Naparalisa ang trapiko sa ilang kalsada sa Jeddah Saudi Arabia matapos ang naranasang dalawang oras na malakas na pag-ulan. Umabot hanggang bewang ang tubig baha sa Madinah Road, Kings Road, Malik Road at Andalus Road, dahilan upang tumirik ang maraming sasakyan. Makikita na isa-isang tinutulak ng mga residente ang mga sasakyang nalubog na sa baha.
Samantala, nangibabaw naman ang bayanihan spirit ng mga Pilipino. Sa video na ibinahagi ni Ibrahim Hamami, isang residente, makikita ang isang Pinoy na walang takot na lumusong sa malalim tubig upang masagip ang isang Saudi national na natrap sa loob ng kaniyang kotse.
Pinasuot ng Pilipino na si Dawood Farifada Balindong, 39 years old, tubong Pagadian City ng life vest ang Saudi national at itinawid sa mababaw na bahagi tubig.
Ayon kay Balindong, pinagbawalan na siyang lumapit ng mga Saudi rescuer dahil mapanganib at nasa drainage na ang sasakyan ngunit nag-atubili pa rin siya na masagip ang Saudi national. Mula ng i-post sa facebook ang video umani ito ng sari-saring reaksyon sa mga Saudi national.
Ayon kay Saeed Ali, nagpapasalamat siya at nailigtas ang kaniyang kababayan kasabay ang pagpapasalamat naman sa kay Balindong.
Sa ngayon ay mahigit 11-thousand na ang nagsheshare ng video ng pagsagip ni Balindong. Maliban Balindong, isang grupo rin ng Pilipino League of OFW Volunteers and Empowerment o LOVE ang tumulong naman sa ilan nating mga kababayan na na-istranded ang mga sasakyan.
Ayon sa General Authority of Meteorology and Environmental Protection, magpapatuloy ang mga pag-ulan sa siyudad hanggang ngayong linggo.
Nagpapalala naman ang konsulada ng Pilipinas sa Jeddah sa mga Pilipino na magdoble ingat at iwasan ang mga lugar na mga binaha.
( Mario Escoto / UNTV Correspondent )
Tags: baha, bayanihan, Jeddah Saudi Arabia
METRO MANILA – Inilapit ni Raquel Biason sa programa ni Kuya Daniel Razon na Serbisyong Bayanihan sa UNTV nitong Huwebes, April 23, ang tungkol sa karamdaman ng kaniyang anak na sanggol na si Baby Kyline na agad namang natugunan.
Si Baby Kyline ay mayroon pa lamang pitong buwan at siya ay nadiagnose sa National Children’s Hospital na mayroong Congenital Central Hypoventilation kung kaya dahil dito ay magsasagawa ng Tracheosmy o operasyon sa lalamunan ng bata sa katapusan ng buwan ng Abril.
Ang daing ng ina ay matulungan sila na magkaroon ng Mechanical Ventilator upang pagkatapos maoperahan ay mailabas na ng ospital si Baby Kyline. Dahil dito, sinabi ni Kuya Daniel Razon, ang host ng programang Serbisyong Bayanihan na antabayanan ni Raquel ang hinihinging tulong na magkaroon ng mechanical ventilator dahil ipapadala ito sa kaniya.
Bukod sa Mechanical Ventilator, nakapaskil sa Facebook Post ni Raquel Biason ang pangangailangan ng Tissue, Alcohol Non-Sterile, Gloves, Syringe, Sunction Cathether, Gauze, Diaper (Small), Wipes, Milk S26 Gold, Suction Machine, Oxygen Tank.
Kaya sa mga ibig tumulong ay makipag-ugnayan lamang sa Serbisyong Bayanihan upang makatulong tayo kahit sa maliit na paraan na ating magagawa.
Bago pa lumapit sina Raquel sa Serbisyong Bayanihan, may nag-initiate ng mag-fund raising para sa ventilator ni Baby Kyline at ito ay sa pangunguna ni Clara Alegria, Head ng BrandBuzz Ph at ng mga kasama nitong Mommy Vlogger at ilang celebrities.
