METRO MANILA – Nagtakda na ng mga panuntunang ipatutupad ang Inter-Agency Task Force kaugnay ng domestic travel ng mga indibidwal na fully vaccinated na kontra COVID-19.
Itinuturing na fully vaccinated ang isang tao, 2 linggo o higit pa pagkatapos nitong matanggap ang second dose ng 2-dose vaccine o first dose ng single-dose ng bakunang kabilang sa emergency use authorization list o compassionate special permit ng food and drug administration at emergency use listing ng World Health Organization (WHO).
Sapat nang i-presenta para sa interzonal travel ang COVID-19 domestic vaccination card na pirmado ng lehitimong vaccinating establishment.
O kaya ang certificate of quarantine completion na nagpapakita ng vaccination status mula sa Bureau of Quarantine at hindi na kinakailangan ang testing requirement ng lokal na pamahalaan bago o pagdating sa destination.
Interzonal movement ang pagbiyahe sa dalawang lugar na magkaiba ang community quarantine classification.
“Tama na po yung certificate of vaccination at hindi na kinakailangang magpakita ng PCR” ani Presidential Spokesperson Sec. Harry Roque.
Para naman sa intrazonal movement o pagbiyahe ng fully vacinated senior citizens sa 2 lugar na nasa ilalim ng General Community Quarantine at Modified GCQ, kinakailangan lamang magpresenta ng domestic vaccination card o certificate of quarantine completion na may vaccination status.
Kinakailangan namang sumailalim pa rin sa exposure screening pagdating sa local government of destination at sumunod sa public health protocols.
Kung close contacts ng probable at confirmed COVID-19 cases ang isang fully vaccinated individual, kinakailangang sumailalim sa 7-day quarantine period kung mananatiling asymptomatic.
Kung sasailalim naman sa RT-PCR test, isasagawa ito sa ika-5 araw mula sa petsa ng last exposure.
Hindi kinakailangan ang testing at quarantine sa close contacts na na-trace ng higit sa 7th day mula sa last exposure at walang sintomas ng COVID-19.
Kung positibo naman sa RT-PCR test at may sintomas, kinakailangang sundin ang testing at isolation protocols.
(Rosalie Coz | UNTV News)
Tags: COVID-19 Vaccine, IATF
METRO MANILA – Nakatakdang maglabas ng kautusan si Pangulong Ferdinand Marcos Junior upang pormal na bawiin ang State of Public Health Emergency sa bansa dulot ng COVID-19 pandemic.
Ayon kay Health Secretary Teodoro Herbosa, hinihintay na lang ang resolusyon na manggagaling sa Inter-Agency Task force for the Management of Emerging Infectious Diseases (IATF-MEID).
March 8, 2020 nang ideklara ni dating pangulong Rodrigo Duterte ang State of Public Health Emergency.
Tags: Covid-19, IATF, PBBM, State of Public Health Emenrgency
METRO MANILA – Kinumpirma ng Department of Health (DOH) kamakailan na nakapasok na sa bansa ang subvariant BQ.1, at pinaniniwalaang ito ay mas nakahahawa.
Sa pagsisimula ng Bakunahang Bayan Program ng DOH, muling hinimok ng kagawaran ang mga magulang na pabakunahan na ang kanilang mga anak
Layon ng programa na mas marami pang kabataan edad 5-17 taong gulang ang mabakunahan, lalo’t nangangailangan ang mga ito ng proteksyon ngayong balik face-to-face na ang pasukan.
Ayon kay Dr. Gloria Balboa, Regional Director ng DOH-Metro Manila Center for Health Development, target nilang mabakunahan ang mahigit 529,000 na mga bata edad 5-11 at mahigit 158, 000 na may edad 12-17 sa National Capital Region (NCR).
As of December 5, mahigit 13 milyon na ang naturukan ng first dose sa NCR.
Habang mahigit 12 milyon naman ang fully vaccinated.
Ang Bakunahang Bayan program ng DOH ay sinimulan kahapon (December 5) at magtatapos bukas (December 7) araw ng Miyekules.
(Gladys Toabi | UNTV News)
Tags: BQ.1 Subvariant, COVID-19 Vaccine, DOH
METRO MANILA – Naniniwala si Vaccine Expert Panel Chairperson Doctor Nina Gloriani na maaaring tumaas pa rin ang hawaan ng COVID-19 kung aalisin na ang face mask policy.
Dahil dito posibleng mas madaling makakukuha ng sakit ang mga nasa vulnerable sector katulad na lang ng matatanda, mga bata, at immunocompromised kung lalabas at makikisalamuha sa mga walang mask.
Nanawagan naman sa IATF si Dr. Maricar Limpin, ang immediate past president ng Philippine College of Physicians na pag-isipan muna ang rekomendasyon.
Sa isang panayam, sinabi din Dr. Rontgene Solante, isang infectious disease expert na hindi pa ito ang tamang panahon para sa pag-aalis ng mask.
Ganito rin ang pananaw ng health reform advocate na si Dr. Anthony Leachon.
Bagamat maaari aniya nitong mapanumbalik ang sigla ng ekonomiya, delikado at masyado pang premature ang pag-aalis ng face mask mandate sa ngayon.
Sa pahayag naman na inilabas ng DOH, nakasaad na ang posisyon talaga ng ahensya ay ipagpatuloy ang pagsusuot ng face mask .
Nguni’t sa naging pagpupulong ng IATF, mayroon ding mga datos ang naipresenta para irekomenda na ang pag-aalis nito.
Sa ngayon, hinihintay pa kung maglalabas ng executive order ang pangulo upang maging ganap na polisiya ang opsyonal na pagsusuot ng face mask.
(JP Nuñez | UNTV News)
Tags: DOH, Face mask, health experts, IATF
