet sa Pasay City at Job Fair.
METRO MANILA – Inihain sa mababang kapulungan ng Kongreso ang isang panukalang batas na layong itaas sa P750 ang arawang sahod ng mga manggagawa.
Saklaw nito ang mga empleyado sa pribadong sektor sa buong bansa kasama ang mga manggagawa sa agricultural at non-agricultural enterprises.
Nakasaad sa panukala na ito ang tugon para matapalan ang malaking puwang sa pagitan ng cost of living at kasalukuyang minimum wage na nagkalahalaga ng ₱570 sa Metro Manila.
Sa isang pahayag, sinabi ni Gabriela Womens Partylist Representative Arlene Brosas na sasapat na ang P750 na daily wage para matustusan ang mga pangangailanan ng ordinaryong pamilyang Pilipino.
METRO MANILA – Umaabot na sa mahigit 1,000 ang araw-araw na gastusin para sa disenteng pamumuhay ng isang pamilyang may 5 myembro batay sa kompyutasyon ng Ibon Foundation.
Ngunit ang minimum wage ng isang manggagawa sa National Capital Region (NCR), umaabot lang P570 o kalahati lang nito.
Ayon kay Ibon Foundation Executive Director Sonny Africa, kung susumahin ay halos sa pagkain na lang ng buong pamilya napupunta ang sweldo ng isang minimum wage earner. At wala nang natitira para iba pang mga gastusin gaya sa tubig, kuryente, upa sa bahay at pamasahe.
Panawagan naman ng Ibon Foundation sa pamahalaan, itaas ang minimum wage at suportahan ang mga maliliit na negosyo para makapagbigay ng sapat na sweldo at makapamuhay ng disente ang mga Pilipino.
Ngunit una nang sinabi ng Employers Confederation of the Philippines (ECOP) na mas makabubuti kung mas pagtutuunan ng pansin ang job creation kaysa sa pagtataas ng sweldo.
Maaari rin umano na magresulta sa pagsasara ng mga maliliit na negosyo ang pagbibigay ng dagdag sahod sa mga manggagawa.
Kung direkta namang tatanungin ang ilan nating mga kababayan, hindi na anila talaga sapat ang minimum wage sa laki ng gastusin sa kasalukuyan.
Ngunit para sa ilan ay dapat pa rin balansehin para sa kakayahan ng mga employer.
Nobyembre lang nang ipanawagan ng government workers sa pangunguna ng Confederation for Unity, Recognition and Advancement of Government Employees (COURAGE) na itaas sa P33,000 kada buwan ang kanilang minimum wage upang mailapit ito sa makatotohanang family living wage.
Sinabi naman ng Department of Budget and Management (DBM) na ang pagtataas ng sahod sa mga empleyado ng gobyerno ay mangangailangan pa ng batas.
Gayunpaman, sinabi ng DBM na ipatutupad sa 2023 ang huling tranche ng salary increase para sa mga civilian personnel alinsunod sa Republic Act 11466 o Salary Standardization Law 5.
(Asher Cadapan Jr. | UNTV News)
Tags: DBM, DOLE, Ibon Foundation, Salary Increace
