Laking pasasalamat ngayon ng bayan ng Canaman, Camarines Sur dahil sa natanggap nilang gamit na maaaring mapakinabang sa tuwing nagkakaroon ng matinding pagbaha sa kanilang lugar.
Ang flood early warning device ay isang uri ng instrumento na nagbibigay ng malakas na hudyat sa tuwing may pagtaas ng tubig sa isang lugar.
Maliban sa Canaman, makikinabang din sa flood early warning device ang mga karatig bayan kabilang ang lungsod ng Naga, Camaligan at Cabusao, Camarines Sur na kabilang sa Bicol River Basin at ilan sa mga flood prone area.
Base sa Marines Polytechnic Colleges Foundation, ang Barangay Mangayawan sa Canaman ang unang unang barangay na nakararanas ng pagtaas ng tubig baha sa tuwing may pag-apaw ang Bicol River Basin kaya dito nila inilagay ang instrument.
Ang instrumento ay nagkakahalagang P40,000 at sa susunod na linggo darating naman sa Canaman ang karagadagang kagamitan na general alarm device na magagamit sa iba’t-ibang uri ng sakuna maaaring maranasan ng isang lugar.
( Allan Manansala / UNTV Correspondent )
Tags: Bicol River Basin, Camarines Sur, flood early warning device
Tinambangan ng dalawampung hinihinalang miyembro ng New People’s Army ang convoy ni Food and Drug Administration Director General Nela Charade Puno sa Brgy. Napolidan Lupi, Camarines Sur kaninang pasado alas nuebe ng umaga.
Ayon kay PNP Chief PDG Oscar Albayalde, patungo sana sa Daet Camarines Norte ang convoy nang tambangan ng mga rebeldeng komunista.
Nasawi sa ambush ang tatlong police escort ni Puno na nakilalang sina SPO1 Percival Rafael, PO3 Carlito Navarroza at PO1 Ralph Jason Vida.
Sugatan naman ang apat na iba pang kasama sa convoy na pawang nakatalaga sa Camarines Sur Police Provincial Office at pansamantalang itinalaga kay Puno sa lugar. Agad isinugod ang mga sugatan sa Bicol Medical Center sa Naga City.
Agad namang nakipag-ugnayan ang Bicol PNP sa Philippine Army para sa hot pursuit operation. Nagsagawa din ng checkpoint ang mga pulis sa iba’t-ibang lugar sa Camarines Norte at Camarines Sur.
Sinabi pa ni PNP Chief PDG Oscar Albayalde na gagamit na ang PNP ng drone sa mga operasyon at upang makaiwas na rin sa mga ambush.
Pitong daang unit ng drone aniya ang ipamamahagi ng PNP sa mga regional mobile group sa iba’t-ibang lalawigan sa bansa sa lalong madaling panahon.
( Lea Ylagan / UNTV Correspondent )
Tags: ambush, Camarines Sur, FDA Director General Nela Charade Puno
Sa ngalan ng pangarap, dinayo ng mga aspiring singer mula sa Bicol Region ang pagbubukas ng WISHcovery auditions sa Naga, Camarines Sur.
Isa na rito si Jeva Antonio, 18 anyos na mag-aaral mula sa Caramoan, Camarines Sur.
High school days pa lamang ay nahilig na sa pagkanta si Jeva at sumasali na sa iba’t-ibang kompetisyon.
Ngunit higit sa pangarap na makilala sa larangan ng pag-awit, isang dalangin ang nais niyang matupad sa pamamagitan ng pagsali sa WISHcovery; ito ay ang makita at makilala ang kaniyang biological parents.
Hindi man nakilala ang tunay na mga magulang, masayang lumaki si Jeva sa piling ng mga taong itinuring niyang pamilya.
Kaya naman, malaki ang utang na loob niya sa mga ito.
Bagama’t hindi niya kailanman nakita, walang sama ng loob si Jeva sa kanyang biological parents.
Buo naman ang pag-asa ni Jeva na sa pamamagitan ng WISHcovery ay maabot ng kanyang tinig ang kanyang tunay na ama at ina.
( Leslie Longboen / UNTV Correspondent )
Tags: Camarines Sur, Jeva Antonio, wishcovery
Kabilang ang Mt. Isarog at Mt. Asog sa mga active volcano na matatagpuan sa Camarines Sur batay sa pag-aaral ng Philippine Institute of Volcanology and Seismology o PHIVOLCS.
Ayon sa Senior Science Specialist ng PHIVOLCS Region V na si Ed Laguerta, taong 1641 pa huling pumutok ang Mt. Isarog na isang andesitic strato volcano.
Ang Mt. Asog naman na kilala rin sa tawag na Mt. Iriga ay matatagpuan sa Iriga City at taong 1628 at 1642 pa ang pinakahuling naitalang phreatic explosion nito.
Ito ang dahilan kaya prayoridad ngayon ng ahensya na lagyan ng instrumento ang dalawang unmonitored active volcanoes sa probinsya.
Isang broadband seismograph ang nakatakdang ilagay ngayong taon sa 2 bulkan para makakuha ng impormasyon sa paggalaw o pagyanig sa bulkan.
Ngunit ayon kay Laguerta, hindi pa tiyak kung kailan ito mailalagay dahil kailangan pa nilang hintayin ang resulta ng bidding ng local government ng Camarines Sur sa lupaing paglalagyan ng instrumento.
Samantala, sinabi naman ng ahensya na walang dapat ipangamba ang mga residente sa paligid ng Mt Isarog at Mt.Asog dahil monitoring instrument lamang ang ilalagay sa mga bulkan.
(Allan Manansala / UNTV Correspondent)
Tags: Camarines Sur, monitoring device, Mt. Asog, Mt. Isarog, PHIVOLCS
