Naaprubahan na ng Baguio City Council ang tinatawag na Paupers burial ordinance, ito ang ordinansang magbibigay ng libreng funeral service para sa mga mahihirap na residente.
Ayon kay City Councilor Leandro Yangot, ang prebilihiyo na ito ay para lamang sa mga indigent, street roamers, at mga biktima ng kalamidad at krimen na walang claimants.
Para makapag-avail ng naturang serbisyo dapat ay lehitimong residente ng Baguio City, mayroong certificate of indigence mula sa brgy. Captain.
Pagkatapos ay ive-verify naman ng City Social Welfare and Development kung talagang kabilang na mahihirap sa syudad ang nag-rerequest ng free service.
( Grace Doctolero / UNTV Correspondent )
Hanggang sa 20 na lang ngayong buwan tatagal ang suplay ng NFA rice sa lungsod ng Baguio at Benguet.
Batay sa inventory ng National Food Authority (NFA) Region 1, nasa 60,000 sako na lang ng NFA rice ang nakalaan sa buong rehiyon kasama ang Baguio, Benguet at Abra.
Tatlongpu’t tatlong libo nito ang nakalaan sa Baguio at Benguet habang ang nalalabi ay nakareserba kapag nagkaroon ng sakuna.
Ikinababahala naman ng mga residente ang unti-unting pagkawala ng NFA rice. Nangangaunti na rin ang suplay ng commercial rice kaya tumataas na rin ang presyo nito.
Dalawa hanggang limang piso na ang itinaas sa kada kilo ng commercial rice sa mga palengke.
Ayon sa NFA, posibleng sa Hunyo pa darating ang NFA supply sa Baguio at Benguet kaya mahigpit nilang sinusunod ang patakaran kung saan hanggang tatlong kilo lang ng maaaring bilhin ng mamimili kada araw.
( Grace Doctolero / UNTV Correspodent )
Pinalawig pa ng lokal na pamahalaan ng Manduluyong City ang pag-amyenda sa ordinansa kontra riding in tandem o pagbabawal sa lalaking backrider sa motorsiklo.
Palalawigin pa ng tatlong taon ang nasabing ordinansa matapos ang anim na buwang experimental stage noong nakaraang taon na nagtapos nitong Marso.
Sumuporta naman sa pamamagitan ng isang motorcade ang nasa 2,000 motorcycle riders mula sa iba’t ibang barangay sa lungsod bilang suporta sa ordinansa noong Sabado.
Hindi naman sakop ng City Ordinance No. 595 o Riding in Tandem Ordinance ang kamag-anak ng driver, babae , bata na may edad 7-10 taong gulang at miyembro ng PNP Tactical and Mobile Unit na nagroronda sa lansangan.
Mahaharap naman sa isang libong piso hanggang tatlong libong pisong multa ang mahuhuling lalabag dito.
Ayon kay Mayor Benhur Abalos, naging maganda ang kinalabasan ng pagpapatupad ng ordinansa kung saan apat na kaso lamang na konektado sa riding-in-tandem ang naitala mula nang maisabatas ito.
Aniya mas makakatulong ito para lalo pang mabawasan ang krimen sa lungsod at maging halimbawa pa sa ibang local na pamahalaan para maipatupad din nila ito sa kanilang lugar.(Reynante Ponte/UNTV Radio)
Tags: city ordinance, Mandaluyong City, Mayor Benhur Abalos, PNP Tactical and Mobile Unit, riding-in-tandem
