Aminado ang pamunuan ng Philippine National Railways na may pagkukulang sila sa nangyaring insidente sa isa sa kanilang tren nitong weekend.
Tungkol ito sa video na kuha noong Linggo ng gabi, kung saan makikita na pasara na sana ang pinto ng tren ngunit pinigilan ito ng isang lalaking pasahero habang umaandar.
Ang tren na sinakyan ng lalaki ay isang Electric Multiple Unit o EMU type na donasyon mula sa Japan. Mabilis itong nabubuksan dahil isa itong fire safety feature ng bagon para madaling makalabas ang mga pasahero sakaling magkaroon ng emergency sa tren.
Ayon sa PNR, ipinagtataka rin nila kung bakit walang ni isang train personnel ang nagreport kaagad sa insidente at sa social media na lamang nila ito nakita.
Kaya naman nagsasagawa na umano sila ng imbestigasyon kung sino ang may kapabayaan sa insidente.
Ipinahahanap na rin nila ang lalaking nasa video para sa imbestigasyon. Plano nilang i-ban na rin sa pagsakay sa kanilang mga tren ang lalaki. Nagpaalala rin ang PNR sa mga pasahero sa maaaring mangyari kapag lumabag sa safety regulation sa loob ng tren.
( Mai Bermudez / UNTV Correspondent )
METRO MANILA – Pormal nang inilunsad ngayong araw (Nov. 11) ng Philippine National Railways (PNR) ang kanilang makabagong Artificial Intelligence Surveillance System at Command Center, bilang bahagi ng kanilang programang pagpapaunlad ng kakayahan gamit ang mga makabagong teknolohiya.
Gagamitin ang ‘state-of-the-art’ na teknolohiyang ito upang ma-detect ang mga pasaherong posibleng may sakit sa pamamagitan ng pagbasa ng temperatura gamit ang Thermographic Fever Screening camera, upang maiwasan ang pagkalat ng Covid-19. Bukod dito, may kakayahan din itong malaman kung ang isang tao ay hindi nagsusuot ng facemask at faceshield, at kung ang mga pasahero ay hindi sumusunod sa ‘social distancing’.
Dagdag pa sa kakayahan ng sistemang ito ay ang ‘contact tracing capability’ na kayang matunton ang kinaroroonan ng isang indibidwal sa loob ng pasilidad, at malaman din ang mga lugar na pinuntahan ng isang posibleng may sakit.
Ito ay dahil may ‘appearance search technology’ ang sistemang ito, na kayang kilalanin ang isang taong nakita ng mga nakakalat na CCTV camera.
Hindi rin problema kung magkakaroon man ng power interruption, dahil nakakabit din ang sistemang ito sa mga ‘power back-up systems’, upang tuloy-tuloy pa rin ang operasyon sa pag-monitor ng mga pasahero.
(Raymund David | La Verdad Correspondent)
METRO MANILA – Dadagdagan na rin ang bilang ng mga pasahero na pwedeng sumakay sa MRT 3, LRT-1, LRT-2 at PNR, matapos payagan ang one seat apart policy sa mga pampublikong sasakyan.
Mula sa dating 13 hanggang 18% na capacity ng mga tren, itinaas ito ng Department Of Transportation (DOTr) sa 30%.
Dahil dito magiging 372 pasahero na sa kada tren ng MRT ang papayagang sumakay sa bawat biyahe.
370 na sa LRT-1, 486 sa LRT-2, habang nasa 172 hanggang 300 pasahero naman sa PNR depende sa istilo ng tren.
Sa isang pahayag sinabi ni DOTr Undersecretary for Railways Timothy John Batan na dahan-dahan na nilang dadagdagan ang kapasidad ng mga tren kaalinsabay ng pagbubukas ng ekonomiya, pero binigyang diin pa rin nito ang kahalagahan na masunod ng mga commuter ang minimum health standards.
Pangunahin na rito ang pagsusuot ng facemask, face shield at pagbabawal na kumain, at magsalita sa loob ng mga pampublikong sasakyan. Bawal pa ring sumakay ang mga pasaherong may sintomas ng Covid-19
Mahigpit ding ipinatutupad ang regular na disinfection, pagkakaroon ng maayos na ventilation at pagsunod sa physical distancing.
(Joan Nano | UNTV News)
METRO MANILA, Philippines – Nagsimula nang bumiyahe sa linya ng Philippine National Railways ang pinakabagong hybrid electric train na 100 percent gawang pinoy. Mismong ang mga engineer ng Department of Science and Technology ang bumuo at nagkonsepto ng disenyo at sistema nitong hybrid electric train.
Ito ang unang pagkakataon na bibiyahe ang hybrid electric train na mayroong sakay na pasahero. Bahagi ito ng isinasagawang validation test, na kinakailangang makumpleto sa loob ng 150 hours.
Mayroong dalawang power source ang hybrid electric train. Sa pamamagitan ng battery at generator magkatuwang nilang papatakbuhin ang tren kaya’t mas makakatipid ito sa konsumo ng diesel.
Binubuo ito ng 4 na bagon, fully-airconditioned at mayroong mga CCTV. Kaya nitong tumakbo sa bilis na 60 hanggang 80 kilometer per hour. Polycarbonate na rin ang materyales na ginamit sa bintana nito, kaya’t hindi madaling mabasag sakaling batuhin. Kaya nitong makapagsakay ng pito hanggang walong daang pasahero kada biyahe.
Umabot sa limang taon bago natapos ng DOST ang komposisyon ng hybrid electric train na nagkakahalaga ng 120 million pesos.
Sa ngayon ay libre pang makakasakay ang mga pasahero sa hybrid electric train. Tatagal ang libreng sakay hanggang sa May 23, kasabay ng isinasagawang validation test.
Bibiyahe pa lamang ang hybrid electric train ngayon mula Alabang hanggang Calamba, Laguna station.
Kumpara sa pangkaraniwang tren,mas malawak, malinis at malamig ang bagong hybrid train.
Sakaling makapasa, isasalang na ng PNR itong train sa kanilang revenue operations.
(Joan Nano | UNTV News)
Tags: DOST, Hybrid electric train, PNR
