Nabangga ng sport utility vehicle o SUV ang isang nagmomotorsiklo sa Rodriguez Corner San Diego Street sa Malabon City pasado alas onse kagabi.

Kinilala ang biktiman na si Arnold Santa Maria, dalawampu’t tatlong taong gulang na residente sa Valenzuela.

Nasa kritikal na kondisyon ngayon ang biktima matapos magtamo ng bali sa kaliwang binti, kaliwang braso at injury sa ulo.

Ayon sa nakakita sa pangyayari, parehong mabilis ang takbo ng SUV at motorsiklo.

Sa lakas ng pagkakabangga ay nayupi ang harapang bahagi ng motor.

Ayon sa isang nakakita sa aksidente, bumaba pa ng sasakyan ang driver ng kotse para silipin ang biktima subalit agad din itong umalis dahil hindi umano nito kasalanan ang aksidente.

Sa inisyal na imbestigasyon, kulay grey na toyota innova na may plakang ZAR118 ang sasakyan na nakabangga sa biktima.

Panawagan naman ng mga otoridad sa driver ng naturang SUV na sumuko na lamang upang hindi na lumaki pa ang kasong kaniyang haharapin.

(Macky Libradilla/UNTV Radio)

Tags: kritikal, Malabon City