METRO MANILA, Philippines – Ginanap noong Biyernes ng gabi ang 1st Rotary Wheel Celebrity Award For Public Service sa Intramuros Maynila. Layon ng event na ito na kilalanin ang mga indibidwal at mga celebrity na nagbigay ng malaking ambag na serbisyo publiko sa kanilang mga larangan.

Kinilala bilang Best Television Channel For Public Service ang UNTV dahil sa mga programa nito na laging may kaakibat na serbisyo publiko na konsepto ng CEO at President ng UNTV na si “Kuya” Daniel Razon.

Pangunahin ring sumusuporta sa mga adbokasiya ng UNTV ang overall servant ng Members Church Of God International na si Bro Eli Soriano.

Isa sa mga konsepto ni Kuya Daniel ay ang “Tulong Muna Bago Balita”. Kung saan prayoridad ng UNTV correspondents na tumulong sa kapwa kaysa mauna sa balita. Kabilang naman sa programa na may kaakibat na pagtulong sa kapwa ay ang UNTV Cup na nakatapos na ng pitong season.

Ang mga kalahok sa Charity Basketball League ay pipili ng charity institutions kung saan dito mapupunta ang salaping kanilang mapapanalunan sa liga.

“Maraming maraming salamat, first and foremost, nagpapasalamat tayo sa Dios sa award na ito sa ngalan po ni Kuya Daniel Razon, maraming salamat at siyempre sa pangunahing tumutulong po ng lahat ng public service ng UNTV, Bro. Eli Soriano, maraming salamat po sa Dios. Tayo po ay nagbibigay ng genuine public service sa ating mga kababayan at bonus na po kung tayo ay nabibigyan ng award,” ani Ms. Annie Rentoy ang station manager ng Radyo La Verdad 1350 na siyang representative ni Kuya Daniel Razon sa pagtanggap ng award.

Ang Rotary Wheel Celebrity Awards ay proyekto ng Rotary Club Of Manila Fort Santiago sa pakikipagtulungan ng Aliw Awards Foundation Inc, The Filipino Academy Of Movie Arts And Sciences O FAMAS at Soroptimist International Las Pinas Central.

(Nel Maribojoc | UNTV News)

Tags: Best TV Channel For Public Service, Kuya Daniel Razon, Mr.Public Service Kuya Daniel Razon, Public Service Channel, UNTV