Hinamon ng mga mahistrado ng Sandiganbayan 4th Division ang prosekusyon na isampa na sa lalong madaling panahon ang ikatlong batch ng pdaf cases sa Ombudsman.
Ayon kay Associate Justice Jose Hernandez, hinihintay na ito ng taumbayan at wala silang nakikitang dahilan para ma-delay ang pagpa-file nito.
Ginawa ni Hernandez ang pahayag sa bail hearing ni dating Masbate Rep. Rizalina Seachon Lanete kanina kung saan nakasalang bilang testigo si PDAF witness Marina Sula.
Depensa naman ng prosekusyon, hindi nila hawak ang desisyon sa filing ng PDAF cases.
Ayon naman kay Atty Laurence Arroyo, abogado ni Lanete, makikita sa mga nakaraang batch ng PDAF scam cases na nagkaroon ng selective justice
Samantala, sinabi pa ni Atty Arroyo na lumabas sa kanilang cross examination kay Sula na hindi kailanman nakita si Lanete na pumunta sa JLN Corp o dumalo sa kahit anong party ni Janet Lim Napoles.
Pineke lang din aniya ang pirma ni Lanete sa mga dokumentong may kinalaman sa PDAF scam.
Katunayan, ito rin ang ipinahayag ni Atty Raymond Joel Balbuena, ang Field Investigating Officer ng Ombudsman sa kanyang testimonya laban kay Dating APEC Partylist Rep. Edgar Valdez sa 5th division.
Tags: APEC Partylist Rep. Edgar Valdez, Associate Justice Jose Hernandez, Atty Raymond Joel Balbuena, Janet Lim Napoles, Marina Sula, Masbate Rep. Rizalina Seachon Lanete
Para sa ilang senador, hindi maaaring balewalain na lamang ang magiging bagong testimonya ng umano’y pork barrel scam mastermind na si Janet Lim Napoles.
Ito ay sa gitna na rin ng isyu na maaari umanong magamit si Napoles sa pulitika at madiin ang mga kalabang partido ng administrasyon.
Ayon pa kay Senator Panfilo Lacson, minsan na rin niyang nakita ang listahan ni Napoles na naglalaman ng pangalan ng mga mambabatas na umanoy nakinabang sa pork barrel scam.
Ngunit mas mabuti aniya na ipaubaya na lamang aniya sa Department of Justice (DOJ) o sa Office of the Ombudsman ang imbestigasyon sa kung gaano katotoo ang naturang listahan.
Para naman kay Senator Joseph Victor Ejercito, mas mabuti na idetalye na lahat ni Napoles ang kaniyang nalalaman upang may maidahilan aniya ang DOJ sa desisyon nito na mapasailalim si Napoles sa provisional witness protection program.
( Nel Maribojoc / UNTV Correspondent )
Tags: DOJ, Janet Lim Napoles, Pork barrel scam
Hindi kinatigan ng Sandiganbayan first at third division ang mosyon ng kampo ni Janet Lim-Napoles na mailipat siya patungong NBI detention facility mula sa Correctional Institution for Women sa Mandaluyong.
Sa halip, ipinag-utos ng anti-graft court na mailipat ang tinaguriang Pork Barrel Scam Queen sa Bureau of Jail Management and Penology sa Camp Bagong Diwa sa Taguig City.
Ayon sa korte, nakasaad sa batas na lahat ng mga akusado na dumadaan sa paglilitis ay dapat makulong sa BJMP facility at hindi sa kung saan pasilidad.
Sinabi rin ng korte na walang ebidensya na magpapatunay na hindi ligtas ang BJMP facility sa Camp Bagong Diwa.
Ipinunto rin ng korte na wala sa mandato ng NBI na kumupkop ng mga akusado lalo na ang mga sumasailalim pa sa paglilitis.
Sa ngayon mayroon pang isang nakabinbin na mosyon si Napoles sa fifth division na humahawak rin sa kanyang kasong graft at plunder.
Hinihintay pa ng korte ang sagot ng prosekusyon sa kaparehong argument.
Nag-isyu na rin ng commitment order ang Sandiganbayan first at third division at dinala na ito kaninang hapon ng sheriff sa BJMP.
Sa isang mensahe naman sa text, sinabi ng abogado ni Napoles na si Atty. Stephen David na plano nilang maghain ng motion for reconsideration matapos makakuha ng kopya ng resoluyon.
(Mon Jocson)
Tags: Janet Lim Napoles, NBI Detention Facility, Sandiganbayan
Matapos mapawalang sala ng Court of Appeals noong Lunes sa kasong serious illegal detention, nakiusap ang kampo ni Janet Lim Napoles na ilipat siya sa NBI detention facility.
Ayon kay Atty. Steven David, abogado ni Napoles, sumulat siya sa Department of Justice kahapon para hilingin na ilipat si Napoles sa kustodiya ng NBI mula sa Bureau of Corrections o BuCor.
Maghahain rin sila ng isang manifestation sa sandiganbayan dahil ito ang may hurisdiksyon ngayon kung saan dapat dalhin si Napoles.
Sa limang kaso na inihain laban kay Napoles, dalawa lamang ang napagbigyan na siya ay makapagpiyansa.
Habang ang tatlong plunder case na sangkot ang tatlong senador ay hindi pinayagan ng Sandiganbayan.
Pinag-iisipan na ng kampo ni Napoles ang iba pang legal remedy upang mapayagan ito ng graft court na makapag bail.
Ayon pa kay Atty. David, makakaapekto sa kredibilidad ni Benhur Luy bilang isang witness ang pagkaka acquit ni Napoles sa kasong serious illegal detention.
Ayon naman kay Sandiganbayan Presiding Justice Amparo Cabotaje-Tang, kailangan pa muna nilang maglabas ng isang kautusan para sa mailipat ng kulungan si Napoles.
(Mon Jocson)
Tags: Janet Lim Napoles, NBI Detention Center, Sandiganbayan
