Dead on the spot ang isang MassCom student ng Adamson University matapos na mahulog sa roofdeck ng 20 palapag na condominium building sa Ermita Manila alas singko ng hapon kahapon.

Kinilala ang biktima na si Kristina Marie Pagalilauan 19 anyos.

Base sa imbestigasyon ng Manila Police District Homicide Section, nagpunta ang biktima sa condo unit ng kanyang boyfriend sa Dahlia Tower Condiminium kasama ang isang kaibigan, nagkasundo umano ang dalawang dalaga na magpunta sa roofdeck upang kumuha ng litrato.

Nagselfie umano si Pagalilauan malapit sa parapet wall o ang mababang pader na nasa gilid ng roofdeck ng aksidente mahulog ito.

Nagawa pang makakapit ni Kristina sa window holding subalit hindi na nagawang masagip ng kanyang kaibigan dahil hindi kayang abutin.

Under construction pa umano ang roofdeck kaya wala pang railing subalit wala pang inilalabas na opisyal na pahayag ang management ng condominium.

Iniimbestigahan na ng homicide section kung may naging kapabayaan sa panig ng pamunuan ng Dahlia Tower at wala naman silang nakikitang foul play sa insidente.

Nasa Saint Rich Funeral Homes na ang mga labi ng dalaga at ngayong araw ay dadalhin ito sa Laguna para doon iburol.

(Benedict Galazan / UNTV Correspondent)

Tags: 20 storey condominium building, College student, mahulog, nagseselfie, patay, roofdeck