Hindi kinatigan ng Sandiganbayan first at third division ang mosyon ng kampo ni Janet Lim-Napoles na mailipat siya patungong NBI detention facility mula sa Correctional Institution for Women sa Mandaluyong.
Sa halip, ipinag-utos ng anti-graft court na mailipat ang tinaguriang Pork Barrel Scam Queen sa Bureau of Jail Management and Penology sa Camp Bagong Diwa sa Taguig City.
Ayon sa korte, nakasaad sa batas na lahat ng mga akusado na dumadaan sa paglilitis ay dapat makulong sa BJMP facility at hindi sa kung saan pasilidad.
Sinabi rin ng korte na walang ebidensya na magpapatunay na hindi ligtas ang BJMP facility sa Camp Bagong Diwa.
Ipinunto rin ng korte na wala sa mandato ng NBI na kumupkop ng mga akusado lalo na ang mga sumasailalim pa sa paglilitis.
Sa ngayon mayroon pang isang nakabinbin na mosyon si Napoles sa fifth division na humahawak rin sa kanyang kasong graft at plunder.
Hinihintay pa ng korte ang sagot ng prosekusyon sa kaparehong argument.
Nag-isyu na rin ng commitment order ang Sandiganbayan first at third division at dinala na ito kaninang hapon ng sheriff sa BJMP.
Sa isang mensahe naman sa text, sinabi ng abogado ni Napoles na si Atty. Stephen David na plano nilang maghain ng motion for reconsideration matapos makakuha ng kopya ng resoluyon.
(Mon Jocson)
Tags: Janet Lim Napoles, NBI Detention Facility, Sandiganbayan
Nakangiti at bakas ang kasiyahan sa mukha ni dating Senador Jinggoy Estrada ilang minuto matapos ibaba ang hatol sa kaniyang matalik na kaibigan na si dating Senador Bong Revilla Jr.
Speechless daw siya sa pagkakataong ito matapos ilabas ang unang desisyon kaugnay ng pork barrel scam. Payo niya sa kaibigan na maglaan ng ‘quality time’ sa pamilya.
Isa si Estrada sa mga idinawit sa ten billion peso pork barrel scam. Subalit pansamantala itong nakalaya matapos payagan ng korte na magpiyansa ng 1.33 milyong piso.
Bukod kay Estrada, pinayagan din ng Sandiganbayan na makapagpiyansa ang kapwa akusado na si dating Senate President Juan Ponce Enrile.
Ayon sa isang legal expert at dean mula sa San Beda College of Law na si Ranhilio Aquino, kahit parehong plunder ang kaso nina Revilla, Estrada at Enrile kaugnay ng pork barrel scam, hindi ito nangangahulugan na ang desisyon sa kaso ni Bong ay siya ring magiging desisyon sa kaso ng dalawang dating mambabatas.
Bukod dito, ipinaliwanag ni Dean Aquino na may mga pagkakataon na bagaman ‘not guilty’ ang sintensya ay pinagbabayad pa rin ng korte ang dating akusado sa civil liability nito, tulad ng kaso ni Bong na ipinasasauli ang P124 milyon.
Sa ngayon ay nililitis pa rin ang kasong pandarambong ni Jinggoy sa Sandiganbayan. Umaasa naman siyang ma-aacquit siya sa naturang kaso.
( Mai Bermudez / UNTV Correspondent )
Tags: Bong Revilla, Jinggoy Estrada, Sandiganbayan
May utos na ang Sandiganbayan na arestuhin si dating first lady at ngayo’y Ilocos Norte Congresswoman Imelda Marcos matapos mahatulang guilty sa mga kasong katiwalian.
Batay sa kautusan ng Sandiganbayan 5th Division noong Biyernes, pina-iisyuhan ng warrant of arrest si Imelda dahil hindi sumipot sa pagbasa ng kanyang sentensiya.
Kinumpiska na rin ng Sandiganbayan ang inilagak nitong piyansa at pinapagpaliwanag sa loob ng tatlumpung araw.
Para sa ilang senador, hindi maaaring balewalain na lamang ang magiging bagong testimonya ng umano’y pork barrel scam mastermind na si Janet Lim Napoles.
Ito ay sa gitna na rin ng isyu na maaari umanong magamit si Napoles sa pulitika at madiin ang mga kalabang partido ng administrasyon.
Ayon pa kay Senator Panfilo Lacson, minsan na rin niyang nakita ang listahan ni Napoles na naglalaman ng pangalan ng mga mambabatas na umanoy nakinabang sa pork barrel scam.
Ngunit mas mabuti aniya na ipaubaya na lamang aniya sa Department of Justice (DOJ) o sa Office of the Ombudsman ang imbestigasyon sa kung gaano katotoo ang naturang listahan.
Para naman kay Senator Joseph Victor Ejercito, mas mabuti na idetalye na lahat ni Napoles ang kaniyang nalalaman upang may maidahilan aniya ang DOJ sa desisyon nito na mapasailalim si Napoles sa provisional witness protection program.
( Nel Maribojoc / UNTV Correspondent )
Tags: DOJ, Janet Lim Napoles, Pork barrel scam
