MANILA, Philippines – Sasampahan ng kasong graft, technical malversation at grave misconduct si dating Pangulong Noynoy Aquino base sa draft committee report na ipinasa sa House Committee on Good Government and Public Accountability.
Kasama ring kakasuhan sila dating Budget Sec. Butch Abad at Dating Health Sec Janet Garin.
Iba-iba ang naging reaksyon ng mga House Panel sa nasabing Dengvaxia Controversy.
Ilan sa mga myembro ng House Panel ang kumukwestiyon sa draft committee report. Isa na rito si Dinagat Rep. Kaka Bag-ao na nagsabing hindi napatunayan na may nilabag na batas ang mga nasabing personalidad.
Samantalang iba naman ang naging pahayag ni Committee Chairman Xavier Romualdo. Ayon sa kanya, malinaw na lumabas sa imbestigasyon ang mga krimeng nagawa ng mga nabangit na opisyal. Sa kanyang pahayag, sinabi niyang may sabwatan umanong nangyari sa pagbili ng Dengvaxia Vaccine.
Bukod sa wala pa talagang Certificate of Product Registration ang Dengvaxia, ito ay hindi pa talaga napatutunayang ligtas gamitin.
Dagdag pa rito, mali rin umano ang paggamit ng pondo ng pamahalaan lalo na ang pag-apruba ni Aquino sa paggamit ng P3.5 bilyon na ipinambili ng Dengvaxia Vaccine noong 2015.
Ilang Kongresista naman ang umapela at humiling sa Kumite na isama ang kumpanyang Sanofi Pastuer sa mga dapat sampahan ng kaso.
Sa kasalukuyan, patuloy pa rin ang pagdinig ng Kumite sa nasabing Draft Committee Report.
(Grace Casin | UNTV News)
Tags: dating Pangulong Aquino, former Pres. Aquino, Pres. Noynoy Aquino
Dapat ma-extradite o ipatapon sa Estados Unidos si pork barrel scam queen Janet Lim Napoles upang malitis ito sa kasong money laundering ayon kay dating Pangulong Benigno Aquino III.
Ayon kay Aquino, mula pa noong kaniyang panahon ay may umiiral nang extradition treaty sa pagitan ng Pilipinas at Estados Unidos.
Ngunit ayon sa DOJ, hangga’t hindi nateterminate ang kaso ng isang indibidwal ay hindi maaaring ma-extradite ang isang akusado.
Ang tangi lamang magagawa ng mga otoridad ay makipagtulungan sa US federal authorities hinggil sa pagkuha ng ebidensya at imbestigasyon hanggang sa maibalik ang pondo ng bayan.
Samantala, umaasa rin ang dating pangulo na sa pag-upo ni Ombudsman Samuel Martires ay magiging patas ito sa pagresolba sa kaniyang mga kasong nakabinbin sa anti-graft body.
Nagbigay rin ng kaniyang pananaw si Aquino hinggil sa pag-upo ni Pampanga Representative Gloria Arroyo bilang house speaker.
Matatandaang nakulong si Arroyo noong administrasyon ni Aquino dahil sa mga kaso ng katiwalian at kurapsyon.
Bagaman bahagyang kwestiyonable umano ang pagpapalit ng liderato ng Kamara ay naniniwala naman si dating Pangulong Aquino na kung desisyon ng taumbayan ang pagkakaluklok kay Arroyo ay may karapatan naman umano nito na kunin ang nasabing posisyon.
( Mai Bermudez / UNTV Correspondent )
Tags: dating Pangulong Aquino, Estados Unidos, Janet Napoles
Pinababantayan na ng Department of Justice sa Bureau of Immigration ang posibleng pag-alis ng bansa nina dating Pangulong Benigno Aquino III at mga dating miyembro ng kaniyang gabinete kaugnay ng sinasabing anomalya sa dengue vaccination program.
Bukod kay PNoy, sakop din ng Immigration lookout bulletin order sina dating Executive Secretary Paquito Ochoa, dating Budget Secretary Florencio “Butch” Abad, dating Health Secretary Janette Garin at limang iba pa.
Katwiran ni Justice Sec. Vitaliano Aguirre, minabuti nilang ilagay sa Immigration watchlist ang mga opisyal ng nakaraang administrasyon matapos sampahan ng kasong katiwalian sa Ombudsman.
Nag-ugat ang reklamo sa 3.5 billion pesos na vaccination program na ipinatupad ng nakaraang administrasyon dahil sa inilabas na kautusan ni Aguirre, kailangan munang kumuha ng clearance sa DOJ sina PNoy bago sila payagang makaalis ng bansa.
Dumipensa si dating Pangulong Benigno Aquino III sa pagbili at pag-aadminister ng anti-dengue vaccine na Dengvaxia sa ilalim ng National Immunization Program ng kaniyang administrasyon.
Ayon sa dating Pangulo, tungkulin ng pamahalaan na siguraduhin ang kaligtasan ng mamamayan at sa tingin niya ay hindi marapat na ipagkait sa mga ito ang naturang bakuna lalo na sa mga higit na nangangailangan. Wala din naman aniyang tumutol dito noon at iginiit na dumaan ito sa masusing pagsusuri bago gamitin.
Sinagot rin ni Aquino at dating Budget Secretary Florencio Abad kung bakit napabilis ang procurement ng Dengvaxia.
Samantala, inamin ng dating Pangulo na nakipagpulong siya sa mga opisyal ng Sanofi Pasteur noong December 2015 sa Paris kasabay ng pagdalo sa Climate Change Conference.
Ayon naman sa mga health expert at siyentipiko, hindi maaaring isisi sa sinomang opisyal ang tungkol sa Dengvaxia. Muli ring idinepensa ni dating Health Secretary Janet Garin ang pagbili sa mga naturang bakuna.
Bago naman natapos ang pagdinig ay ibinunyag ni dating Health Secretary Paulyn Ubial may kongresistang nagpressure sa kaniya upang ituloy ang immunization program sa kabila ng kaniyang pagtutol sa anti-dengue vaccines.
Sa ngayon ayon kay Health Secretary Francisco Duque, gumagawa na sila ng hakbang upang mamonitor na mabuti ang mga nabakunahan ng Dengvaxia.
Maging ang World Health Organization ay nagsasagawa ng pagaaral sa mga datos tungkol sa Dengvaxia.
( Nel Maribojoc / UNTV Correspondent )
Tags: Dengvaxia, former Pres. Aquino, National Immunization Program
