Patay ang isang siyam na taong gulang na babae sa Bulacan matapos na tamaan ng ligaw ng bala.

Ayon sa Department of Health, tinamaan ng bala ang naturang bata habang ito ay naglalaro malapit sa Ipo dam noong December 24.

Nakauwi pa sa kanilang bahay ang biktima at agad na isinugod ng kanyang mga magulang sa East Avenue Medical Center kung saan siya sumailalim sa operasyon ngunit binawian rin ito ng buhay noong December 25.

Ito ang unang kaso ng nasawi dahil sa stray bullet bago pa man sumapit ang pagpapalit ng taon.

Ikinalungkot naman ng malakanyang ang insidente kasabay ng panawagan sa publiko partikular na sa mga gun owner na maging responsable sa paghawak ng baril.

Umaabot na sa isang daan at tatlumput-isa ang kaso ng mga biktima ng paputok batay sa pinakahuling datos ng DOH.

Patuloy naman ang pakiusap ng DOH sa mga magulang ng mga bata na bantayan ang kanilang mga anak upang makaiwas sa anumang aksidente na maaring idulot ng pagpapaputok.

(Joan Nano / UNTV Correspondent)

Tags: 9-taon na bata, ligaw na bala, patay