KAWIT, CAVITE – Matagumpay na naisakatuparan ng Serbisyong Bayanihan sa Cavite ang pagbibigay ng serbisyo publiko katuwang ang Members Church of God International (MCGI) at Department of Social Welfare and Development (DSWD).
Ipinagkaloob ng programa ang libreng adult at pedia check-up, mayroon ding dental at optical check-up, haircut, reflex massage, legal services at chiropractic sessions.
Nagsagawa din ng registration para sa Pantawid Pamilyang Pilipino Program (4Ps) ang DSWD habang libreng pagpapakain at libreng groceries naman ang hatid ng MCGI para sa ating mga kababayan sa Cavite.
Sa kabuuan, umabot sa 5,500 ang napaglingkuran ng programa sa awa at tulong Dios.
(Eliza Fernandez | La Verdad Correspondent)
METRO MANILA – Malayo man o malapit, hindi nagpapigil ang Serbisyong Bayanihan (SB) sa layunin nitong makatulong sa kapwa, lalo na sa pagdiriwang ng ika-6 na anibersayo nito simula Lunes hanggang Biyernes, July 18-22.
Isa ang Brgy. San Juan, Taytay, Rizal sa mga lugar na dinalaw ng SB sa unang araw nito noong Lunes (July 18) katuwang ang Members Church of God International (MCGI) at ilang kawani ng pamahalaan upang maghatid ng iba’t ibang serbisyo gaya ng free store, feeding program, libreng gupit, checkup, bunot ng ngipin, legal consultation at marami pang iba.
Nagpasalamat naman ang kapitana ng Brgy. San Juan na si Roseller Valera sa mga serbisyong ibinigay ng SB na nagdulot ng kasiyahan at malaking tuwa sa kababayan at katutubo sa lugar.
Samantala, magkakahawig na serbisyo naman ang ipinagkaloob ng SB sa parehong araw sa iba’t ibang lugar ng bansa tulad sa Brgy. Palnab, Virac, Catanduanes, Brgy. Samburon, Lanao Del Norte, Batad, Iloilo, Brgy. Payatas, Quezon City at Sapang Kawayan, Masantol, Pampanga kung saan aabot sa 8,337 ang kabuuang natulungan sa unang araw.
(Marc Aubrey | La Verdad Correspondent)
Tags: Serbisyong Bayanihan
Pinuntahan ng Serbisyong Bayanihan (SB) team ang Manduae City, Cebu nitong Biyernes (February 18) upang bisitahin at kumustahin si teacher Clairesean Paul Facultad at ang kaniyang tindahang bigay ng MCGI Cares at programang SB.
Answered prayer para kay teacher Clairesean ang pagkakaroon ng munting tindahan, pagkakakitaan ang isa sa pangunahing daing niya sa Panginoon.
Ayon kay Clairesean bago pa magka pandemya ay tumigil ito sa pagtuturo at lumuwas pa Cebu para maghanap ng trabaho, ngunit hanggang ngayon ay hindi pa siya natatawagan.
Bagamat binata, dahil ulila na sa magulang ang pamilya ni Clairesean, bilang kuya siya na ang tumatayong magulang sa kaniyang pamilyadong kapatid na kapos din sa buhay.
Kaya sa kabila ng kakulangan sa pinansyal at maitutulong sa pamilya ay nagbakasakali ang dating guro na mag-comment sa Facebook page ng programa at laking tuwa nito ng siya’y matugunan na.
“Salamat po unang-una sa Panginoon sa ibinigay niya saakin, yung prayers ko na-granted na talaga at ginawa niyang instrumento ang MCGI na bukas ang loob na tumutulong sa kapuwa tao na katulad ko na ngayon ay wala pang mapagkakakitaan po.” ani Teacher Clairesean Paul Facultad.
Samantala, pinaplano ni teacher Clairesean na palakihin ang naipagkaloob sa kaniyang tindahan para mas makatulong at mabigyan ng kapital ang pamilyang naiwan niya sa Negros.
(Marc Aubrey Gaad | La Verdad Correspondent)
Tags: Serbisyong Bayanihan
Ipinagkaloob ng Members Church of God International (MCGI) at Serbisyong Bayanihan (SB) team ang hiling na paninda ni nanay Ruby Bacallo sa pagbisita ng grupo sa kanilang tahanan sa San Carlos City, Pangasinan nitong Biyernes (February 11).
Malaking bagay na sa pamilya ni nanay Ruby Bacallo ang natanggap na grocery items, dahil isa ang kanilang tindahan sa pangunahing pinagkukunan ng kanilang gastusin sa araw-araw.
Ayon kay nanay Ruby P350 lang ang kinikita niya sa kanyang trabaho habang nawalan naman ng mapagkakakitaan dahil sa pandemya ang kanyang asawa.
Hindi sumasapat sa kanilang pamilya ang kaniyang sahod kaya malaking tulong sa kanila na madagdagan ang kanilang paninda. Sa ngayon ay nag-aaral pa ang kanyang dalawang anak at kasama din nila sa kanilang bahay ang magulang ni nanay Ruby na kapwa may edad na.
Kaya naman naging emosyonal si nanay Ruby nang maisakatuparan na ng programa ang kaniyang kahilingan na mga karagdagang paninda.
“Salamat sa Dios kuya, maraming salamat sa MCGI. Maraming salamat kuya Daniel maraming-maraming salamat po” ani Nanay Ruby Bacallo .
Maliban naman sa mga grocery items, hindi man nabanggit ni nanay Ruby ay binigyan din siya ng isang tablet para sa pag-aaral ng kaniyang 2 anak.
(Marc Aubrey Gaad | La Verdad Correspondent)
Tags: MCGI Cares, Serbisyong Bayanihan
