Sa halip na dumalo sa preliminary investigation kahapon, nakipagkita kay Sec. Vitaliano Aguirre ang isa sa mga miyembro ng Aegis Juris Fraternity na si Mark Ventura. Respondent ito sa mga reklamo kaugnay ng pagkamatay ni Horacio Castillo III.
Sa pagharap kay Sec. Aguirre, nagpahayag umano ito ng kahandaang tumestigo sa kaso. Ayon sa kalihim, nagbigay na ng salaysay si Ventura at idinetalye nito ang ginawang hazing kay Atio.
Batay aniya sa salaysay ni Ventura, inumpisahan ang initiation rites sa pamamagitian ng pagsuntok kay Atio sa braso. Sampung miyembro umano ng frat ang halinhinang gumawa nito na tumagal ng isang oras.
Ginamitan din umano ito ng spatula upang pahupain ang pamamaga ng braso. Pagkatapos nito ay saka umano sinimulang hampasin ng paddle si Atio. Pero pinalo pa ito ng isang beses nang bahagyang mahimasmasan kaya’t tuluyan itong nawalan ng malay bandang alas singko ng umaga.
Dito na umano tinawag ng grupo si John Paul Solano na isang medical technologist. Ngunit sa kabila ng pagsisikap ni Solano na i-revive ito ay wala ring nangyari kaya’t isinugod na ito sa Chinese General Hospital kung saan idineklara itong dead on arrival.
Ayon kay Aguirre, tinanggap na sa Witness Protection Program si Ventura. Aminado rin umano ito na isa siya sa mga nanakit kay Atio bilang second master initiator.
Nasa dalawampung miyembro umano ng fraternity ang kasali sa initiation rites kay Atio. Bukod sa mga nanakit dito, may mga kasama rin silang nag-videoke at nag-inuman upang pagtakpan ang ingay ng hazing.
Ayon sa kalihim, lahat ng mga ito ay dawit din sa reklamo.
( Roderic Mendoza / UNTV Correspondent )
Tags: Aegis Juris Fraternity member, Mark Ventura, Sec. Vitaliano Aguirre
Kausap ni Justice Sec. Vitaliano Aguirre ang nasa tatlumpung kaanak ng mga biktima ng Maguindanao Massacre nitong nakaraang Lunes.
Ayon sa kalihim, kasama ng mga ito ang kanilang abogado na si Atty. Nena Santos at inaalam kung anong tulong pa ang maibibigay ng Department of Justice sa kanilang kaso. Sabi pa ni Aguirre, alam niya na kaya nagtatagal ang paglilitis sa kaso ay dahil sa dami ng mga biktima at akusado.
Sa nakalipas na walong taon, 115 akusado na ang naaresto. Dalawa rito ang ginawang testigo sa kaso, apat ang namatay sa kulungan kabilang na si Andal Ampatuan Sr., at lima ang naabswelto.
Sa ngayon, 103 akusado na lamang ang nililitis sa sala ni Judge Jocelyn Solis-Reyes ng Quezon City RTC Branch 221.
Tatlumpu’t isang akusado ang tapos nang magpresenta ng kanilang depensa habang 34 pa ang nagpipresenta ng kanilang ebidensiya. Anim na Justice Secretary na ang dinaanan ng kaso kaya ayon kay Sec. Aguirre, nais niyang matapos na ito sa panahon ng kaniyang termino.
Dati nang nagbigay ng direktiba ang Korte Suprema na pwede nang mahatulan ng bukod ang mga akusadong natapos nang litisin.
( Roderic Mendoza / UNTV Correspondent )
Limitado lamang ang detalye na ibinigay ng Aegis Juris Fraternity member turned state witness na si Marc Ventura sa muling pagpapatuloy ng pagdinig ng senado sa kaso ng hazing victim na si Horacio “Atio” Castillo III.
Ayon sa mga senador, ito ay upang hindi makaapekto sa kaso. Kabilang sa isinalaysay ni Ventura ang mga huling sandali ni “Atio” sa initiation rites noong September 17.
Aniya, apat ang halinhinang pumapalo kay Atio bago ito nawalan ng malay. Nagawa pa anila itong i-upo at kausapin matapos bumagsak ngunit hindi na ito nagrerespond. Kwento pa ni Ventura, tumagal ng nasa tatlumpung minuto bago dalhin sa ospital si Atio.
Nagpahayag naman ng pagkadismaya sina Senators Juan Miguel Zubiri at Grace Poe kay John Paul Solano na una nang inaasahang magbibigay ng konkretong detalye sa krimen. Dahil ito sa tila pagninisi ni Solano sa sakit sa puso ni Atio kaya ito nasawi.
Gayunman, taliwas ito sa resulta ng final autopsy ng PNP kay Castillo. Muli namang umapela ang magulang ni Atio na tuluyan nang ipagbawal ang hazing.
Samantala, mananatili namang nakadetine sa senado ang itinuturong lider ng Aegis Juris na si Arvin Balag habang hinihintay ang resulta ng petisyon nito sa Korte Suprema.
( Asher Cadapan Jr. / UNTV Correspondent )
Tags: Aegis Juris Fraternity, Atio, Mark Ventura
