Nanganganib nang maubos ang mga isdang hinuhuli sa tropical countries tulad ng Pilipinas dahil sa lumalalang epekto ng climate change.
Batay sa pag-aaral ng Fish-Based Information and Research Group Incorporated, posibleng maubos ang mga isda pagsapit ng taong 2050 dahil sa pabago-bagong klima sa karagatan, dagdag pa ang hindi wastong paraan ng pamamalakaya.
Sa kanilang pananaliksik, maaaring sanhi rin ng unti-unting pagkaubos ng mga isda ang iligal na paraan ng pangingisda gaya ng paggamit ng mga pampasabog at mga lambat na maliliit ang butas kaya pati mga isdang maliliit pa ang sukat at hindi pa nangingitlog ay nahuhuli rin.
Bunsod nito, namamahagi na ang grupo ng panukat isda o ruler sa mga fish port para malaman ang tamang haba ng mga isdang nalalambat bago ito tuluyang hulihin.
Halimbawa, para sa galunggong, dapat ay may sukat itong 12 to 13 centimeters, ang tulingan ay 32 to 38 centimeters, talakitok 29 centimeters, dalagang bukid 21 centimeters at samaral na dapat ay may habang 24 centimeters.
Nagpasalamat naman ang Bureau of Fisheries and Aquatic Resources sa tulong na naibibigay ng grupo.( Sherwin Culubong / UNTV News)
Tags: Bureau of Fisheries and Aquatic Resources, Fish-Based Information and Research Group Incorporated
MANILA, Philippines – Ayaw magpadalos-dalos ng Department of Agriculture (DA) sa paglalabas ng pahayag kung anong sakit ang pumapatay sa mga baboy sa bansa.
Ayon kay Agriculture Secretary William Dar, naiulat sa kanya noong Biyernes (August 16) ang mga insidente ng pagkamatay ng baboy subalit hindi rin niya pinangalanan kung anung mga lugar nangyari ito.
Tiniyak lamang niya na gumagawa na ng aksyon ang pamahalaan para solusyunan ito. Nais ng kalihim na matapos lumabas muna ang resulta ng confirmatory test o pagsusuri sa ibang bansa kung anong sakit ang naging dahilan ng pagkamatay ng baboy.
Ayon naman kay Bureau of Animal Industry Director Ronie Domingo, nais nilang maiwasang magkamali gaya ng nangyari sa ibang bansa. posibleng tumagal ng 2 Linggo hanggang 3 buwan bago matapos ang pagsusuri.
Pero ang Taiwan ay hinigpitan na ang mga pasaherong mula sa Pilipinas at padadaanin na sa inspeksyon ang mga bitbit na bagahe ng mga ito. Base umano sa kanilang mapagkakatiwalaang source ay African Swine Fever (ASF) ang pumatay sa mga baboy sa bansa.
(Rey Pelayo | Untv News)
Tags: baboy, Bureau of Fisheries and Aquatic Resources, Department of Agriculture
BATANGAS, Philippines– Mahigit 50 metriko toneladang tilapia at bangus ang namatay sa mga barangay na sakop ng Sta. Maria, Buco, Caloocan at Sampaloc sa bayan ng Talisay, Batangas noong Miyerkules, Enero 30.
Apektado ng fish kill ang 28 fish cages na tinatayang nagkakahalagang mahigit 6.8 milyong piso.
Ayon sa Bureau of Fisheries and Aquatic Resources (BFAR) Batangas, isang sulfur upwelling ang naranasan sa Taal Lake, bunsod ng malamig na panahon na dulot ng hanging amihan.
Ang sulfur upwelling ay isang natural na pangyayari sa lawa na nararanasan sa tuwing buwan ng Nobyembre hanggang Pebrero, kung saan ang tubig na may kasamang sulfur na nasa ilalim ay pumapaibabaw.
“Nagkaroon ng sulfur upwelling kahapon nang madaling araw, ‘yung nagkulay berde ang tubig dahil tag-lamig. Kapag malamig ang tubig bumibigat ang surface, ang tendency, pupunta sa baba, magkakaroon ng mixing from surface to bottom, mixing of water. Ang isa pang naka-trigger, hanging amihan at alon and then temperature,” paliwanag ni BFAR-Batangas Inland Fisheries Technology Outreach Station (BFAR-BIFTOS) officer-in-charge Nenita S. Kawit.
Sa ganitong tiyempo, pinabababa ng sulfur upwelling ang lebel ng dissolved oxygen sa tubig na siyang kritikal para sa mga isda sa lawa.
Kaugnay nito, hinihikayat ng BFAR ang mga local government officials na naka-palibot sa Taal Lake na maging mapag-matyag.
Pinaaalalahanan din ang mga fish cage operator na anihin na ang mga isda na maaari nang i-harvest upang hindi masayang.
Ayon pa sa BFAR, hindi ligtas na kainin ang mga nasabing isda.
Tags: bangus, Bureau of Fisheries and Aquatic Resources, fish kill, sulfur upwelling, tilapia
Nagpaaalala ang Bureau of Fisheries and Aquatic Resources sa mga mangingisda na mahigpit paring ipinagbabawal sa mga karagatang sakop ng Pilipinas ang panghuhuli ng mga butanding o whale shark at dolphins.
Noong nakaraang taon ay naging mainit ang isyu sa umano’y pahayag ng mayor ng Dumajog Cebu na papayag itong hulihin ang mga naglalakihang isda sa dagat gaya ng whale shark dahil nagiging kompetensya na ito ng mga mangingisda.
Subalit pinabulaanan naman ito ni Mayor Nelson Garcia at sinabing out of context ang mga balita tungkol dito.
Nasasakop ng Dumajog ang bahagi ng tañong straight na mayaman sa mga mammal gaya ng whale shark at dolphins.
Ayon sa BFAR, ang iligal na pangingisda ang dahilan ng pagkaunti ng mga isda.
Ayon sa general biologist at Naui Instructor na si Luis Heredia, hindi naman magiging kakompetensya ng mga mangingisda ang mga butanding dahil iba naman ang kinakain nito.
(Rey Pelayo/UNTV Radio)
