Ikinabahala ng milyong-milyong facebook user ang anunsyong inilabas ng pamunuan ng social media giant na facebook noong Sabado kaugnay ng umano’y security flaw o butas sa seguridad ng kanilang application system.
Ayon sa facebook, tinatayang nasa 50 milyong account ang naapektuhan nito dahil sa pagsasamantala ng mga hacker.
Ayon sa kumpanya, ginamit ng mga hacker ang “view as” feature ng social media. Ito ay feature ng fb kung saan maaring makita ng isang user kung ano ang nakikita ng isang bumibisita sa kanyang account. Sa pamamagitan ng “view as” feature nakuha ng mga hacker ang access token o digital keys ng mga fb user.
Ang digital keys na ito naman ang feature ng facebook upang manatiling naka-log in ang isang account at hindi na kinakailangang mag-input ng password tuwing gagamitin ang app.
Sa pahagay na inilabas ni FB Chief Executive Mark Zuckerberg, sinabi nito na hindi pa nila matukoy kung mayroong mga account ang pinakialaman ng mga hacker, ngunit sinabing isa itong seryosong isyu.
At bilang pag-iingat, pansamantalang inilog-out ng facebook ang account ng maraming fb user nitong weekend, inalis rin ng fb ang view as feature sa kanilang application.
Nakipag-ugnayan na rin ang facebook sa mga data privacy regulator at mga otoridad upang maimbestigahan ang insidente.
Samantala, sa pahayag naman na inilabas ng National Privacy Commission (NPC), sinabi nito na hindi pa nila matukoy sa ngayon kung ilan ang mga Pilipinong nadamay sa pangyayari, at kung may personal na impormasyon ang nagamit sa maling paraan.
Pinayuhan naman ng facebook ang mga user na ilog-in na lamang muli ang kanilang mga account. Nilinaw rin nito na hindi na kinakailangan na baguhin pa ang kanilang mga password.
Samantala, plano naman ng facebook na dagdagan ang kanilang mga tauhan na magbabantay sa seguridad ng privacy ng mga milyong-milyong facebook user ng sikat na social media network.
( Joan Nano / UNTV Correspondent )
Tags: Facebook, Seguridad, social media giant
METRO MANILA – Nilinaw ng social media giant na Meta, na maaari pa ring makapag-live selling sa Facebook ang mga FB user sa Pilipinas.
Ang klaripikasyon, ay kasunod ng anunsyo ng kumpanya na simula sa October 1, ay tatanggalin na nila, ang ‘live shopping’ feature sa Facebook.
Pero ayon sa Meta, ang ‘live shopping’ tool sa ay hindi available sa Pilipinas kundi sa mga piling bansa lamang.
Dahil dito maaari pa ring makapag-live selling ang mga FB users sa Pilipinas sa pamamagitan ng facebook live.
Tags: Facebook, LIVE Selling, Meta
METRO MANILA – Sinimulan nang alisin ng Facebook ang mga accounts at groups ng conspiracy theory movement na QAnon, sa lahat ng plataporma nito.
Noong August 19, inanunsyo ng Facebook sa blog post nito na sila na mismo ang gagawa ng aksyon sa pagaalis ng mga grupo at account na nanghihikayat ng karahasan tulad ng QAnon.
“We are starting to enforce this updated policy today and are removing content accordingly, but this work will take time and need to continue in the coming days and weeks. Our Dangerous Organizations Operations team will continue to enforce this policy and proactively detect content for removal instead of relying on user reports.” – Facebook, An Update to How We Address Movements and Organizations Tied to Violence, October 6,2020.
Nakapagalis na ang Facebook ng mahigit 1,500 na pages at groups ng QAnon na nanghihikayat ng karahasan sa mga contents nito.
Ayon pa sa Facebook, nagkakalat ng mali at delikadong impormasyon ang grupo.
Ang QAnon ay isang conspiracy theory movement na nagsasabing mayroong sikretong organisasyon ang Trump Administration laban sa grupo ng mga pedopilyang nagsasagawa ng child-sex trafficking ring.
Sa kasalukuyan, wala pang napapatunayan sa mga teorya na ito.
(Ariel Lyn Aranas | La Verdad Correspondent)
METRO MANILA – Trending kahapon (June 8) sa social media ang post ng mga nagrereklamong netizen dahil sa pagsulputan ng mga pekeng Facebook account.
Ayon sa mga nagpost, hindi sila ang nagma-mayari ng naturang mga account.
Karamihan umano sa mga nagawan ng fake accounts ay sinasabing mga kritiko ng administrasyon na tumututol sa Anti-Terrorism Bill.
Marami ang nagdududa at nagsasabing kagagawan umano ng mga troll ang pagpapakalat ng mga fake accounts sa social media.
Sa pahayag na inilabas ng University of the Philipppines (UP), sinabi nito na ikinababahala nila ang pagdami ng mga pekeng accounts ng kanilang mga estudyante at alumni at pinayuhan na maging mapagbantay at ireport ang mga pekeng account.
Bukod sa UP, may ilan pang unibersidad ang nagsabing marami rin sa kanilang mga estudyante ang may ganitong reklamo.
Maging ang ilang miyembro ng media, ikinagulat din ang pagkakaroon ng mga dummy account.
Kaugnay nito inatasan na ni Justice Secretary Menardo Guevarra ang cyber crime division ng DOJ na makipag-ugnayan sa National Bureau of Investigation (NBI) at Philippine National Police upang imbestigahan ang pangyayari.
Samantala, inaalam na rin ng National Privacy Commission kung sino ang nasa likod ng pagpapakalat ng mga dummy accounts, at nakipagugnayan na rin sa Facebook Philippines upang matunton ang salarin sa pagsulputan ng mga pekeng accounts.
Hinihikayat ng national Privacy Commission ang mga netizen na ireport ang mga pekeng account sa www.facebook.com/help/report.
(Joan Nano | UNTV News)
Tags: Facebook, Fake Account, National Privacy Commission, NBI
