Pudpod na ang gulong at may basag ang wind shield, ito ang natuklasan nang mag-inspeksyon ang Highway Patrol Group sa dalawang bus ng Dimple Star na biyaheng Iloilo kaninang umaga, kaya naman hindi muna sila pinabiyahe ng LTFRB.
Inikot ng LTFRB ang mga bus terminal sa Cubao area upang tiyaking nasa kundisyon ang mga bus at mismong mga driver nito bago bumiyahe. Bukod sa nakitang ilang paglabag, sinita rin ng LTFRB ang mga dispacher at kundoktor ng ilang bus.
Nanawagan din si LTFRB Board Member Atty. Aileen Lizada sa mga bus operator na dapat ay bigyan ng makakain ang mga pasaherong maaapektuhan ng delay ng mga bus. Sa ngayon, wala pang violation na maaaring ipataw sa mga ito. Pero ayon kay Lizada, irerekomenda niya ito sa LTFRB board na patawan ng kaukulang parusa.
Sa ngayon ay marami pang mabibiling ticket para sa mga ordinaryong bus, subalit fully booked na ang mga air-conditioned bus. Tiniyak naman ng LTFRB na hindi kukulangin ang 947 na mga bus na binigyan nila ng special permit para sa mga bibiyahe ngayong long holiday.
Sakaling kukulangin, handa naman ang LTFRB na magbigay ng karagdagan.
( Grace Casin / UNTV Correspondent )
Tags: bus, hindi pinabiyahe, LFTRB
METRO MANILA – Inaasahan na ng pamunuan ng Parañaque Integrated Terminal Exchange (PITX) na lalo pang pagdagsa ang mga pasahero sa kanilang terminal pagdating ng long weekend.
Upang mapaghandaan ito, nakipagugnayan na sila sa sa iba’t-ibang ahensya ng gobyerno upang tiyakin ang seguridad ng mga byahero at tiyaking may sapat na mga bus silang masasakyan.
Ayon sa Spokesperson ng PITX na si Jason Salvador, nakipagpulong na sila sa Land Transportation Franchising and Regulatory Board (LTFRB) upang tiyaking makakapag-issue ito ng special permit kung sakaling kulangin ang bilang ng mga bus na bibyahe pagdating ng long weekend.
Dagdag pa ni Salvador, magtatalaga din ang LTFRB ng mga tauhan nito sa terminal sa panahon ng long weekend upang agad na makapag-issue ng special permit sa mga pampublikong transportasyon.
Upang matiyak naman ang seguridad ng publiko, nakipagugnayan din ang PITX sa Land Transportation Office (LTO) upang magbantay sa kapasidad ng mga bus at matiyak na nasa tamang kondisyon ang mga driver nito.
Magsasagawa din aniya ang LTO ng random inspection upang masigurong walang impluwensya ng ilegal na droga ang mga driver.
Payo ng pamunuan ng PITX sa mga byahero na uuwi sa mga probinsya na ikonsidera na rin ang pagtaas ng presyo ng pasahe sa mga rutang dati na nilang sinasakyan, ito’y dahil pa rin sa epekto ng pagtaas ng presyo ng produktong petrolyo sa mga pampublikong transportasyon.
Dagdag na paalala ng PITX, maaari nang bumili ng ticket ng mas maaga ang mga biyahero upang hindi sila makipagsiksikan sa inaasahang dagsa ng pasahero sa terminal bago ang long weekend.
At dahil 100% sitting capacity na ang pinapayagan sa mga bus, inaabisuhan ang publiko na sumunod pa rin sa protocol lalo na ang pagsusuot ng face mask upang makaiwas sa hawaan ng COVID-19.
(JP Nuñez | UNTV News)
Tags: bus, long holiday, PITX
METRO MANILA – Kahit pa inaprubahan ng Land Transportation Franchising and Regulatory Board (LTFRB) ang P12 na minimum fare sa mga jeep, para sa ilang transport group, hindi naman nito natugunan na madagdagan ang kita ng mga driver dahil sa muli nanamang pagtaas ng presyo ng petrolyo partikular na ang Diesel.
Sa nagdaang 2 Linggo, halos P10 na naman ang nadagdag dito.
Bunsod nito, muling naghain ng petisyon ang Pasang Masda, Alliance of Transport Operators and Drivers Association of the Philippines at Alliance of Concerned Transport Organizations para humiling sa LTFRB ng surge fee o dagdag pasahe kapag rush hour,
Nais ng mga ito na magdagdag ng P1 sa kada kilometrong byahe sa mga Public Utility Jeep (PUJ) at P2 naman sa mga pampublikong bus.
Ngunit ipapataw lamang ito kapag rush hour o mula alas-5 ng umaga hanggang alas-8 ng umaga at mula alas-5 ng hapon hanggang alas-8 ng gabi.
Ayon sa LTFRB, natanggap na nila noong Biyernes ang petisyon ng mga transport group.
Batay sa kanilang opisyal na pahayag, magkakaroon ng inflationary effect o magiging dahilan ng pagtaas ng presyo ng bilihin at serbisyo ang panibagong dagdag pasahe na hinihingi ng mga transport group.
Pero isinasantabi muna nila ito upang pag-aralan ang mga puntong nais ilatag ng mga petitioner.
(JP Nuñez | UNTV News)
Matapos aprubahan ang paniningil ng sampung pisong minimum na pasahe sa mga jeep. Pinayagan na rin ng Land Transportation Franchising and Regulatory Board (LTFRB) ang mga pampasaherong bus na magpatupad ng pisong dagdag pasahe.
Ibig sabihin, ang dating sampung pisong pasahe sa nga ordinary bus ay magiging onse pesos na. Habang ang mga aircon buses naman na naninigil ng dose pesos ay magiging thirteen pesos na.
Bukod sa pisong dagdag sa minimum na pasahe sa bus, pinahintulutan rin ang mga ito na magdagdag ng 15 sentimos sa kada susunod na kilometro ng biyahe.
Tags: bus, dadag pasahe, LTFRB
