Makati Friendship suite, ginagamit lamang sa political mileage ni VP Binay – Atty. Bondal

by dennis | April 17, 2015 (Friday) | 4293
File photo
File photo

Ginagamit umano para sa political mileage ni Vice President Jejomar Binay ang Makati Friendship suites bilang paghahanda nito sa kanyang mga ambisyong pulitikal.

Sa isang panayam sa programang huntahan, sinabi ni Atty. Renato Bondal, convenor ng United Makati Against Corruption na hindi naman nakikinabang ang mga taga-Makati sa ipinatayong Makati Friendship suites na nagkakahalaga umano ng P242 million na sinasabing overpriced ng P195 million.

Ipinahayag ni Bondal na ang naturang gusali ay ginagamit para sa mga opisyal ng 670 sister-cities sa bansa para makakuha ito ng suporta sa darating na pampanguluhang eleksyon sa 2016.

Samantala, ipinahayag naman ni Atty. JV Bautista, secretary general ng United Nationalist Alliance (UNA), na ang dapat kuwestyunin sa isyu ng overpricing ng Makati Friendship suite ay si dating vice mayor Ernesto Mercado dahil siya ang nanguna noon sa Sangguniang Panglungsod na gawing friendship suite ang mga gusali na unang ipinatayo para sana sa resettlement ng mga informal settler sa Makati.(UNTV Radio)

Tags: , , , , , ,

Pangulong Duterte, nangako ng 5-minutong biyahe mula Cubao hanggang Makati sa December

by Erika Endraca | June 10, 2019 (Monday) | 34288

MANILA, Philippines – Muling nangako si Pangulong Rodrigo Duterte na magkakaroon na ng improvement sa traffic sa EDSA sa buwan ng Disyembre.

Aniya, mula Cubao patungong Makati City, magiging 5 minuto na lamang ang travel time.

Isa sa mga campaign promise ng pangulo noong May 2016 elections ang pagresolba ng trapiko sa EDSA subalit hindi granted sa senado ang emergency powers na hinihingi ng economic managers nito.

Ipinauubaya naman ni Transportation Secretary Arthur Tugade sa susunod na kongreso kung maipagkakaloob ang emergency powers na hinihiling ng punong ehekutibo.

Si Senator-elect Francis Tolentino ang inaasahang magrefile ng panukala hinggil dito.

(Rosalie Coz | Untv News)

Tags: , ,

600 pamilya sa Makati City, naapektuhan ng sunog na umabot sa Task Force Bravo

by Radyo La Verdad | December 11, 2018 (Tuesday) | 37264

Nasa tatlong daang bahay ang nasunog sa Laperal Compound, Barangay Guadalupe Viejo bandang ala una ng madaling araw. Mabilis na tinupok ng apoy ang mga bahay sa lugar na gawa sa light materials at halos dikit-dikit na.

Bandang alas dose y medya naman ng umaga ay itinaas ng Bureau of Fire Protection (BFP) ang alarma ng sunog sa Task Force Bravo na hudyat ng pangangailangan ng nasa dalawampung fire trucks upang maapula ang apoy. Dakong alas singko y medya na nang ideklara ng BFP na fireout ang sunog.

Ayon sa kapitan ng barangay, hindi pa malinaw ang dahilan ng sunog dahil magkakaiba ang pahayag ng mga residente kaugnay ng insidente.

Sa inisyal na ulat ng BFP ay dalawa ang nagtamo ng minor injuries, kabilang ang isang residente at isang rescue volunteer. Aabot sa higit dalawang libong pamilya ang naapektuhan sa naturang sunog.

Kinumpirma ng lokal na pamahalaan ng Makati City na magbibigay ang mga ito ng ayuda sa mga naapektuhan ng sunog gaya ng pagkain, tubig at mga damit.

Ipagtatayo rin sila ng mga modular tents na pansamantalang masisilungan ng mga apektadong residente. Patuloy pang iniimbestigahan ng BFP ang tunay na sanhi at ang halaga ng pinsala ng sunog.

 

( Asher Cadapan Jr. / UNTV Correspondent )

 

Tags: , ,

Sanhi ng umano’y gas leak sa isang water drainage sa Makati City, patuloy na inaalam

by Radyo La Verdad | November 5, 2018 (Monday) | 16605

Bagaman bukas na sa trapiko ang Evangelista Street sa Bangkal, Makati City ay nananatili pa ring sarado ang katabing gasolinahan kung nasaan ang water drainage na may umano’y gas leak.

Simula nang ireklamo ng mga residente noong nakaraang linggo ang matinding amoy ng krudo sa lugar ay patuloy na inaalam ng mga otoridad kung saan nanggagaling ang umano’y gas leak.

Matapos makumpirma ng Bureau of Fire Protection (BFP) na may diesel content na lumulutang-lutang sa tubig ng naturang kanal at mataas ang fumes sa loob ng confined water drainage ay masugid ang mga pagsisiyasat na isinasagawa ng kawanihan.

Sumailalim ang mga apektadong kanal sa flushing at foaming upang ma-dilute o mawala ang diesel content sa tubig at mabawasan ang fumes.

Nakipagtulungan din ang gasolinahan ng Phoenix sa BFP, katuwang ang isang pribadong kumpaniya na Trans Overseas Industrial Corporation (TOIC) na nagsagawa ng mga testing.

Inalis ng mga ito ang lahat ng laman ng apat na tangke ng naturang gasolinahan at isinailalim sa pressure at hydro testing upang tiyakin kung saan nanggagaling ang leak.

Kahapon ay balik na sa normal ang lahat at wala na ang malakas na amoy ng krudo o fumes. Nagbukas na rin ang mga tindahan sa lugar at nananatili naman ang peace and orderliness dito sa pakikipagtulungan ng mga tauhan ng Makati City Police Station at lokal na pamahalaan.

Sa ngayon ay patuloy na naka-standby ang ilang kawani ng BFP kabilang ang isang fire truck nito. Nakatakda naman ang pagpupulong sa pagitan ng Phoenix management, city hall officials at Bureau of Fire Protection (BFP) bandang alas diyes ng umaga ngayong araw.

Inaasahang magbibigay ang mga ito ng pahayag kaugnay sa resulta ng mga testing na naisagawa at kung saan nga ba nanggagaling ang umano’y gas leak.

 

( Asher Cadapan Jr. / UNTV Correspondent )

Tags: , ,

More News