METRO MANILA – Ipinagkaloob ng pamahalaan noong Martes (Marso 30) ang P1.56-M o tig-P65,000 na tulong pinansiyal sa 24 na dating rebelde sa Baler, Aurora kaugnay sa Enhanced Comprehensive Local Integration Program (E-CLIP).
Kinumpirma ni Lt. Col. Reandrew P. Rubio, 91st Infantry “Sinagtala” Battalion Commander, na bukod sa nasabing ayuda ay makatatanggap din sila ng mga pabahay mula sa National Housing Authority (NHA).
Bibigyan din sila ng prayoridad sa edukasyon at sa mga training na isinasagawa ng Technical Education and Skills Development Authority (TESDA), Department of Trade and Industry (DTI) at Department of Agriculture (DA).
Ang E-CLIP ay isang programa sa ilalim ng Executive Order No. 70 ni Pangulong Rodrigo Duterte o ang Whole-of-Nation Approach na naglalayong tulungan ang mga dating kasapi ng Communist Party of the Philippines (CPP), New People’s Army (NPA) at National Democratic Front (NDF) na makapagbagong-buhay.
(Rhuss Egano | La Verdad Correspondent)
Tags: Baler, Dating Rebelde, Pinansyal
Sinisimulan na rin ng lokal na pamahalaan ng Baler, Aurora na ilipat sa mas ligtas na lugar ang mga pamilyang nasa mga danger zone tulad ng ilang mga nasa coastal area.
Ayon sa Local Disaster Risk Reduction and Management Office, matagal na nila itong plano ngunit ang ilan sa mga pamilya ay tumatangging lumipat ng tirahan dahil sa kanilang mga hanapbuhay.
Ang mga residente sa coastal area sa Baler, Aurora ang madalas na pinalilikas tuwing may bagyo dahil sa banta ng storm surge tulad na lamang ng nakalipas na Bagyong Ompong at Rosita.
Tags: bagyo, Baler, coastal area
Maaliwas na ang panahon sa bayan ng Baler, Aurora ngayong araw.
Mas payapa na rin ang dagat kumpara noong manalasa ang Bagyong Rosita, dahilan naman upang alisin na rin ng lokal na pamahalaan kahapon ang suspensyon sa lahat ng tourism activities na ipinatupad noong Lunes dahil sa sama ng panahon.
Ayon sa Aurora Provincial Disaster Risk Reduction and Management Council, hindi rin nila maaaring patagalin ang suspensyon dahil na rin sa bugso ng mga turista ngayong long holiday.
Gaya ng inaasahan, dagsa ang mga turista ngayong araw.
Ngunit dahil sa naranasang bagyo ng bayan ng Baler, hindi pa gaanong maganda ang takbo ng bentahan ng mga tindahan sa Sabang Beach.
Kahit ang ilang surfing instructor ay umaaray sa epekto ng nagdaang bagyo.
Umaasa naman ang mga negosyante na agad na makakabawi dahil sa magandang panahon ngayon sa Baler, Aurora.
( Nel Maribojoc / UNTV Correspondent )
Tags: Baler, tourism activity, turista
Ilan sa mga barangay sa Baler, Aurora tulad ng Barangay Sabang ang lumubog na sa baha kahapon dulot ng malakas na alon sa dagat na umaabot na sa residential area. Umabot ng lagpas tuhod ang lalim ng tubig. Dulot ito ng malakas na alon at sinabayan pa ng high tide ng dagat ng Baler.
Ayon sa mga residente, bihira nila itong maranasan maliban na lamang kapag may paparating na bagyo.
Dahil dito, nanawagan na ang mga lokal na opisyal sa residenteng nakatira sa dagat na boluntaryo nang lumikas.
Itinaas na sa red alert status ng lokal na pamahalaan ng Baler ang kanilang lugar.
Pansamantala munang ipinagbabawal ang paglangoy at surfing sa lugar habang hindi pa natatapos ang pananalasa ni Bagyong Rosita. Ngunit sa kabila nito, may ilan pa rin na hindi nagpapigil bagaman alam nilang delikado na ang surfing activities.
Alerto na rin ang rescue units at evacuation centers ng Baler dahil sa paparating na bagyo.
Kahapon, umabot sa nasa dalawampung pamilya ang nailikas at kasalukuyang nasa evacuation center na ng Baler.
( Nel Maribojoc / UNTV Correspondent )
Tags: Bagyong Rosita, Baler, coastal area
