Bahagyang lava flow, ilang mahihinang pagputok at pagbubuga ng abo. Ito lamang ang naitala ng Philippine Institute of Volcanology and Seismology o PHIVOLCS na aktibidad ng Bulkang Mayon sa nakalipas na weekend. Mas kakaunti ito kumpara sa mga naitalang sunod-sunod na aktibidad nito noong nakaraang linggo.
Kaya naman pinag-aaralan ng ahensya na ibaba sa alert level 3 ang Mt. Mayon mula sa kasalukuyang alert level 4. Ngunit ayon sa mga eksperto, masusing obserbasyon sa bulkan ang kanilang isasagawa sa susunod na dalawang linggo upang matiyak kung maaari nang ibaba ang alerto dito.
Paalala naman ng PHIVOLCS na kahit na ibaba man sa alert level 3 ang bulkan ay kritikal pa rin ang lagay nito.
Hangga’t may nakikita umanong pressure sa ilalim ng Mayon ay maaari pa ring magkaroon ng major eruption ang bulkan.
Samantala, ayon sa Albay Public Safety and Emergency Management Office, pinayagan nang makabalik sa kanilang mga bahay ang nasa pitong libong residente sa 3 barangay mula sa Legazpi City, 8 sa Camalig at 1 barangay sa Ligao. Sila ay nakatira sa labas ng 8-km extended danger zone.
Noong Biyernes ay ipinayagan na ng Office of the Civil Defense Region 5 na makauwi ang mga ito dahil sa pagbaba ng aktibidad ng bulkan.
( Mai Bermudez / UNTV Correspondent )
Tags: alert level 3, Mt. Mayon, PHIVOLCS
METRO MANILA – Itinaas sa alert level 2 o increasing unrest ng Philippine Institute of Volcanology and Seismology (PhiVolcs) ang Kanlaon volcano matapos ang pagsabog nito kagabi, June 3.
Naglabas ng nasa 5,000 metrong taas ng plume o usok ang bulkan.
Ayon sa ulat ng PhiVolcs, tumagal ng anim na minuto ang pagsabog nito.
Pinapayuhan naman ang publiko na iwasang pumunta sa 4 kilometer-radius permanent danger zone upang makaiwas sa posibleng pagsabog, rockfall at landslide.
Tags: Mt. Kanlaon, PHIVOLCS
METRO MANILA – Pinawi ng Philippine Institute of Volcanology and Seismology (PhiVolcs) ang pangambang gagalaw ang fault line ng Pilipinas kasunod ng malakas na lindol sa Taiwan.
Ayon sa PhiVolcs, hindi konektado sa mga faultline ng Pilipinas ang nangyaring lindol, at kung magkakaroon man ng lindol sa bansa ay hindi dahil sa 7.5 Taiwan quake.
Ayon kay Phivolcs Director Teresito Bacolcol, hindi rin mararamdaman ang pagyanig ng 7.4 magnitude na lindol ng Taiwan sa Northern Luzon.
Ang tanging maaaring maging banta lamang nito ay ang tsunami.
Tags: earthquake, PHIVOLCS, Taiwan
METRO MANILA – Posibleng magdeklara ng state of calamity ang probinsya ng Surigao Del Sur, kasunod ng 7.4 magnitude na lindol na tumama sa lalawigan noong Sabado (December 2) ng gabi.
Sa ngayon ay patuloy na nararamdaman ang malalakas na aftershocks sa probinsya.
Batay sa report ng Philippine Institute of Volcanology and Seismology (PHIVOLCS), halos 2,000 aftershocks pa ang naitala sa lugar hanggang kahapon (December 4).
Mayroong itong lakas na umaabot sa 1.4 hanggang 6.6 magnitude, kung saan 19 sa mga ito ang naramdaman.
Sa datos ng Provincial Disaster Risk Reduction and Management Office (PDRRMO), aabot na sa mahigit P58-M ang halaga ng pinsalang idinulot ng lindol.
Base sa naunang report, 2 ang naitalang nasawi, habang mahigit sa 57,000 mga pamilya ang naapektuhan ng kalamidad.
Kahapon (December 4), nagsimula na ang ang pamamahagi ng food packs ng Department of Social Welfare and Development (DSWD).
Tags: DSWD, PHIVOLCS, Surigao del Sur
