Dinagsa ng mga supporters at kamag-anak mula sa ibat-ibang lugar ang libing ni Ozamiz City Mayor Reynaldo Parojinog Sr., kanyang asawang si Susan at dalawang kapatid.

Tinatayang nasa mahigit tatlong libo ang nakiramay at nakiisa sa kanilang pagdadalamhati. Ilan sa mga ito ay nakasuot pa ng statement shirts na nananawagan ng hustisya sa sinapit ng pamilya ng kanilang alkalde.

Pasado alas dos ng hapon nang mailagak ang labi ng mga Parojinog sa Mausoleum sa Mt. Malindang Memorial Garden.

Pinabulaanan naman ng pamangkin ni Mayor Parojinog na si Aido Vasquez ang napabalitang kaguluhan sa araw ng libing at pagbabayad umano ng mga tao upang dumalo sa libing.

Si Mayor Parojinog, kasama ang ilang kaanak ay napatay ng mga tauhan ng CIDG Region 10 sa isinagawang raid sa kanilang bahay noong July 30.

Samantala, ilan sa mga kaanak ng mga Parojinog ang muntik ng mahimatay matapos ang libing dahil na rin sa sobrang init. Isa na dito ang anak ni Vice Mayor Nova Princess na si Sofia na agad naman nirespondehan ng UNTV News and Rescue.

Hindi naman nakarating sa libing ang magkapatid na Reynaldo Jr. at Nova Princess matapos hindi payagan ng korte dahil na rin sa isyung pangseguridad.

(Weng Fernandez / UNTV Correspondent)

Tags: CIDG Region 10, Ozamiz, Parojinog