Napagkaisahan na sa consultative committee na magtakda ng educational requirement para sa mga mambabatas. Sa ilalim nito, kailangang nakapagtapos muna sa kolehiyo bago payagang makatakbo bilang senador o kongresista.
Tutol dito ang ibang miyembro ng komite dahil malilimitahan ang karapatan ng mga hindi nakapagtapos ng kolehiyo.
Pero nanaig ang mga nagsasabing dapat lagyan ng kwalipikasyon ang mga nagnanais tumakbo sa Kongreso.
Ayon sa chairman ng consultative committee na si dating Chief Justice Renato Puno, hindi ito sariling panukala lamang ng komite, kundi pagsang-ayon lamang sa pulso ng taong-bayan sa nakalipas na halalan. Sang-ayon naman sa panukala si House Speaker Pantaleon Alvarez.
Mahalaga aniya na may pinag-aralan ang isang senador o kongresista upang makapagsulat at maidepensa nang maayos ang kanilang panukalang batas.
Hindi pa pinal ang panukala na isasama bilang probisyon ng bagong Saligang Batas dahil pagbobotohan pa ito ng consultative committee sa pagbabalik ng kanilang sesyon sa Abril.
Pero noong 2013, may panukala na si dating Senador Miriam Santiago na gawing kwalipikasyon ng mga tumatakbo sa mga posisyon sa gobyerno ang diploma sa kolehiyo.
( Roderic Mendoza / UNTV Correspondent )
Tags: college degree, ConCom, mambabatas
Upang mapalawig ang diskusyon at mapalawak ang kaalaman hinggil sa pederalismo, inanunsyo ng Malacañang na bukas ang pamahalaan na tumanggap ng suhestyon o feedback mula sa publiko para sa panukalang federal charter.
Ayon kay Presidential Spokesperson Harry Roque, maaaring sumulat o magsadya ang sinoman sa tanggapan ng punong ehekutibo upang iparating ang kanilang feedback hinggil sa binuong panukalang bagong Saligang Batas ng consultative committee (ConCom).
Kukunin din ang feedback ng publiko habang nagsasagawa ng road show hinggil sa federalism ang mga ahensya ng pamahalaan sa pangunguna ng Department of the Interior and Local Government (DILG) at Presidential Communications Operations Office (PCOO).
Ang makukuhang resulta ay isasama sa federal draft na ieendorso naman sa Kongreso.
Inamin naman ni Roque na kaya nais gawin ng Pangulo na kunin ang public feedback dahil sa mga ipinahayag na pagkabahala ng mga economic manager ng administrasyon sa posibleng maging epekto sa ekonomiya ng bansa ng pagbabago ng Saligang Batas at ng uri ng pamahalaan.
Gayunman, tiniyak naman ni Roque na desido pa rin si Pangulong Duterte na isulong ang pederalismo.
( Rosalie Coz / UNTV Correspondent )
Tags: ConCom, federal charter, Pangulong Duterte
Iprinisenta ng mga miyembro ng consultative committee (Concom) sa Senado kahapon ang disenyo ng federal-presidential form of government na kanilang binalangkas sa loob ng halos 5 buwan.
At sa pagdinig, sinagot din ng Concom ang pinakahuling Pulse Asia survey na nagsasabing higit kalahati ng mga Pilipino ang hindi pabor sa charter change.
Ayon kay Concom Spokesperson Ding Generoso, time bound ang survey dahil sagot lamang umano ito ng taumbayan sa panahon kung kailan mismong tinanong ang survey.
Sa porma ng gobyerno na isinusulong ng Concom, magkakaroon ng pagbabago sa komposisyon at termino ng mga opisyal ng pamahalaan. Mananatili ang posisyon ng Presidente at bise presidente pero magiging apat na taon na lamang ang kanilang termino.
Magmumula sa isang partido ang mahahalal na Pangulo at pangalawang pangulo at maari naman silang tumakbo para sa reelection.
Mula naman sa kasalukuyang 24 ay magiging 36 na ang mga senador; tig dalawa mula sa 18 federated regions.
Ang mga rehiyon ay pamumunuan ng regional governor, deputy regional governor na kapwa may 4 year-term at entitled sa isang reelection. Ihahalal sila ng Regional Legislative Assembly.
Magkakaroon naman ng 240 kinatawan mula sa legislative districts at 160 kinatawan mula sa political party, ito ang bubuo sa 400 miyembro ng Kamara.
At imbes na isang makapangyarihang Supreme Court, hahatiin ito sa 4 na federal courts na may kani-kaniyang function.
Ang mga federated regions naman ay bibigyan ng kapangyarihang magbuwis at pangasiwaan ang sarili nilang pondo.
Nababahala naman ang ilang miyembro ng academe sa pagrerepaso at maging sa planong paglipat ng bansa sa pederalismo.
Ayon naman kay retired Chief Justice Hilario Davide, ito’y isang mapanganib na eksperimento at pagtalon sa kamatayan.
( Mai Bermudez / UNTV Correspondent )
Tags: ConCom, pederalismo, Pulse Asia
Bagaman ilang opisyal na ng pamahalaan ang tinanggal at pinagbitiw sa pwesto ng Pangulo dahil sa pagkakasangkot sa kurapsyon, nananatili pa rin umano itong isang balakid sa pagkamit ng malinis na gobyerno hanggang ngayon.
Kaya’t kung sa kasalukuyan, kapangyarihan lamang na mag-imbestiga at umusisa ng reklamo laban sa isang opisyal, empleyado o ahensya ng pamahalaan ang hawak ng Ombudsman.
Ngayon ay kasama sa panukala ng consultative committee (ConCom) na bigyan ng mas malawak na kapangyarihan para suspendihin ang mga tiwaling kawani sa ilalim ng federal constitution. Plano rin ng ConCom na itaas ang Ombudsman bilang isang federal commission.
Sa ilalim ng panukala, maglalagay ng tig-isang associate ombudsman sa Luzon, Visayas, Mindanao at Metro Manila.
Magkakaroon na rin ng Deputy Ombudsman sa bawat federated region. Sa paraang ding ito mapapadali ang imbestigasyon at prosekusyon sa mga kaso at para maiwasan ang pagkabinbin o delay sa pagresolba sa mga ito.
Samantala, tiwala pa rin ang komite na maisusumite sa Pangulo ang kopya ng binubuong panukalang pagbabago sa Saligang Batas sa ika-9 ng Hulyo, kung saan magsasagawa ng final en banc vote sa ika-3 at 4 ng Hulyo at ipapaliwanag ng mga miyembro ang rason sa likod ng pagboto sa mga probisyong kanilang inilatag.
( Mai Bermudez / UNTV Correspondent )
Tags: ConCom, federal constitution, Ombudsman
