Mariing kinokondena ng pamunuan ng Philippine National Police ang pananambang ng New Peoples Army sa mga miyembro ng Regional Public Safety Battalion o RPSB sa Brgy. Sta. Margarita, Baggao Cagayan nitong Martes.
Anim na pulis ang namatay at 15 ang nasugatan sa insidente
Ayon kay PNP Pio Chief P/CSupt. Wilben Mayor, magsasagawa sana ng imbestigasyon ang mga tauhan ng RPSB sa ginawang panununog ng rebeldeng grupo sa mga heavy equipment ng isang kontraktor na tumanggi sa extortion activities ng grupo.
Sinabi pa ni Mayor na sa ngayon ay patuloy ang hot pursuit operations ng PNP at AFP laban sa mga rebelde at itinaas na rin sa full alert status ang pwersa ng PNP sa Cagayan.
Sasampahan na rin nila ng reklamo ang grupo ng NPA na responsable sa nasabing ambush.
Samantala tiniyak ng Malacañang na mabibigyan ng hustisya ang mga biktima sa naturang insidente.
Kasunod ng pakikiramay, tiniyak din ng pamunuan ng PNP na makatatanggap ng mga benepisyo ang mga namatay at maging ang mga nasugatang pulis.
Kinilala ang 6 na nasawi na sina PO1 Ryan Annang, PO1 Derrel Sunico, PO1 Arjay Bautista, PO1 Rogelio Alfonso, PO1 Julius Soriano at PO1 Jaypy Aspiros.
Nabawi ng mga pulis sa naturang insudente ang eksklusibong baril ng Special Action Force na nakuha ng mga rebelde.
(Lea Ylagan/UNTV News)
Tags: Baggao, Cagayan, New People’s Army, Regional Public Safety Battalion
Nasa pitumpu’t isang libong indibidwal na ang naapektuhan ng pagtama ng bagyong florita sa bansa.
Ayon sa inilabas na ulat ng National Disaster Risk Reduction and Management Council ngayong araw, Aug. 26, nagmula ang mga ito sa Ilocos Region, Cagayan Valley, Cordillera Administrative Region, CALABARZON at Metro Manila.
Nasa kabuuang 776 na pamilya naman ang nananatili sa mga evacuation center, habang 169 ang nakikituloy sa bahay ng kanilang mga kaanak o kaibigan. Tatlumpu’t tatlong (33) bahay naman ang napaulat na nasira sa Ilocos Region, Cagayan Valley at CAR.
Umabot naman sa 6.2 million pesos halaga na ng food packs, hygiene kits at relief assistance na ang naibigay sa mga komunidad na naapektuhan ng bagyo.
Tags: Bagyong Florita, Cagayan, Ilocos Region
Manila, Philippines – Nagbabala si PNP Chief PGen. Oscar Albayalde sa halos 400 kandidato na nagbibigay ng suporta sa pamamagitan ng extortion money sa rebeldeng New People’s Army o NPA.
Ayon kay Albayalde, may listahan sila ng 394 na mga kandidato na nagbigay ng pera noong nakaraang eleksyon at patuloy na nagbibigay ng suporta sa rebeldeng grupo.
Kaya naman patuloy ang monitoring nila sa mga ito lalo nat nalalapit na ang midterm elections. Kabilang aniya sa nasa listahan nila na ibinigay ng DILG ay ang:
11 Provincial Governors
5 Vice Governors
10 Provincial Board Members
55 Mayors
21 Vice Mayors
41 Councillors
50 Brgy Councilors
126 Barangay chairmen
8 Other Brgy. Officials
“ Sa ngayon there are just being monitored, we have to get hard evidence para dito, this are all intelligence information that we get na meron tayong nakuhang information that they give extortion money to the cpp- npa” ani Pnp Chief PGen. Oscar Albayalde.
Babala ni Gen. Albayalde, maaaring kasuhan ang mga ito kung mahuhuling nagbibigay ng pera sa npa na kalaban ng estado.
Possible criminal liability for violation RA 10168 or the terrorism financing prevention and suppression act of 2012. If it is proven that fee is made as part of a conspiracy to overthrow the government, the donor may be held liable as co-conspirator of the crime of rebellion.
Dagdag ni PNP Chief , nasa P195.5 milyon pesos na ang nakolektang extortion money ng npa sa mga pulitiko simula noong 2016 hanggang 2018.
(Lea Ylagan – Untv News)
Tags: extortion, New People’s Army, Philippine National Police
Binayo ng malakas na hangin ang buong probinsya ng Cagayan matapos mag-land fall ang Bagyong Rosita sa Isabela noong Martes ng umaga. Ito ang dahilan kung bakit labing apat na syudad at munisipalidad ang nawalan ng kuryente simula pa noong Lunes.
Nasa mahigit tatlong libong indibidwal rin ang nagsilikas kabilang na ang mahigit dalawang daang residenteng nakatira sa Chico River na nanganganib ang buhay dahil sa banta ng pagtaas ng tubig sa ilog.
Bagaman binayo ng malakas na hangin ang mga imprasktrutura sa probinsya, walang mga bahay ang nasira at nadadaanan pa rin ang lahat ng mga kalsada. Gumagana rin ang linya ng komunikasyon at mayroong tubig na maiinom.
Iniulat ng pamahalaang panlalawigan ng Cagayan na walang napaulat na namatay at sugatan sa probinsya.
Habang papalabas ng bansa ang bagyo, unti-unti ng bumubuti ang panahon dahilan upang maghanda nang umuwi ang mga tao sa mga evacuation center.
Plano ng karamihan na umuwi ngayong araw upang maituloy ang naumpisahang rehabilitasyon ng kanilang mga taniman na nasalanta ng Bagyong Ompong noong nakaraang buwan.
Pero ayon sa mga lokal na opisyal, nakadepende sa kanilang situational assessment kung pauuwiin na ang mga evacuees.
Samantala, tiniyak naman ng National Grid Corporation of the Philippines (NGCP) na ibabalik sa lalong madaling panahon ang supply ng kuryente sa buong probinsya.
( Mon Jocson / UNTV Correspondent )
Tags: Bagyong Rosita, Cagayan, kuryente
