METRO MANILA – Ayaw magbaka-sakali ni Pang. Rodrigo Duterte pagdating sa kaligtasan ng mga estudyante at guro.
Ito ang pangunahing dahilan kung kaya ayaw pa rin niya na magsagawa ng face to face classes sa bansa liban sa mga pinahintulutang higher education institutions.
Sinabi ni Presidential Spokesperson Harry Roque na hangga’t walang bakuna ay ayaw muna ng pangulo na ipagsapalaran ang kalusugan ng mga ito.
“Nagdesisyon na po ang president ha, wala pa rin po tayong face-to-face classes sa bansa. mang sabi niya, ayaw po niyang malagay sa panganib o alanganin ang buhay ng ating mga mag-aaral at mga guro habang wala pa pong nababakunahan sa bansa.” ani Presidential Spokesperson Sec. Harry Roque.
Gayunman ayon sa malacañang, posibleng magkaroon ng limitadong face-to-face education sa Agosto oras na maging puspusan na ang inoculation program kontra Coronavirus Disease.
“Sabi niya, may awa po ang Panginoon, baka naman po pagkatapos nating malunsad ang ating vaccination program, pwede na tayong mag-face to face sa Agosto lalong-lalo na dun sa mga lugar na mababa po ang Covid Cases” ani Presidential Spokesperson Sec. Harry Roque.
Ayon kay Education Secretary Leonor Briones, batay sa datos, ang Pilipinas na lang ang hindi pa bumabalik sa in-person learning sa Southeast Asia.
Lumalabas din sa isinagawa nilang survey na pabor ang nakararaming estudyante sa muling pagkakaroon ng face-to-face clases.
(Rosalie Coz | UNTV News)
Tags: Face to Face class
METRO MANILA – Hinihintay na lamang ni Pangulong Rodrigo Duterte ang ipi-presentang rekomendasyon ng Inter-Agency Task Force (IATF) at Department of Education (DepEd) para sa planong pagsasagawa ng limited face-to-face classes ngayong Setyembre.
Ayon kay Presidential Spokesperson Harry Roque, nais munang makita ng pangulo ang ilalatag na plano ng mga ito bago mag-desisyon na payagan na ang physical learning ng mga estudyante.
Bukod sa rekomendasyon ng IATF at ng DepEd, kasama rin sa ikukonsidera ng pangulo, ang estado ng ekonomiya at vaccination, at kung papayagan ito ng mga lokal na pamahalaan.
“Ang sabi po ni presidente, baka iconsider na nya ang pilot at least kapag marami na ang nabakunahan…meron naman talagang mga lugar na napakatagal nang mgcq so baka pupuwede po sa mga lugar na yun pero hayan po muna natin magkaroon ng kumpiyansa ang ating presidente na hayaan ito dahil ang presidente mismo ay ama at lolo ng mga nagaaral sa mababang paaralan” ani Presidential Spokesperson Sec. Harry Roque.
Sa susunod na Linggo, inaasahang ilalabas ng DepEd at DOH ang isang joint memorandum circular na naglalaman ng guidelines, requirements at mga polisiya hinggil sa planong pagbubukas ng limited face to face classes.
Plano ng DepEd na umpisahan ang pisikal na klase sa elementary at high school sa darating na pasukan.
Ayon kay DepEd Undersecretary Nepomuceno Malaluan, sakaling aprubahan ng pangulo, nasa isandaang paaralan ang posibleng pagdausan ng pilot testing ng face to face classes. 95 eskwelahan sa elementary schools habang 5 naman sa senior high school.
“It will be confined or concentrated on early grades because that is the advice of the health experts but we were able to ask for the inclusion of some senior high schools with respect to those that are requiring tech-walk.” ani DepEd Usec. Nepomuceno Malaluan.
Ayon sa DepEd, lilimitahan lamang sa labindalawang estudyante kada-klase ang pahihintulutan sa kinder level.
Habang 16 na magaaral lamang para sa grades 1 2 at 3, at 20 estudyante lamang sa kada klase ang tatanggapin sa senior higschool.
Isa ang Pilipinas sa limang bansa sa buong mundo na hindi pa nagbabalik ng face-to-face classes gaya ng Bangladesh, Kuwait, Saudi Arabia at Venezuela.
Isa rin ang bansa sa mga inabot ng isang taon ang pagsasara ng mga eskwelahan na masyadong matagal kung ikukumpara sa iba pang mga bansa na tumagal lamang ng 79 na araw.
Nangangamba ang United Nations Children’s Fund (UNICEF) na kung palalawigin pa ang remote learning, ay lumala ang kaso ng mental distress, drop out, at child labor sa mga kabataan.
(Janice Ingente | UNTV News)
Tags: DepEd, Face to Face class
METRO MANILA – Tinitingnan ng Department of Education (DepEd) ang mga petsang August 23, September 6 at September 13 para sa opening ng school year 2021-2022.
At kasunod ng pag-aanunsyo nito ay naglalatag na rin ng plano ng Department of Health (DOH) katulong ang DepEd at mga pediatric society sa Pilipinas para sa unti- unting pagbubukas ng face-to- face classes ng mga batang estudyante.
“The plan is we will have pilot sites for this face -to face classes for children and the plan would be that we will start with the younger age because we know that among the age groups among children these younger age groups would have the least risk of getting infected” ani DOH Spokesperson, Usec Maria Rosario Vergeire .
