Ipinatitiyak ng Pangulong Benigno Aquino III sa mga opisyal ng barangay ang pagpapatuloy ng maayos na pagpapatupad ng Bottom up Budgeting.
Sa talumpati ni Pangulong Aquino sa National Assembly ng Liga ng mga Barangay, binigyang diin nito na pera aniya ng taumbayan ang gagamitin dito kaya dapat aniya maiukol ito sa tamang paggagamitan.
Ang bottom-up approach sa pagba-budget ay pagpaplano ng isang komunidad kasama ang mga mamamayan nito para sa ilalaang pondo sa barangay.
Samantala, ibinida din ng pangulo ang mga programa ng kaniyang administrasyon na nagbibigay aniya ng pagkakataon sa mga komunidad para sa positibong transpormasyon.
Ayon sa Pangulo, P74.06 bilyon na ang nailaan para sa mahigit na limampung libong (54,000) aprubadong Bottom up Budgeting projects ng pamahalaan.
Sinamantala naman ng Pangulo na iendorso ang tambalang Mar Roxas at Leni Robredo sa mahigit na isang libong opisyal ng barangay na dumalo sa pagtitipon.
Umapela ito na maipagpatuloy ang programa ng kaniyang administrasyon sa pamumuno ng kaniyang kandidato.
(Jerico Albano / UNTV Radio Reporter)
Tags: Bottom up budgeting, implementasyon, mga opisyal ng barangay, Pangulong Aquino
Bulto bultong mga dokumento ang bitbit ng grupong citizens crime sa Office of the Ombudsman. Nakapaloob dito ang mga ebidensya ng grupo laban kay dating Pangulong Benigno Aquino III.
Sinampahan ng reklamong plunder, malversation at graft and corruption ng citizens crime si Aquino dahil sa anila’y maanomalyang pagbili at paggamit ng Dengvaxia vaccine. Ito na ang ikatlong reklamong isinampa laban kay Aquino kaugnay ng Dengvaxia controversy.
Kasamang inireklamo ng grupo sina dating Executive Secretary Paquito Ochoa, dating Budget Secretary Butch Abad, dating Health Secretary Janette Garin at 15 iba pang mga kasalukuyan at dating opisyal ng Department of Health.
Ayon kay Diego Magpantay, ang presidente ng grupo, malinaw sa isinagawang imbestigasyon ng Senado na hindi dumaan sa tamang proseso ang pagbili ng Dengvaxia at nasayang lang ang pera ng pamalahaan dahil dito.
Anila, sa 3.5 bilyong piso na budget para sa proyekto, 500 milyong piso dito ang unaccounted.
Ayon naman kay Atty. Abigail Valte, legal counsel at tagapagsalita ni Aquino, ang panibagong reklamong ito ay hindi talaga para mapanagot ang sinoman kundi nais lamang umano ng mga complainant na magkaroon ng pwesto sa gobyerno.
Pero nilinaw ni Valte na sa handa ang dating pangulo na harapin ang lahat ng mga reklamong laban sa kanya.
( Grace Casin / UNTV Correspondent )
All systems go na ang pagpapatupad ng Public Utility Vehicle Modernization Program ng pamahalaan sa susunod na taon.
Ayon sa Land Transportation Franchising and Regulatory Board, sa Biernes magkakaroon ng pilot testing sa implementasyon ng PUV Modernization Program sa Tacloban City.
Ayon kay LTFRB Chairman Martin Delgra, may tatlong developmental routes na ang naaprubahan sa tatlong relocation sites ng lungsod.
Subalit muling nagpaabot ng kanilang pagtutol ang ilang jeepney operator at drivers sa programa.
Iginiit naman ng LTFRB na walang magiging pagtaas sa pamasahe kapag ipinatupad na ang modernization program.
Samantala, may panibagong babala naman si Pangulong Rodrigo Duterte sa mga transport group na Pinagkaisang Samahan ng mga Tsuper at Opereytor Nationwide o PISTON.
Lumalala umano ang suliranin sa polusyon sa hangin sa bansa subalit nananatiling nagmamatigas ang mga ito laban sa jeepney modernization program ng pamahalaan.
( Mai Bermudez / UNTV Correspondent )
Nagharap ang mga lider ng ilang transport group at mga opisyal ng Department of Transportation sa pagdinig sa Senado kahapon kaugnay ng jeepney modernization program ng pamahalaan.
Dito muling inihayag ng mga transport group ang kanilang hinaing tungkol sa planong phaseout ng mga lumang jeep. Karamihan anila sa kanilang mga tsuper ay nababahala na mawalan na ng pagkakakitaan oras na magsimula ito.
Ipinaliwanag naman ni Transportation Secretary Arthur Tugade na ang programang ito ay dumaan sa maraming konsultasyon.
Hindi rin aniya maaaring idahilan na masyadong mahal ang halaga ng modernong jeep, dahil hindi lamang 1.5 million pesos ang halaga nito dahil meron ding tig-800 thousand pesos nito.
Huwag rin dapat panghinayangan ang gagastusin dito kumpara naman sa return of investment na maaarinng kitain ng isang driver. Ngunit bukas umano sila na isaalang alang ang hinaing ng mga stakeholder sa programang ito.
Apela ni Senator Poe na kung maaari ay payagan pang bumiyahe ang mga jeep na papasa naman sa safety standards. Pakiusap pa ng senador, hayaan munang makapag-adjust ang transport sector sa programang ito bago gawing mandatory o full blast.
( Nel Maribojoc / UNTV Correspondent )
Tags: implementasyon, jeepney modernization program, Sen. Grace Poe
