METRO MANILA – Base sa price monitoring ng Department of Agriculture (DA), mas mababa pa ang presyo ng lokal na bigas kumpara sa imported.
Halimbawa nalang ang regular milled na P34 ang kada kilo ng pinakamababa sa lokal habang P37 naman sa imported.
Ayon sa Chairman ng Samahang Industriya ng Agrikultura (SINAG) na si Rosenda So, umaabot na ngayon sa P40 ang kada kilo ng well milled na imported rice pagdaong pa lamang nito sa pantalan.
Kahit na marami aniyang inangkat ay hindi parin nito napababa ang presyo sa merkado.
Posibleng sa mga susunod na Linggo ay tumaas pa aniya ang presyo ng bigas nang nasa P1 sa regular milled at P2 sa well milled.
Ayon kay So, tumaas na aniya sa P22 ang kada kilo ng palay na ibinebenta ng mga magsasaka.
Mataas aniya ang gastos ngayon ng mga magsasaka sa kanilang pagsasaka. Bukod pa rito ang na-delay na ayuda ng pataba.
Pero una nang sinabi ng DA na kung hindi umangkat ng bigas ang Pilipinas ay posibleng mas mataas pa ngayon ang presyo nito.
Noong 2022 ay umabot sa mahigit 3.8 million metric tons ang dumating na bigas sa bansa na siyang pinaka mataas sa kasaysayan.
Ayon sa SINAG kailangan ng ayuda sa mga magsasaka para mapataas ang produksyon at maging mababa ang presyo ng bigas.
Kahapon (Jan. 17) ay namahagi ng fertilizer voucher ang DA sa Pura, Tarlac.
Ayon sa Department of Agriculture, pag-uusapan pa nila ang mga gagawing hakbang para hindi tumaas ng sobra ang presyo ng bigas.
(Rey Pelayo | UNTV News)
Tags: DA, Local Rice, SRP
METRO MANILA – Tiniyak ni Pangulong Ferdinand Marcos Junior na maihahatid ang tulong para sa mga residenteng naapektuhan sa pananalasa ng bagyong Aghon.
Ayon kay PBBM, inatasan na nito ang Department of Social Welfare and Development (DSWD), Department of Agriculture (DA) at Department of Health (DOH) na ihatid ang lahat ng tulong at suportang medikal sa mga biktima ng bagyo.
Reresponde rin kaagad aniya ang pamahalaan upang maisaayos ang mga nasirang imprastraktura.
Siniguro rin ni Pangulong Marcos na may nakaantabay pang pondo para sa typhoon-hit areas.
METRO MANILA – Umabot na sa P5.9-B ang naging damage sa agrikultura ng bansa dahil sa patuloy na pag-iral ng El niño phenomenon.
Ayon sa kagawaran ng agrikultura, pinaka-malaki ang naitalang pinsala sa rice sector na umabot na sa P3.1-B na halaga ng pagkalugi.
Kabilang sa mga pinaka-napinsalang rehiyon sa bansa ang Mimaropa, Cordillera Administrative Region, at Western Visayas.
Ayon kay DA Assistant Secretary Arnel De Mesa, nakatulong sa pagpapagaan ng mga epekto ng El niño ang maagang pagpaplano, rehabilitasyon at mitigation measures ng kagawaran, partikular na ang sa National Irrigation Administration (NIA).
METRO MANILA – Inanunsyo ng Malacañang kahapon (April 16) na maaari ng makabili ang mga residente ng Metro Manila ng P39/kg. na bigas sa mga Kadiwa ng Pangulo (KNP) stores sa mga piling syudad sa National Capital Region (NCR).
Ayon kay Presidential Communications Secretary Cheloy Gerafil, hindi lang murang bigas ang mabibili sa KNP stores, mayroon ding mga prutas at gulay.
Ngayong araw (April 17), bukas ang KNP stalls sa employees park sa Taguig City hall, people’s park along McArthur highway sa Malinta, Valenzuela City; at Manila City hall inner court.
Maaari namang bisitahin ang official Facebook page ng Department of Agriculture (DA) para sa iba pang schedule at venue ng KNP stores.
Tags: bigas, DA, KNP Stores