Ang programang Serbisyong Bayanihan ni Kuya Daniel Razon ay sabayang mapapanood at mapakikinggan sa UNTV at Radyo la Verdad 1350 mula Lunes hanggang Biyernes, tuwing alas-9 ng umaga, alas-11 ng umaga at alas-4 ng hapon.
Tags: bayanihan, Serbisyong Bayanihan
Tuwing nagbabanta ang masamang panahon ay laging paalala ng Department of Health (DOH) sa publiko lalo na sa mga magulang, bantayan ang kanilang mga anak at pagbawalang magbabad at lumangoy sa baha dahil sa sari-saring sakit na maaaring makuha dito.
Bukod sa leptosprosis, kabilang sa mga malubha at nakamamatay na sakit na maaaring makuha sa baha ay ang dengue, cholera, ubo at sipon o trangkaso, mataas na lagnat at cholera.
Ayon kay DOH Undersecretary Eric Domingo, halo-halong pollutants ang nasa tubig baha lalo na sa mga lugar malapit sa estero, palikuran at sa mga sewerage system.
Pinakadelikadong mangyari ang makainom ng tubig baha ang isang bata na maaaring pagmulan ng diarrhea o kaya ay cholera.
Aniya, mahalaga na masiguro ng mga magulang na may suplay ng malinis na tubig inumin, pang-hugas ng kamay at panligo sa loob ng tahanan tuwing bumabagyo.
Paalala ng DOH, kapag nakaranas ng pagtatae ng mahigit apat na beses isang araw, magpa-ospital na upang maagapan ang dehydration.
Dapat din aniyang may naka-handang mga gamot sa ubo, sipon at lagnat sa bahay bilang pangunang lunas sa mga pangkaraniwang sakit.
( Asher Cadapan Jr. / UNTV Correspondent )
Bahagyang humina na ang buhos ng ulan dito sa Casiguran, Aurora ngunit nananatili pa ring malakas ang ihip ng hangin. Mula pa kaninang madaling araw ay nakaranas na ng malakas na pag-ulan ang munisipalidad.
Sa lakas ng hangin, ilang kubo at istraktura ang nabuwal. Hindi rin nakaligtas sa malakas na hangin ang mga poste at kable ng kuryente.
Binaha na rin ang ilang lugar sa Casiguran, kabilang na ang mga palayan. Maging ang mga kalabaw at baka ay tila hindi na makawala sa lalim ng tubig sa bukirin.
Lubog naman sa baha ang national road sa Barangay Calangcuasan dahil sa pagtaas ng tubig sa ilog, dinagdagan pa ang lakas ng alon ng dagat.
Ito lamang ang nag-iisang kalsada na patungo sa sentro ng Casiguran, Aurora, ang mga truck at bus ang nakakadaan sa baha. Walang magawa ang maliliit na sasakyan kundi ang maghintay na humupa ang tubig.
Ayon sa tricyle driver na si Jerry Balbero, ngayon lang uli nila narasan ang ganitong kalamidad na nagdulot ng malawakang pagbaha sa bayan.
Ang kalsada naman sa Baler-Dipaculao-Casiguran Road, nagbagsakan naman ang malalaking tipak ng bato na pilit na tinatanggal ng mga sundalo.
Ang ilang residente naman sa coastal area ng Casiguran ay nananatili pa rin sa kanilang mga tahanan sa kabila ng malakas na alon at hangin na dulot ng Bagyong Rosita.
Nananatili namang walang suplay ng kurtente ang buong bayan mula pa kagabi, ang ilan ay umaasa lamang sa baterya at generator.
Wala pang katiyakan kung kailan babalik sa normal ang suplay ng kuryente.
( Nel Maribojoc / UNTV Correspondent )
Tags: Aurora, Bagyong Rosita, baha