Ngunit hindi pa detalyado sa plano kung anong age group ang mga makakasama dito dahil pinag-aaralan pa anila ito
At bagamat mayroong mga lugar na nakikita ang DOH na maaaring makasama sa pilot physical classes patuloy pang sinusuri ang mga ito.
“Isang daan yata itong mga paaralan na ito na magkakaroon ng face- to face classes pero dpat siguraduhin muna na ang mga metrics o ang mga pamantayan o panukatan na walang COVID cases sa mga lugar, low risk kanilang classificaton or walang reported daily new cases for the last 28 days” ani DOH Sec Francisco Duque III.
Ayon kay health Secretary Francisco Duque III, pilot testing pa lang ito at hindi pa ipatutupad sa buong bansa lalo’t wala pa naman sa hanay ng mga batang Pilipino ang nabakunahan na.
Dati nang sinabi ni Pangulong Rodrigo Duterte na nais nyang mabakunahan muna ang mga estudyante bago magbalik sa mga paaralan.
Ipinaliwanag naman ni Health Usec Maria Rosario Vergeire na mas maliit ang tyansang mahawa sa COVID-19 ang mga mas bata, na sinang-ayunan din ng mga eskperto.
Nguni’t kakailanganin pa rin aniya ang pag-apruba ni Pangulong Duterte bago tuluyang buksan ang face- to- face classes.
Ayon sa National Task Force Against COVID-19, sang-ayon naman ang mga guro na mabakunahan muna bago magbalik sa face- to- face classes.
Ngunit ayon kay NTF Special Adviser Dr Ted Herbosa, naka- depende ang dami ng mababakunahan sa hanay ng mga guro sa supply ng COVID-19 vaccines.
Sinabi naman noong Martes ni IATF Chief Implementer at Vaccine Czar Sec Carlito Galvez Jr na kung sakaling may available na bakuna para sa mga bata, pwede na itong umpisahan sa 4th quarter ng taon.
Kabilang sa mga pinag-aaralang ibigay sa mga menor de edad na Pilipino ang COVID-19 vaccines ng Pfizer, Moderna at Sinovac.
(Aiko Miguel | La Verdad Correspondent)
METRO MANILA – Nanawagan ang mga senador sa Department of Education na muling isulong ang naunsyaming pilot testing sa face to face classes. Sa pagdinig ng Senate Committee on Basic Education kahapon,
Naaprubahan na ito noong Disyembre ni pangulong duterte na kalauna’y binawi dahil sa pangamba sa bagong variant ng covid-19 hanggang nagdesisyon ang pangulo na hangga’t walang bakuna, walang balik eskwela.
“Hinayang na hinayang ako sa nawalang taon sa ating kabataan. At sana mapatunayan sa sunod-sunod na hearing na talagang karapat-dapat lang na magbukas ang mga eskwelahan sa lalong madaling panahon. Nauna pa sana sa mga malls, sa mga sinehan, sa mga gaming arcade.” ani Sen. Imee Marcos.
“Parang kulang sa persuasive powers ang deped kasi tingnan ninyo, dapat papayagan na yung mga kabataan nating pumunta sa arcade centers, pwede na silang pumunta sa malls, hindi ko maintindihan, pero hindi sila pwedeng bumalik sa classrooms at a limited number of students.” ani Sen. Nancy Binay.
Batay sa datos ng UNICEF, isa ang Pilipinas sa nalalabing labing-apat na bansa sa buong mundo at ang kaisa-isa sa Asia Pacific Region na hindi pa sumusubok na magbalik eskwela simula nang tumama ang Covid-19 pandemic.
Ayon naman sa philippine pediatric society, may epekto rin sa mga bata ang matagal na hindi pagpasok sa eskwela.
“Disruptions can result in a significant learning loss, which can be quantified as 1 year school closure would be equivalent to 2 years of learning loss. And in the long term, there is a decreased motivation to learn. Some children may not return to school.” ani Philippine Pedriatic Society Dr. John Andrew Camposano.
Ayon kay Senator Sherwin Gatchalian, dapat nang subukan ang pilot testing dahil may mga pag-aaral sa Amerika na ligtas sa mga pag-aralan basta’t nasusunod ang safety protocols.
“We should get ready for that eventuality. Hindi naman ho dapat marami, we can actually start in areas which has zero covid (cases).” ani Senate Committee on Basic Education Chairperson, Sen. Sherwin Gatchalian.
Panukala rin ni Senator Francis Pangilinan, bawasan muna kahit sa 100 ang mga eskwelahan na sasailalim sa pilot testing.
Nakahanda naman umano ang DepEd sakaling mapayagan nang muli ang pilot testing program. Tatalakayin naman nito ang mga naging rekomendasyon sa pagdinig.
Nasa isang libong eskwelahan ang tinatayang sasailalim sa pilot testing sa buong bansa na limitado sa MGCQ areas.
May susundin na mahigpit na checklist ang mga eskwelahan, lgu at maging ang mga magulang upang matiyak ang kahandaan at pagsunod sa health protocols.
Ang ilan grupo, sang ayon din na maisulong na ang pilot face-to-face classes dahil na rin sa hamon ng distance learning.
Suportado naman ng dilg ang panukala. Tiniyak din nito na kasama ang mga guro sa “essential workers” na kabilang sa priority list ng vaccination program.
Muling haharap ang DepEd sa komite sa susunod na linggo para ilahad ang detalyadong plano para sa pilot face-to-face classes.
(Harlene Delgado | UNTV News)
Tags: DepEd, Face to Face class
