Nagsagawa na ng pre-emptive evacuation kagabi ang lokal na pamahalaan ng Albay sa loob ng 6 kilometer danger zone sa paligid ng bulkang Mayon. Dahil ito sa patuloy na aktibidad ng bulkan na posibleng mauwi sa pagsabog nito.
As of 11 pm kagabi ay mayroon nang 6,338 na mga individual o nasa 1,652 na mga pamilya ang nailikas mula sa dalawampu’t anim na barangay sa paligid ng bulkan. Pansamantalang nananatili ang mga ito sa ilang paaralan na ginawang evacuation center.
Tiniyak naman ng lokal na pamahalaan na nabibigyan ang mga ito ng kanilang pangangailangan tulad ng pagkain at inumin habang nasa evacuation center.
Samantala, naglagay na ng ilang mga pulis na magbabantay sa mga strategic area papasok ng 6 kilometer danger zone ang lokal na pamahalaan upang matiyak na hindi babalik ang mga residente sa kanilang bahay.
Ngayong araw ay inaasahang magsasagawa na rin ng forced evacuation ang Philippine National Police para sa mga hindi umaalis sa loob ng danger zone.
Pakiusap ng lokal na pamahalaan sa mga residente na sana ay huwag matigas ang ulo at sumunod sa kanilang ipinatutupad na precautionary measures dahil ito ay para na rin sa kanilang kaligtasan, lalo na at delikado sa kalusugan ang makapal na abo na ngayon ay bumabalot sa kanilang barangay.
Tags: inilikas na, Mt. Mayon, residente
Kinumpirma na ng Civil Aviation Authority of the Philippines na ang natagpuang aircraft malapit sa bunganga ng Mayon volcano ay ang nawawalang Cessna 340. Pero bago pa mapuntahan ang lokasyon nito, ibat-ibang panganib ang posibleng kaharapin ng mga rescuer sa nag aalburotong bulkan.
Nasa alert level 2 pa rin ngayon an Mt. Mayon. Ayon sa resident volcanologist na si Dr. Paul Alanis, mapanganib ang pagpasok sa 6 kilometer permanent danger zone ng bulkan.
Kung isasagawa ang search and rescue operation sa bumaksak na Cessna plane ay may kakaharaping panganib ang mga rescuer lalo na kung gagamit ng chopper.
“May possibility na magkaroon ng mga phreatic eruptions sa loob and ang danger nito unang una sa mga search and rescue operators dahil pwedeng magkaroon ng phyroclastic density currents. Next is kung may aircraft na ginagamit pwedeng mahigop yung mga debris na na ito ng mga makina and then magdulot ng isang aksident,” ani Dr. Paul Alanis, Resident Volcanologist, Mt. Mayon.
Matarik din aniya ang pinagbagsakan ng eroplano at nasa 2 kilometro pa ang taas nito. Kung maglalakad naman paakyat ng bulakan ay may panganib din sa mga daraanan gaya ng lahar o flash flood dahil sa mga nakaraang pag-ulan. Idagdag pa aniya dito ang mga naglalaglag na bato.
Kailangan lamang aniya ng magdala ng mga personal protective equipment ang mga rescuer kasama na ang mask dahil naman sa gas na posibleng ilabas din ng bulkan.
Una rito ay kinumpirma ng Civil Aviation Authority of the Philippines na ang natagpuang aircraft malapit sa bunganga ng Mayon volcano ay ang nawawalang Cessna 340, subalit hindi pa matukoy ang kondisyon o kalagayan ng mga crew at pasahero nito dahil hindi pa naaabot ng search and rescue team ang eksaktong lokasyon ng crash site dahil sa masamang lagay ng panahon.
Ayon sa PAGASA, inaasahang mababawasan ang mga pag-ulan sa mga susunod na araw sa Bicol region, kaya ayon sa weather specialist ng PAGASA na si Aldcsar Aurelio, hanggang Biyernes ay maaaring tumiyempo ang mga rescuer kung pupunta sa pinagbagsakan ng eroplano sa Mt. Mayon.
Pero pagdating ng Sabado at Linggo ay inaasahang lalakas uli ang amihan na magdadala ng mga pagulan.
Rey Pelayo | UNTV News
Tags: Cessna plane, Mt. Mayon
Ipinaliwanag ng Philippine Institute of Volcanology and Seismology (PHIVOLCS) na ang nakitang tila puting guhit sa dalisdis ng Bulkan Mayon sa Albay ay mga volcanic deposits sa naghalo sa tubig ulan kaya’t umagos ito sa paanan ng bundok.
Gayun man, nagpaalala pa rin ang Office of Civil Defense 5 sa local government unit ng mga bayang nasa paligid ng bulkan na maging alerto sa mga posibleng mangyari kung patuloy na magkakaroon ng pagaagus ng maraming tubig sa Mayon.
Patuloy din ang koordinasyon ng ahensya sa PHIVOLCS maging sa Albay Public Safety and Emergency Management Office hinggil sa kalagayan ng bulkan ngayong patuloy itong kinakikitaan ng aktibidad.
Nananatili pa rin sa ngayon sa alert level 1 ang Mt. Mayon.
Sa pinakahuling tala ng Office of Civil Defense (OCD) Region 5, nasa 16,376 families o mahigit sa 62 libong indibidwal ang patuloy na kinukupkop ng lokal na pamahalaan sa may 57 evacuation centers sa Albay. Galing ang mga ito sa 61 barangay sa Albay na apektado ng pag-aalboroto ng Bulkang Mayon.
Kaugnay nito, nanawagan ang OCD 5 sa mga non-government organization (NGO) na huwag magsawang tumulong sa mga residenteng apektado ng ipinakikitang abnormalidad ng Mt. Mayon.
Ayon kay OCD 5 Regional Director Clied Yucot, isa sa kanilang pinangangambahan ay ang tinatawag na donor fatigue o ang pagkaunti ng mga donasyon mula sa mga NGO.
Aniya, posibleng magtagal pa sa evacuation centers ang ilang displaced families dahil hindi pa ibinababa ang alert level ng Mayon. Kaya malaking tulong aniya ang donasyong ibinibigay ng mga NGO.
Pero paglilinaw ni Yucot, sapat pa naman sa ngayon ang suplay ng relief goods na mula sa lokal at national government subalit tatagal lamang umano ito ng isang daang araw.
Sa mga ibig tumulong o magpa-aabot ng donasyon, maaari silang makipag-ugnayan sa operation center ng OCD 5 sa pamamagitan ng telepono bilang 0915747880.
( Allan Manansala / UNTV Correspondent )
Tags: Albay, donor fatigue, Mt. Mayon, OCD 5
