Hawak na Manila Police District ang dalawang testigo na magpapatunay ng kaugnayan ni John Paul Solano sa pagkamatay ng hazing victim na si Horacio Castillo III.
Ayon sa tagapagsalita ng MPD, saksi ang mga ito sa nangyaring initiation rites ng fraternity group. Bukod sa testimonya ng mga witness kasama sa mga iprenisentang ebidensya ng pulisya laban kay Solano ang mga CCTV footages kung saan nakitang kasama ng suspek si Castillo bago ito masawi. Nanindigan ang MPD na matibay ang kanilang hawak na mga ebidensya kay Solano.
Subalit una ng itinanggi ni Solano na may kinalaman siya sa pagkamatay ni Atio. Aniya tinawagan na lamang siya ng mga kasama sa Aegis Juris Fraternity upang magbigay ng medical assistance kay Castillo at siya na rin ang nagdala sa biktima sa ospital.
Patuloy namang pinaghahanap ng Manila Police District ang iba pang miyembro ng Aegis Juris Fraternity na kasama na ring na sinampahan ng reklamo sa Department of Justice kaugnay sa pagkamatay ni Atio.
Kasama rin sa mga respondent sa reklamo ang ilang miyembro ng Regina Sorority Fraternity na posibleng naroroon rin ng isinagawa ang initiation rites kay Castillo.
( Reynante Ponte / UNTV Correspondent )
Tags: Horacio Castillo III, John Paul Solano, MPD
