Walumpu’t siyam na sinkholes ang natagpuan ng Western Visayas Mines and Geosciences Bureau sa bayan ng Buenavista, Guimaras Island matapos ang isinagawang preliminary geohazard mapping and assessment program.
Sa kanilang pagsusuri, ang ilang sinkhole ay may lawak na isang kilometro at nasa 50 metro ang lalim habang ang iba naman ay makikita lamang kapag ginamitan ng ground penetrating radar.
Labimpitong barangay sa Buenavista ang napa-ulat na may sinkholes na mapanganib sa mga residente dahil anumang oras ay maaaring gumuho ang lupa na kinatitirikan ng mga bahay at mga gusali.
Kamakailan ay may napaulat na mga taong nahulog sa mga nabuong sinkhole sa Kabankalan city sa Negros Occidental at may hayop ring namatay matapos mahulog sa butas.
Paliwanag ng mga eksperto, ang sinkholes ay nabubuo kapag ang mga pundasyon na bato o limestone rocks sa ilalim ng lupa ay natutunaw sa madalas na pagdaloy ng tubig na nagreresulta sa pagguho ng lupa.
Maaaring dahilan rin ng sinkhole ay ang pagkabutas ng limestone na nasa ibabaw ng isang kweba o tinatawag na cave access.
Pinag-iingat naman ng MGB ang mga residente at pinayuhang lumikas na lamang kung hindi nakakasigurong matibay ang pundasyon ng lupa lalo’t panahon na ng tag-ulan.
Tiyakin din na bago magtayo ng gusali ay ligtas ang lupa sa sinkholes sa pamamagitan ng pag-konsulta sa mga eksperto at geologist.
(Lalaine Moreno / UNTV Correspondent)
METRO MANILA – Inaasahang malilikha ang nasa 42,000 na trabaho sa muling pagbubukas ng mga bagong minahan sa bansa.
Isa ito sa nakikitang solusyon kaugnay ng balik probinsya, bagong pagasa program ng pamahalaan.
Ayon sa Mines and Geoscience’s Bureau (MGB) ng DENR, may 36 projects sa priority phase 1 na inaasahang maguumpisa na ang operasyon sa lalong madaling panahon .
May 65 projects naman na nasa priority phase 2 na kinukumpleto pa ang mga kailangang dokumento.
Tinatayang nasa P20-B naman kada taon ang posibleng dagdag na makuhang buwis sa pagbubukas ng mga bagong minahan, P58-B halaga ng export product at P5-B royalties.
Ayon sa MGB, nasa 1 – 5 taon bago makabuwelo sa operasyon ang isang minahan.
“Naghahabol tayo kailangan natin ng revenue dahil lubog na tayo sa utang kailangang madevelop na yung mining projects” ani Mines and Geosciences Bureau Dir. Wilfredo Moncano.
Ayon naman sa DENR, titiyakin nilang masusunod ang tamang paraan ng pagmimina.
“So hindi na natin iiwanan na talagang sirang-sira yung kabundukan o yung lugar bago nila rehabilitate” ani DENR Usec. Jonas Leones.
Kamakailan lang ay nilagdaan ni Pangulong Rodrigo Duterte ang Executive Order 130 na nag-aalis ng ban sa pagbubukas ng mga bagong minahan.
(Rey Pelayo | UNTV News)
Lubhang madami ang ibinuhos na ulan ng habagat dahilan upang bumaha sa mga bayan ng Marikina at San Mateo Rizal noong Agosto base sa isinagawang geohazard mapping ng Mines and Geosciences Bureau (MGB) Region 4A.
Ngunit hindi rin anila maiaalis ang posibilidad na may kinalaman din ang quarry operations sa pagbaha kaya patuloy ang kanilang imbestigasyon sa insidente.
Nangangamba naman si Barangay Chairman Edgar Sison na bagaman sarado ang Montalban Millex ay samantalahin naman ito ng mga illegal quarry operators.
Ngayong madalas ang mga pag-ulan lalo na sa hapon sa San Mateo Rizal, tigib ng pangamba ang mga residente kaya doble ang kanilang ginagawang pag-iingat at pagmomonitor sa kanilang lugar sa maaring pagbaha.
Samantala, may mga proactive action na umanong ginagawa ang Rizal Provincial Enviromental and Natural Resources Office sa mga landslide prone area sa Rizal upang mabigyan ng tamang aksyon at impormasyon ang mga taong malapit sa mga lugar na ito.
Nangangamba rin ang mga residente na baka sapitin din nila ang magkasunod na landslide sa Itogon, Benguet at City of Naga, Cebu.
( Jennica Cruz / UNTV Correspondent )
Tags: habagat, MGB, San Mateo Rizal
