Problemang pinansyal ang kadalasang nag-uudyok sa ilang mga Pilipino na magtrabaho sa ibang bansa at mapilitang iwanan ang kanilang pamilya.
Kaya naman, sa ikapitong OFW and Family Summit ng Villar Social Institute for Poverty Alleviation and Governance o Villar SIPAG, ilang mga pamamaraan para kumita ng pera ang ibinahagi sa mga OFW.
Layon nito ay upang mabigyan sila ng alternatibong mapagkakakitaan upang huwag nang mangibang-bayan. Katuwang din dito ng foundation ang iba’t-ibang ahensya ng pamahalaan tulad ng DFA, DOLE, DTI at iba pa.
Sa taong ito, nakasentro ang programa sa pagtuturo ng kabuhayan sa agrikultura. Na-inspire naman ang mga dumalong OFW na mag-invest para makapagsimula ng negosyo sa Pilipinas.
Panawagan nila sa pamahalaan na patuloy na magsagawa ng ganitong mga programa upang matulungan silang manatili na lamang sa bansa kasama ang kani-kanilang pamilya.
Bukod sa mga pangkabuhayan seminar, nagsagawa rin ng mga talakayan para maprotektahan ang mga OFW sa mga scammer, illegal recruitment at human trafficking.
( Leslie Longboen / UNTV Correspondent )
Tags: agrikultura, OFW Summit, Villar SIPAG
METRO MANILA – Batay sa datos ng Department of Agriculture (DA) nasa P141-M na ang halaga ng pinsalang iniwan ng bagyong Karding sa agrikultura sa bansa.
Nasa 740 na mga magsasaka ang naapektuhan at 16,299 ektarya ng agricultural areas.
Kasama sa mga nasira ng bagyo ang palay, mais at gulay mula sa Cordillera Administrative Region (CAR), Ilocos Region, Central Luzon, at Calabarzon.
Sa Nueva Ecija dumapa ang mga palay na malapit na sanang anihin. Top producer ang Nueva Ecija pagdating sa produksyon ng palay sa bansa.
Ayon naman sa DA, may nakahanda naman silang binhi at iba pang ayuda para sa mga naapektuhan ng bagyo.
Tags: agrikultura, Bagyong Karding, pinsala
Hinimok ng Department of Agriculture (DA) ang mga lokal na pamahalaan sa Eastern Visayas na palawigin pa nito ang kakayanan ng rehiyon sa pagtuklas ng mga makabagong potensyal sa agrikultura ng rehiyon upang matugunan ang ang kakulangan sa supply ng agrikultural na produkto sa rehiyon.
Sa isang pahayag ni DA Eastern Visayas Regional Executive Director Angel Enriquez nitong Martes (Dec. 1), sinabi nitong kailangan ng mga Local Government Unit (LGU) na suriing muli ang food security development plans nito at tingnan kung ano ang natatangi sa kani-kanilang komunidad na makatutulong upang umunlad ang sektor ng agrikultura.
“There is so much to be discovered in agriculture in this part of the country. The entire region is not yet sufficient for rice, but if we can consume other crops, then that would help,” ani DA Eastern Visayas Regional Executive Director Angel Enriquez.
Sa tala ng DA nasa 93.43% ang kayang isustinang palay ng rehiyon. Hindi ito sa sapat sa 559,357,303 kg na consumption requirement kung saan nasa 522,592,723 kg lamang ang naaani ng mga magsasaka taon-taon.
Bilang bahagi ng pagsisikap ng ahensya na maragdagan pa ang bilang ng rice output sa gitna ng kinakaharap na pandemya ay nakatakdang mamahagi ang regional office ng aabot sa 113,500 kasakong binhi ng palay at 253,000 naman na fertilizers sa mga magsasaka sa darating na September to March 2021 cropping season.
Ito ay nakapaloob sa Rice Resiliency Project (RRP) ng DA na layong matugunan ang maaaring maging kakulangan sa supply ng produkto agrikultural sa bansa sa gitna ng dinaranas nitong pandemya.
Ayon kay Enriquez nasa PHP 538M ang nakalaan sa Region VIII mula sa PHP 24B stimulus fund ng RRP para sa farming sector sa bansa sa ilalim ng Bayanihan to Recover as One Act o Bayanihan.
(Syrix Remanes | La Verdad Correspondent)
Tags: agrikultura
Tiniyak ng kagawaran ng agrikultura na makakatanggap ng ayuda ang mga magsasaka pati na rin ang mga mangingisda na naapektuhan ng Bagyong Rolly.
Kasabay ng P400M na quick response fund, magkakaloob din ng 133,326 na sako ng bigas, 17,545 na sako ng mais at 1,980 kilo ng sari-saring gulay. Ito ay mga binhi na manggagaling sa opisina ng rehiyon kaugnay ng kagawaran.
Handa rin silang mamahagi ng humigit-kumulang 10M piraso ng tilapia at mga binhi ng bangus kasama na ang mga gamit sa pangingisda at kagamitan. Ang mga ahensya naman na kaakibat ng Kagawaran tulad ng Agricultural Credit Policy Council (ACPC) at Philippine Crop Insurance Corporation (PCIC) ay nag-aalok ng programa ng pautang at pondo upang makatulong sa mga pagkaluging naranasan ng mga magsasaka dulot ng malakas na bagyo.
Dahil sa maagang payo na ginawa ng Kagawaran bago pa pumasok ang bagyong Rolly sa bansa, ilang ektarya rin ng palayan at maisan ang naisalba. Nagkakahalaga ng mahigit P17B ang natipid ng kagawaran dahil dito.
Patuloy ang pakikipag ugnayan ng kagawaran ng agrikultura sa mga lokal at nasyonal na ahensya ng pamahalaan pati na ang iba pang tanggapan na kaugnay sa Disaster Risk Reduction and Management.
(Beth Pilares |La Verdad Correspondent)
Tags: agrikultura, Bagyong Rolly
