Naglabas na ang Philippine National Police ng listahan ng mga lalawigan na kasama sa election hotspot.
Ito’y ay kinabibilangan ng Pangasinan, Masbate, Negros Oriental, Samar, Maguindanao at Lanao del Sur.
Base sa assessment ng PNP nasa 17.5 % din ng kabuuang bilang ng mga lalawigan sa buong bansa ang nasa ilalim ng PNP election watchlist.
Habang nasa 76 Private Armed Groups o PAGS nationwide ang natukoy na at ang 69 dito ay nasa Mindanao.
Tiniyak naman ng pambansang pulisya na magtatalaga ito ng dagdag na mga tauhan upang magbantay.
Ayon kay PNP PIO Chief P/CSupt. Wilben Mayor, ngayon pa lang tinututukan na ng mga tauhan ng PNP at AFP ang mga lalawigang kabilang sa election hotspot upang maiwasan ang anomang uri ng krimen na may kinalaman sa halalan.
Nakikipag-usap na rin ang PNP, AFP at Comelec sa mga kandidato sa mga lugar na mahigpit ang labanan sa pulitika.
Sinabi pa ng heneral na pansamantala din nilang ililipat ng assignment ang mga opisyal ng PNP na may kamag-anak na kandidato sa isang partikular na lugar.
Sa kasalukuyan ay tuloy-tuloy pa rin aniya ang assessment na ginagawa ng PNP upang matukoy kung may iba pang lugar na mahigpit ang political rivalry. (Lea Ylagan/UNTV News)
Pinagbabaklas ng COMELEC at Philippine National Police ang mga illegal election poster at tarpaulin sa bayan ng Jaen, Nueva Ecija.
Unang beses itong ginawa sa Jaen na isa sa mga itinuturing na election hot spots sa Nueva Ecija.
Sa nasabing operasyon, pinagtatanggal ng COMELEC ang mga materyales ng mga kandidato na naka-paskil sa poste ng kuryente at mga punong kahoy sa gilid ng kalsada.
Maging ang mga nakasabit sa kawad ng kuryente, municipal boundary at barangay hall ay pinagbabaklas rin ng COMELEC.
Ngunit ang bulto ng illegal campaign materials ay nakulekta nila sa palengke ng Jaen.
Inihayag rin ni Jaen COMELEC Supervisor Amiremnus Zerrudo na hindi pa man sila nagsisimulang magbaklas ay may natanggap na silang pagbabanta mula sa ilang pulitiko.
Sa kabila nito, itinuloy pa rin nila ang operasyon alinsunod sa omnibus election code.
Iipunin naman ng COMELEC ang mga nabaklas na illegal campaign materials upang gamiting katunayan ng kanilang paglabag.
Muli namang nagpaalala ang COMELEC sa mga kandidato at supporters na huwag magpapaskil ng campaign posters sa mga ipinagbabawal na lugar upang huwag masampahan ng reklamo.
(Grace Doctolero / UNTV Correspondent)
Tags: COMELEC at PNP, election hotspots, Kauna-unahang Oplan Baklas, Nueva Ecija
Inisa isa na ng Philippine National Police ang bayan at lungsod na kabilang sa election hotspots mula sa anim na lalawigan sa bansa.
Sa Pangasinan may naitalang isang lungsod at 3 bayan na kinabibilangan ng Bayambang, San Carlos, Urbiztondo at Infanta na nasa category 1.
Sa Masbate, anim na munisipalidad o bayan na nasa category 1 ito ay ang Batuan at Cawayan habang nasa category 3 ang Aroroy, Balud, Cataingan at Claveria.
Sa Negros Oriental, isa ang lunsod at isa ang bayan at pasok sa category 1 ang la libertad at category 2 naman guihulngan city.
Ang Samar ay may isang lungsod at apat na bayan na kinabibilangan ng sta. Margarita sa category 1, San Jorge sa category 2 at Calbayog City, Gandara at Matuguinao naman sa category 3.
Ang Maguindanao may 4 munisipalidad na pasok sa category 1 tulad ng Datu Hoffer Ampatuan, 2 naman ang pasok sa category 2 kasama ang Datu Paglas, at 31 ang nasa category 3 tulad ng Datu Unsay, Datu Piang, Matanog, Mangudadatu, Sultan Kudarat at iba pa.
Habang isang lungsod naman at 13 bayan ang nakalista sa Lanao del Sur, kung saan 1 ang nasa sa category 1 na Lumbaca Unayan, category 2 naman ang Marogong at 12 sa category 2 tulad ng Butig, Kapai, Lumbatan, Marawi City at iba pa.
” We are going to provide more focus if the election period starts on Feb 9. “ Pahayag ni PNP Chief PDG Ricardo Marquez
Ang category one ay ang lugar na may intense political rivalry at may naitalang election related incidents sa mga nakalipas na halalan.
Ang category two naman ay ang mga lugar na may threat groups na nag-ooperate.
Habang ang nasa category three naman ay ang lugar kung saan parehong may threat groups at election related incidents.
Sinabi rin ni Chief PNP na nagpo pokus sila sa Region 9, 12 at ARMM kung saan maraming private armed group.
(Lea Ylagan/UNTV News)
Idineklara ng COMELEC, Philippine National Police at Armed Forces of the Philippines bilang areas of concern ang apatnaput apat na bayan sa Eastern Visayas kaugnay ng nalalapit na National elections.
Pinakamaraming naitala na areas of concern sa Samar Province, sinundan ito ng Leyte, Northern Samar, Eastern Samar at Biliran.
Hindi naman kasama sa listahan ng mga isinailalim sa areas of concern ang lalawigan ng Southern Leyte dahil walang naitatalang election related incident sa probinsya noong nakaraang 2013 elections.
Ayon kay Major General Jet Velarmino ng 8-infantry division Philippine Army, kung kinakailangang mag deploy ng maraming sundalo sa Samar bilang augmentation nila sa PNP ay gagawin aniya nila upang matiyak na magkaroon ng mapayapang halalan.
Una nang nagpadala noong disyembre si PNP Director General Ricardo Marquez ng 88-SAF Personnel sa probinsya, at nangakong magdadagdag pa ng ilang police personnel upang maiwasan na ang naitatalang patayan sa lugar na may kinalaman sa eleksyon.
Dagdag pa nito, may ideneploy narin silang mga sundalo bilang dagdag pwersa sa mga inilagay na checkpoints ng PNP sa buong rehiyon.
Una nang idineklara ang Samar na kabilang sa anim na election hotspot sa bansa.
(Jenelyn Gaquit / UNTV Correspondent)
Tags: 44 na bayan, areas of concern, COMELEC, eastern visayas, PNP
